2 Pɛtɛlɔ 3 - Zimba Nouveau Testament Portions

Kɔɔtɔka kwa Mwaame

¹ Ee babotwa naanɛ! Ona ne mokanda wa bee usubakunyea mee. Mo ena mekanda ɛɛsɛ ebee, nakondee kobaeyoa itɛ moongwaye mo kochombya ngani chaachi bwaachi ku bia bibakunyee mee.

² Natokonda moeyokaye makomo maɔchiwa kaɛ nɛ ndɛnda che kiinɛkinɛ. Kabee mɔbɛ mo koeyoka elya salia ya Mwaame wiito ne Moolochi, yaeyechiwa niinu ne ndomwa.

³ Kombaa kwe biisɛ mochebe itɛ, ko masu mɛ kɔbɔnga, kotaiocheche bando batachikae mo koketa makomo koengama ne bikete byabɔ mabea me ikaa lyabɔ bɛɛnɛ. Baa bando batabɛ mo kobasɛka banu,

⁴ nɛ kɔɔcha: «Wabalaa otaɔtɔkɛ! Ko leno oe koni? Kɔmɔa, abangoa baisito mokoo kokwa na leno, biemo biisɛ bie ne bwakaɛ boa bwabɛchaya abyo asɛngiwa mɔsɛngɛ!»

⁵ Baa bando batwiebeela itɛ kobangoa kaɛ, Kakua wabomba sɛnga ne iyoo koetea ikomo bokata. Mɔsɛngɛ wasɛngiwa kotokea mo maache koetea maache.

⁶ Bwakaɛ bwakaɛ ku bibyɔ, mɔsɛngɛ we kaɛ waɔnɛka nɛ mɔnɛmbɔ we maa maache.

⁷ Ko njea yee lyakaɛ lɛlyɔ ikomo, iyoo ne mɔsɛngɛ bye leno, bitɔɔngiwa kebange ko kosiekechwa ne toya. Bitɔɔngiwa kɔ lɔɔ lusu lwakabɛmba Kakua makomo ne kɔmɔnya manɛnɛ baa batoketa bwabea.

⁸ Ee babotwa naanɛ, koe ikomo lɛmɔɔsa letaasi banu motowaena koleebeela: kombaa kwa Mwaame, lusu lɔmɔsa loe ne boe meaka kanunu kamɔsa. Ne meaka kanunu kamɔsa boe lusu lɔmɔsa.

⁹ Mwaame ndatɔlɛya koketa byaɔcha awɛ butuninga bamɔ bando. Awɛ okee mo koendecha ko mbanga yiinu, kɔmɔa ndatokonda naa ne mondo ɔmɔɔsa kuchimbea. Otoekya itɛ bando basɛ batuuluke kotoka ko bwabea bwabɔ.

¹⁰ Lusu lwe kɔɔtɔka kwa Mwaame lotaolee botoolea ngiba. Lɔɔ lusu, iyoo letachimbee ne moocho, ne byasɛngiwa biisɛ bitɔmɔɛsa kyɛɛngɛ mwiyoo bitasɛngɔkɛ ne toya. Mɔsɛngɛ ne biisɛ biemo bitasiekee.

¹¹ Kɔmɔa itɛ biisɛ bitaɔnɛkɛ bobo, baanu motowaena kuchikaa ne bikete byaachi bitokonda Kakua.

¹² Mɔbɛ mo koketa bobo, banu batoendecha loa lusu lwa Kakua loolee mbeo. Mo lɔlɔ lusu ne motasɛngɔkɛ iyoo ne biisɛ bye mwiyoo ne toya.

¹³ Kobangoa kaɛ, Kakua wausia kotobaecha itɛ, kotaongwe mɔsɛngɛ moya moya, ne iyoo leyaleya, moa mwakaongwa makomo masɛ me kiinɛkinɛ. Leno bia ne bitoendecha bae.

Mwikɛngɛ

¹⁴ Nɛ kɔ bɔbɔ, ee babotwa naanɛ, akee banu mo koendecha mamɔ makomo, mwifɛkɛɛnyɛ koongwa bando be kiinɛkinɛ bataasi ne kangɔnjɔ kombaa kwa Kakua, ne bae ne nyaa kombaa naakɛ.

¹⁵ Mochebe itɛ, koendecha kototoendecha Kakua kotobaɛcha banu kyaanya keeko kyaachi, itɛ mokonje kooloka. Bibyɔ ne koetea makomo matukunyea mobotwa niito, ne ngondwa Paɔlɔ, utubikambekya ne lokani lwa mɔɛcha Kakua.

¹⁶ Na bɔbɔ bwakaɛ bwakunya awɛ monda mwe mekanda ɛɛsɛ yaɔcha ko mbanga yee maɔ makomo. Monda mwa ɛyɔ mekanda, moe makinɛ makomo mabua mae makoba komaungwa. Bando baɔka, ne bataasi koeyechwa, batutuula mamɔ makomo bɔtɔɔcha amo, bwakaɛ boa butuula abɔ mamɔ Makomo ma Ama. Kɔ ɛyɔ njea, batwichimbecha abɔ bɛɛnɛ.

¹⁷ Banu babotwa naanɛ, muusia kocheba mama makomo. Kɔ bɔbɔ mwilɔlɛ bwaachi mobaongiwa ne bwabea bwa baa bataasi kotena Kakua. Mwasoketa bobo motachikae bwaachi monda mwe iekekeo linu.

¹⁸ Muchikae ngoo monda mwe makomo ma Mwaame wiito Yɛsu Kilisito, ne Moolochi wiito kɔmɔa momochebe byabua, na awɛ omoenokye byabua. Kwakɛ kɔbɛ boombe leno ne meombo ne meombo! Biibɛ bɔbɔ!