2 Pɛtɛlɔ 1 - Zimba Nouveau Testament Portions

Mɔyɔ

¹ Mee Simɔni Pɛtɛlɔ, mocha ne ndomwa ya Yɛsu Kilisito, natobakunyea banu bae ne iekekeo monda mwaakɛ bwe bae. Lea iekekeo lee ne ibɛi lekatala. Yɛsu ne waketa boa ko mbanga yiito kɔmɔa otoketa bye kiinɛkinɛ, ne oona Yɛsu ne Kakua ne Moolochi wiito.

² Kakua ɔbɛɛ mo kobaenokya byabua ne kɔbaɛcha nyaa ya bua ko boa bɔtɔmɔtɛcha baanu, ne komocheba Mwaame wiito Yɛsu Kilisito!

Kuitanewa ne kɔsɔbɔiwa na Kakua

³ Kakua ɔɔtɔɛcha biisɛ bitoenga bae mɔ mwɛchɔ wiito monda mwe bɔkɛtɛ bwakɛ kɔmɔa toongwe ne bikete bitokonda awɛ. Waketa bobo ne ko kotobeka amɔsa naakɛ ne tɔbɛ mo kocheba olya watwitana, ne tokonje bimɔ ko boombe ne bwaachi bwakɛ.

⁴ Ko boa, Kakua ɔtɔɛchɛɛ biemo bye ibɛi lyakoba lyatolaa awɛ. Waketa bobo kɔmɔa koetea maa malai maakɛ baanu mooloke ko manɛnɛ matobaka koetea ikaa le moono mɔ mɔsɛngɛ, ne moongwe boa bwaanga awɛ.

⁵ Kɔ bɔbɔ, mwifɛkɛɛnyɛ kokondoa byaachi ko lea iekekeo linu, ne ku bia byaachi binu kokondoa lokani, ne ko lokani lwinu kokondoa bichebe,

⁶ ne ku bichebe kokondoa kwikɛnga ne bwabea, ne ku kwikɛnga ne bwabea kokondoa kokemya motema, ne ko koa kokemya motema kokondoa koketa bitokonda Kakua.

⁷ Ne ku bia bitokonda Kakua, mokondoe kokonda babotwa niinu, ne ko kokonda babotwa niinu mokondoe, kokonda.

⁸ Kɔ kɔmɔa, ingɛ moe na bibi biisɛ bikete ne koketa bɔtɔɔcha abyo, bitabakwase kokamba ne koya kombaa ko kocheba Mwaame wiito Yɛsu Kilisito.

⁹ Mondo otaasi na bia bikete byaachi, oe ne bye mbufu, ɔtɔmɔa ne biemo bye bwiyebwiye naakɛ, osoebeela itɛ waasia kɔɔyiwa ko bwabea bwakɛ bwe kaɛ.

¹⁰ Kɔ bɔbɔ, ee babotwa naanɛ, Kakua wabasɔbɔa ne kobaitana. Kɔ bɔbɔ mwifɛkɛɛnyɛ kɔmɔa maa makomo mamɔɛkɛ maachi, ne mwasoketa bobo, mokaingee mo bwabea naa nabo.

¹¹ Ko koketa bɔbɔ, motasaolelwe paa paa kwingea mo boombe bwe meombo bwa Mwaame ne Moolochi witu Yɛsu Kilisito.

¹² Ne ko bobo, sikakɔɛkɛ masu masɛ komoeyoa baanu maa makomo, ɔbɛɛ muusia komacheba, ne kwisekemeka mo makomo me kiinɛkinɛ maokonja baanu.

¹³ Natɔmɔa itɛ, bie bwaachi nabaeyoaye maa makomo bokee mee mwɛchɔ kɔmɔa momachombwee ngani chiinu.

¹⁴ Kɔmɔa natocheba itɛ keeko kwaanɛ kingaolea, boa bombangwechee Mwaame wiito Yɛsu Kilisito.

¹⁵ Ko bobo, ndakete kɔ bɔkɛtɛ bwaanɛ bɔɔsɛ kɔbaɛcha njea yee baanu koeyokaya mama makomo masu masɛ kɔmɔngɔ kwe kokwa kwanɛ.

Baa bamɔa boombe bwa Kilisito

¹⁶ Abaeyecha bae kombanga yee ilɔngɔ lyɛ bɔkɛtɛ bwa Mwaame wiito Yɛsu Kilisito, ne kombanga yee kɔɔtɔka kwakɛ, ndetwakamba ne ngano che manu chaanga bando kwiketea ne ngani chabɔ. Bae bɛɛnɛ twaimɔɛna kɔ bɔkɛtɛ bwakɛ.

¹⁷ Kiinɛkinɛ Tati wiito Kakua, wamɔɛcha bɔnyɛmu ne boombe, aɔcha chuuki lya Kakua oe ne boombe lyaɔcha itɛ: «Ona ne Mwaana waanɛ otokonda mee, awɛ ne ɔtɔmɛma naanɛ!»

¹⁸ Lea chuki, lyatoka kwiyoo, twaliungwa bae bɛɛnɛ, alya abɛchaya bae na Yɛsu ko keembe kya ama.

¹⁹ Kabee, tutwimenya kiinɛkinɛ makomo matɔɔcha ndɛnda cha Kakua. Kende na baanu motabɛ mo komanyɛmya, mɔtabɛ mo koketa bwaachi. Kɔmɔa maa makomo mae ne bwe mumunɛ otokɛnya mwikunyɛ ɛka alya otamɔɛkɛ sɔkɔta yee mambombe mometema yiinu.

²⁰ Kombaa kwe biisɛ, bibi ne bitokoka baanu kocheba: kuusi mondo otaɔsɔnɛ awɛ ikɛɛsa kocheba kɔyɔɔla bitokonda kɔɔcha Tuchimba Twa Ama.

²¹ Kɔmɔa, kuusi ndɛnda naa ne ɛmɔɔsa yaɛchiwa ikomo ko kokonda kwe mondo naa nɛwɛ. Bando babɛɛ mɔ kɔɔcha makomo mekotokea kwa Kakua koetea bɔkɛtɛ bwe Motema wa Ama.