1 Timɔtɛɔ 5 - Zimba Nouveau Testament Portions

Mitindɔ ye baimenyi

¹ Ndakokandokea banunu, baana bwe tati wao; aana bitekoa bwe babotwa,

² babakachi banunu bwe nɛnɛ, baa bakee totombe bwe metamba, ne kwilɔla ne bwabea bɔsɛ.

³ Nyɛmya balyangɔ bae balyangɔ be kiinɛkinɛ

⁴ Kende mwalyango oe ne baana ne ngoko, baieyeche kombaa kwe biisɛ kɔnyɛmya nɔngɔ yaabɔ, ne koana ko bababota, kɔmɔa lele ikomo ne lyaachi ne litwimenyewa na Kakua.

⁵ Olya oe mwalyango kiinɛkinɛ ne kosangamekewa ikɛɛsa oe mo kobekea Kakua iekekeo lyaakɛ, ne oe mukuiyaya butu ne chooba.

⁶ Kɔmɔa olya otaemanee kokonda mɔsɛngɛ ususia kokwa okee mwɛchɔ.

⁷ Balaa mama makomo babundewaya ne bwabea.

⁸ Kɔ bɔbɔ, kende mondo ndasanga nɔngɔ yaakɛ, kɛtɛchɛ baa bae mo ndabo yaakɛ bɛɛnɛ, ɔsɔɔna iekekeo ne awɛ ne wa bea koeta olya otaasi ndinaimenya imenya.

⁹ Mwalyango ndakunyewaya chiina kende ndiinakokya meaka makumi mosambo, ne awɛ oongwe mokachi we moome ɔmɔɔsa.

¹⁰ Na awɛ utuindoeka mubikete byaachi, kende otokongoseka baana, kende ɔtɔsɛkɛɛla bɛni, kende ɔtɔɔya meende yee ngambi cha Kakua, kende otoyeela bae mo manɛnɛ, kende otoketa bikete biisɛ byaachi.

¹¹ Balyangɔ bataasi bana nuna, ikandea kukunya maina mabɔ, kɔmɔa kende basokonda kɔsɔngwa, batakɔnɛ kokambea Kilisito.

¹² Naabɔ batamɔɛ manɛnɛ kɔmɔa basɔlɛkɛa iekekeo lyabɔ lye kombaa.

¹³ Ne ko boa, batwibeka ne kitufu mo kochomba ndabo ko ndabo, ne nde kitufu bokata ne kosambya ne bɔɔcha ɔsɔɔcha ne kɔsɔngɛkanya bando ne matɛnda.

¹⁴ Ne ko boa natokonda balyangɔ bataasi baananuna basɔngwɛ, babote baana, bakongoseke baana babɔ, basielaya moangani iboa lye kobatɔnda:

¹⁵ Kɔmɔa bakinɛ bausia kutuuluka ne koyea Isombo.

¹⁶ Kende mwamoome ɔbɛɛ mwamokachi ususia kwimenya Kilisito oe ne balyangɔ ɔbatɛndɛɛ, kanisa kabaenda kɛnyɛmɛnɔ, kɔmɔa katɛndɛɛ baa bae balyangɔ kiinɛkinɛ.

Banunu mo ndabo ya Kakua

¹⁷ Banunu batɔɛnda bwaachi ne Ndabo ya Kakua, batowaena kokonja bɔnyɛmu ngongobwa chibee, kɛtɛchɛ baa batwikuula ne Ikomo lya Kakua ne koeyecha.

¹⁸ Kɔmɔa tuchimba tɔtɔcha: «Ndekuchiba kanwa ke ngombe kende yee mo kolya ngano», ne kabee: «Mokambi we meemo otowaena ikonja lyaakɛ.»

¹⁹ Ndwimenyaya ikomo lɛtɔɔchɛa abɔ mununu kende linasingeechwa ne tonwa tobee ɔbɛ totanu.

²⁰ Baa batoketa bwabea baemoka bokoo bokoo kombaa kwe bando basɛ, kɔmɔa baa bakinɛ baasɛ batene.

²¹ Natokolaa lele ikomo kombaa kwa Kakua, ne kombaa kwa Yɛsu Kilisito, ne kombaa kwe meombo ya sɔbɔiwa, keta bibi bitokosaolea mee kotasi kɔsɔbɔa, ndoketaya naa ne ikomo lɛmɔɔsa ko koenokya.

²² Ndɛkɔtɛchɛa mondo kɔbɔkɔ chaa chaa, ɔbɛɛ ndekwingea mo bwabea bwe bando bakinɛ, ibeka awɛ mwɛɛnɛ tɔɔ.

²³ Nde kɔsɔaya maache bokata, sɔa malu machiinini, ko mbanga yee ikundu lyao, ne bolwachi butukukuula masu mabua.

²⁴ Bwabea bwe bando bakinɛ bɔtɔmɔɛka paa paa naanga ne bunabamɔnya manɛnɛ, kobakinɛ bwabea bwabɔ botobayea kɔmɔngɔ.

²⁵ Bwakaɛboa bikete byaachi bitɔmɔɛka paa, ne bia bitaasi kɔmɔɛka, biikaisame.