1 Timɔtɛɔ 4 - Zimba Nouveau Testament Portions

Mwilɔlɛ ne baeyechi be manu

¹ Motema wa Ama ɔtɔɔcha paa paa itɛ: ko keeko kyɛ kɔbɔnga, bando babua bataye mɔsɛɛsɛ mwe iekekeo lyabɔ ne koyea metema yee manu ne maeyechi me masombo.

² Batɔɛngiwa ne bando be tobee tobee be manu ne bɛ mɛsɔna bae ne lokani lwasakwa.

³ Abɔ bae mokoeyecha itɛ bie byabea kotombana, ne batokandea bando kolya bimɔchi biewa. Kakua wasɛnga bia byekolya, kɔmɔa itɛ batumwimenya ne kocheba kiinɛkinɛ babilye kɔmɔngɔ kwe kobitwamboela.

⁴ Kɛsɛ kyasɛnga Kakua kee kyaachi, na bono kuusi naa nɛ kɛmɔ kinakɔniwa, bie bwaachi koketwamboela kombaa kwe kokelya.

⁵ Kɔmɔa, koetea njea yee Ikomo lya Kakua ne lye kuiyaya, byekolya bisɔɔywa kombaa kwakɛ.

Mokambi mwaachi wa Kilisito

⁶ Ingɛ otabasaolee paa paa babotwa nao maa makomo, otabɛ mokambi mwaachi wa Kilisito Yɛsu, otolesiwa kemotema ne makomo me iekekeo, ne maeyechi maachi me kiinɛkinɛ ma uungwa awɛ.

⁷ Kɔna ngano che manu chie mɔ kɔsɛsɛkana ne iekekeo. Iyobecha mɔ kɔnyɛmya Kakua ku kiinɛkinɛ.

⁸ Kwiyobecha kɛlɔkɔba koe kwaachi, koe ne biemo bichiinini, kwisambya nɛ kɔnyɛmya Kakua koe kwaachi ku biisɛ, kɔmɔa kɔtɔtɔɛcha ilai lye mwɛchɔ we leno la olya wakabaka.

⁹ Lɛlyɔ ikomo lee ne lye kiinɛkinɛ, nalyo leengye kwimenyiwa ne basɛɛ.

¹⁰ Nɛ kɔbɔ kutuikuula bae ne kuchiana, kɔmɔa toe mo koekekea Kakua oe nɛ mwɛchɔ, oe Moolochi we bando basɛ, nɛ kɛtɛchɛ Moolochi we batuimenya.

¹¹ Maa ne makomo maengye awɛ kusiela ne koeyecha.

¹² Ndekwilɛkɛa kɔnyɛkiwa ne mondo ɔɔsɛ kɔmɔa okee muulwa. Ongwa keeyeo ko batuimenya: kɔ mɛɔcha, ko kokonda, ko iekekeo, ku bikete byaachi, ne ko kuikɛnga ne bwabea bɔsɛ.

¹³ Mo koendecha akabaka mee, itendemeka mɔ kɔyɔɔla Tuchimba twa Ama, mo kuisinga ne mo koeyecha.

¹⁴ Ndɛkɔkɔɛka kokambekya bɔkɛtɛ bwe Motema boe monda mwao, bwakonja awɛ koetea byaɔcha Ndomwa cha Kakua, ne ko njea yee kokobekea manja me ketongo ke bakoo ke Kanisa.

¹⁵ Keta bia biisɛ, bitɛcha momotema wao. Alya bando basɛ batamɔɛ botoya awɛ kombaa.

¹⁶ Ilɔla awɛ mwɛnɛ ne maeyechi mao. Ndɔlɛkɛaya bibi biemo. Kɔmɔa ingɛ osoketa bɔbɔ otaiolole awɛ mwɛnɛ, ne koolola baa bae mo kukuungwa.