1 Timɔtɛɔ 3 - Zimba Nouveau Testament Portions

Batoemanea Kanisa

¹ Lele ne ikomo lye kiinɛkinɛ: kende mondo otokonda koongwa mokoo mo kanisa, osokonda moemo mwaachi.

² Bitokoka ko mondo oe mokoo mo Kanisa koongwa otaasi koyembokelwa, moome we mokachi ɔmɔɔsa, ngoli we lokani, wɛ nyɛnyi, ɔtɔsɛkɛɛla bando ne otocheba koeyecha

³ Ndaongwaya ngɔlwa ɔbɛ we muuma, oongwe waɔla ne nyaa; Ndaongwaya we kokonda tombaambaa;

⁴ Oongwe ne bɔkɛtɛ bwe koemanea bwaachi ndabo yaakɛ, ne baana bakɛ batɔmɔnyɛmya kwe kiinɛkinɛ.

⁵ Chɔ, kende mondo ndaacheba koemanea ndabo yaakɛ, booni botaɔsɔnɛ awɛ koemanea Kanisa ka Kakua?

⁶ Ndaongwaya mukilisito moyamoya, sanga waenda maɛka ne koolea mo kokea bwe Isombo.

⁷ Otowaena kɔnyɛmiwa bwakaɛ ne bataasi kokonda Kakua, kɔmɔa ndalɛngaya ne kokea mo kalɛbɔ ka Isombo.

Ngambi che meemo yee Kanisa

⁸ Ngambi che meemo yee Kanisa naabɔ batokoka kɔnyɛmiwa Ndɛɛkɔ bando be tobeetobee; baiɔnaya ne malu ɔbɛ koenga ikonja mo njea chitaasiko,

⁹ Oongwe mu kubunda ngoo kiinɛkinɛ ketoba muiyekekeo lya Kilisito ne lokani lwe kiinɛkinɛ.

¹⁰ Bie bwaachi otaɛlɛkiwa, kende ndaasi ne kangɔnjɔ, alya otakambe meemo yee Kanisa.

¹¹ Bakachi babɔ bwakaɛ baongwe nɛ bɔnyɛmu, ne kuikɛnga ne mɛɔcha ya bea; baongwe ngɔli, Ndɛɛkɔ ku biisɛ, be tobee tobee.

¹² Bitokoka ko ngambi yee meemo yee kanisa koongwa ne mokachi ɔmɔɔsa, oe ne bɔkɛtɛ bwe koemanea bwaachi baana bakɛ, ne ndabo yaakɛ ɛsɛ.

¹³ Ngambi che meemo yee kanisa chitokamba bwaachi batoendwa ne bɔnyɛmu ne bando basɛ ne batɔɔcha ne bɔkɛtɛ bwe iekekeo lito tukumbakanya amɔɔsa na Kilisito.

Mbango che kɔɛnda nɛ nɔngɔ ya Kakua

¹⁴ Nasukukunyea ona mokanda, ne natobaela koya kwakɔmɔɛ ano ano.

¹⁵ Ko boa, ingɛ sakobanga ano ano, toto tuchimba totakoangoeche boni botaɛndɛ awɛ mo ndabo ya Kakua, ne kɔɔcha itɛ: Kanisa ka Kakua oe mwɛchɔ, kae mɔtɔndɔɔ ne ikako bye kiinɛkinɛ.

¹⁶ Iinde, kuusi koangecha, bisobooliwa mwiyekekeo lito bie bikataa! Kilisito, wabaaka bwe mondo, na kobooliwa ne Motema wa Ama na kɔlɔliwa ne meombo, ilɔngɔ lyaakɛ na kochebekana kɔ mɛsɛngɛ ɛsɛ, babua mɔ mɔsɛngɛ na kumuimenya, awɛ na kokobechwa ko boombe bwe meombo.