1 Timɔtɛɔ 2 - Zimba Nouveau Testament Portions

Lusielo ku kwiyaya

¹ Kombaa kwe biisɛ, nasobasaolea itɛ, kɔɛngɛa kwa Kakua ne kwiyaya ne kwisingea ne koeyoka byabaketea awɛ koketeke kombanga yee bando basɛ.

² Bie bwaachi twiyaye ko mbanga yee nombe ne yee binombe; ngɔmɔa tuchikae nyaa mu kuisambya nɛ kɔnyɛmya Kakua ne mesako myaachi.

³ Na lea ikomo ne lyaachi ne lye kwimenywa na Kakua, Moolochi wiito,

⁴ otokonda bando basɛ baololwe ne kocheba kiinɛkinɛ.

⁵ Kɔmɔa, koe Kakua ɔmɔɔsa, ne otosambya ɔmɔɔsa asambea Kakua ne bando, na olya mondo ne Kilisito Yɛsu.

⁶ Wailamboa awɛ mwɛɛnɛ boe keochwa ko koolola basɛ. Lele ne ikomo lɛsɔɔchiwa kokee kyanya.

⁷ Kɔ bɔbɔ ne kobekiwee mee koongwa monande ne ndomwa, ko koeyecha bibɛɔ bitaasi Bayula iekekeo ne kiinɛkinɛ. Sitɔɛnga, natɔɔcha bye kiinɛkinɛ.

⁸ Ko bobo, natokonda bando baiyaye kwa Kakua mo maboa masɛ, mo kosakoa mabɔkɔ ma ama kwiyoo, kotasi moemo ɔbɛɛ meango.

⁹ Kabee natokonda baabakachi babwae biwalwa bye kwinyɛmya. Bie bwaachi baibweke nɛ nyɛnyi, ne kwikɔbɔa. Ndɛɛkɔ ko abɔ ko kooka mitindɔ yee soke yee kaechaecha, yee pauni, ɔbɛɛ yee masanga, ɔbɛɛ yee ngubɔ che ibei lya koba.

¹⁰ Baongwe ne bikete byaachi, botowaena abyo ko baabakachi batɔnyɛmya Kakua.

¹¹ Mwamokakachi oengye kuungwa maeyechi mo nyaa nɛ kɔnyɛmya byɛ sɛsɛ.

¹² Sitɔɛcha mwamokachi iboa lye koeyecha, ɔbɛɛ lye konyaa mwamoome, uchikae nyaa.

¹³ Kɔmɔa Alamu ne wasɛngiwa we kombaa, kɔmɔngɔ na Awa.

¹⁴ Alamu ndaɛngiwa, waɛngiwa ne mwamokachi ne akea awɛ mo bwabea.

¹⁵ Mwamokachi otaoloke koetea kobota baana, ingɛ usuchikaa mu iekekeo, mo kokonda, mo koama motema ne kwikɔbɔɛla.