1 Pɛtɛlɔ 5 - Zimba Nouveau Testament Portions

Maani ko bakoo be Kanisa

¹ Ano natokonda koana banunu be Kanisa bae mwingya baanu. Na mee bwakaɛ ne mununu munjininu, naimɔɛna mee mwɛɛnɛ manɛnɛ ma Kilisito, na mee ndaisambye ko boa boombe bwa Kilisito boa bɔtamɔɛsɛ Kakua kɔmɔɛsa bando.

² Natwiyaya kwinu, mosangaye bwaachi kea ketongo kebaɛchɛɛ Kakua, boa botosanga mosangi mokomba waakɛ, ndɛɛkɔ ko kenganga, bitokee kwibae linu koetea kokonda kwa Kakua. Ndekokambaya ne motema we kokonda byɛndɔ, mokambaye ne metema myaachi.

³ Elya ndongo ɛkɔɛchɛɛ Kakua, ndekomeemanea ko kenganga, mɔbɛ kɛlɔlɛɔ kwabɔ.

⁴ Ne akabaka Mosangi Mokoo, motakonje kekombo kye boombe ketaasi kekaɔnɛkɛ.

⁵ Na baanu miulwa, mɔnyɛmyayɛ banunu. Banu basɛ, mɔbɛ mukwiikya asambea banu, kɔmɔa Tuchimba Twa ama twaanga kɔɔcha bobo: «Kakua ndatuungwana ne be muuma, waanga mwaachi ko batwiikya.»

⁶ Ko bobo, mwiikye kombaa kwa Kakua oe nɛ bɔkɛtɛ, ko kobatombekaya ko keeko kyaachi.

⁷ Momobeseaye mayombe miinu masɛ kɔ kɔmɔa awɛ ne otomosanga.

⁸ Mɔbɛ ne lokani ne kuchiboa miisɔ, kɔmɔa Isombo, moangani niinu oe mo kochomba chomba boe ndambwe ototokoa mo koenga otakubukee naani.

⁹ Muchianayɛ naakɛ, moemae ngoo mu iekekeo. Mo kocheba itɛ mɔ mɔsɛngɛ ɔɔsɛ, babotwa niinu bae mo kokonja manɛnɛ boe mamɔ.

¹⁰ Motakonje manɛnɛ mo keeko kichiinini, Kakua oe ne lokwa lɔsɛ wabaitana koongwa naakɛ amɔsa mo boombe bwakɛ bwe meombo, mu kwisambya kwinu na Kilisito. Awɛ mwɛɛnɛ otababeke kabee bando batowaena, ne kobaemeka mu iekekeo, ne kobakimya metema, nɛ kɔbaɛbɛcha bɔkɛtɛ bwe kobatendemeka ngoo.

¹¹ Awɛ mwɛɛnɛ ne oe ne bɔkɛtɛ meombo ne meombo. Biibɛ bɔbɔ.

Kolaana

¹² Nasobakunyea ona mokanda waiyea mo kokwasiwa ne Sila otokwata mee bwe mobotwa naanɛ we kiinɛkinɛ. Natokonda kobatɛcha motema ne kobasaolea itɛ makomo batɔɔcha ko mbanga yee lokwa lwa Kakua nɛ mɛ kiinɛkinɛ, ko bobo moenaya kwibeka moe amɔ.

¹³ Bakilisito be Kanisa ke Babɛli, basɔbɔiwa na Kakua boe banu, basobainokea. Bwakaɛ, Malikɔ, mwaana waanɛ we iekekeo, osobainokea.

¹⁴ Mwinokeane banu bɛɛnɛ na bɛɛnɛ nɛ kɛmɛmɔ. Nyaa ɛbɛ niinu baanu bando basɛ ba Kilisito.