1 Pɛtɛlɔ 3 - Zimba Nouveau Testament Portions

Maani ko baabakachi ne baa baome

¹ Banu baabakachi, mɔnyɛmyayɛ baome binu, ko bobo ingɛ koe asambea abɔ bamɔchi bataasi banaimenya Ikomo lya Kakua, mobaote ku kwimenya, koetea bikete binu byachacha kotasi kobasaolea keemo.

² Bataotwe ingɛ basɔmɔa bikete binu myaachi ne byɛ bɔnyɛmu.

³ Kwikɛnyɛkya kwinu, koongwaya ikɛɛsa kwe kwibeka baachi kɔnjɛ bwe, kookiwa soke che kesabya, kowaa biwalwa bye ibɛi lekoo, ne kobwaa biemo bikinɛ bitɔsɛngwa ne pauni.

⁴ Kwikɛnyɛkya kwinu koongwe kwe monda mwe motema kotasi kookaɔnɛkɛ. Bie bwaachi kɔkɔ kwikɛnyɛkya kwinu kɔbɛ kwe monda mwe motema we nyaa ne wɛ bɔɔlɛ bitobaekwa ne ibɛi lekoo kombaa kwa Kakua, kabee ndebyakaɔnɛka.

⁵ Kɔmɔa bɔbɔ ne bwaketa baabakachi baimenya Kakua ne komoekekea, boa ne bwaangwecha abɔ kɔkɛnya kwabɔ mɔ kɔnyɛmya baibabɔ.

⁶ Bɔbɔ ne bwanyɛmya Sala kɔnyɛmya Abulaamu, na kumwitana «mwaame». Baanu ne meseka yaakɛ ingɛ mooketa byaachi kotaasi kotena kekangecha kɛsɛ.

⁷ Bwakaɛ bwakaɛ, baanu baa baome, muchikanaye ne bakachi binu mo kocheba itɛ baasi nɛ mwɛchɔ boe baanu. Motowaena kɔbaɛcha bɔnyɛmu kɔmɔa abɔ bwakaɛ Kakua ɔtabaɛchɛ mwɛchɔ we meombo amɔsa niinu. Moketaye bobo kwiyaya kwinu kuuchibelwaya kombaa kwa Kakua.

Kokonja manɛnɛ ko mbanga yee kiinɛkinɛ

⁸ Kɔ kɔbɔnga, banu basɛ moongwaye ne lokani lɔmɔsa, kabee mungwanee lokwa, mokondane bwe bae ne iekekeo lɛmɔɔsa, mɔbɛ bando bae ne lokwa ko bakinɛ, ne baɔla.

⁹ Mɔɔtɔsɛanaya bwabea ko bwabea, ɔbɛɛ Bitɔndɛ ku bitɔndɛ, mɔɛngɛanɛ kaowe baanu ko baanu, kɔmɔa ku bia ne kobaitanee Kakua itɛ mokonje kaɔwɛ.

¹⁰ Kɔmɔa Tuchimba Twa Ama twaanga kɔɔcha itɛ: «Otokonda kɔmɔa masu maachi, ne koongwa nɛ kɛmɛmɔ mo masu maakɛ, uchibee kanwa kaakɛ kaɔchaya makomo mabea ɔbɛɛ kɔɔcha manu.

¹¹ Oongwe mo kochoka bwabea ne koketa bwaachi, oenge nyaa masu masɛ.

¹² Miisɔ ma Mwaame maanga kɔlɔla bando batoketa bwaachi, ne matwe maakɛ matuungwa kwiyaya kwabɔ. Batoketa bwabea, Mwaame ndatokonda baete kombaa kwe miisɔ maakɛ.»

¹³ Naani otabaketee bwabea ingɛ moe ne motema otobasukua koketaya bwaachi?

¹⁴ Naa ne mokonja manɛnɛ ko mbanga yee kiinɛkinɛ, baanu ne baenoka. Mɔɔbɛchaya mo kotena bando ɔbɛɛ lokani lwinu loomwaokanaya.

¹⁵ Mosekaye Kilisito mo metema yiinu bwe Mwaame. Mwisangyaye kosaolea mondo ɔɔsɛ otomobocha ku bitobaela baanu.

¹⁶ Moongwaye mo kobaamboa kwe bɔɔlɛ nɛ bɔnyɛmu. Kabee mooketaya bwabea saanga mwaibɛcha mometema yiinu ko, mwasoketa bobo, batobainyekechea makomo ne kɔbatɔnda ku bikete binu byaachi, koetea koongwa kwinu amɔsa na Kilisito, bataungwe masɔni.

¹⁷ Kɔmɔa, kokonja manɛnɛ ko koketa byaachi, indee, ingɛ ne kokonda kwa Kakua ne bwaachi kokoea kokonja manɛnɛ ko koketa byabea.

¹⁸ Kɔ bɔbɔ, Kilisito wakwa nɛ lɔmɔsa ko bwabea bwito. Awɛ ndaba ne bwabea naa nabo, awɛ na kokwea bando be bwabea, kɔmɔa obabeese kwa Kakua. Wakwa kɛ lɔkɔba, kɔ bɔkɛtɛ bwe Motema wa Ama wakonja kabee mwɛchɔ.

¹⁹ Koetea olya Motema, wayaka kwaeyeche Ikomo lya Kakua ko metema ee mo kekako,

²⁰ Elya metema ne yee bando bakɔna kɔnyɛmya Kakua kaɛ, abaendecha awɛ, mo keeko kyasɛngaya Nɔa bwaato bwanaka. Bando moanda ikɛɛsa ne baingea amo ne kooloka mo maache.

²¹ Ko boa maa maache matoeyana ne kwiniwa mbuu kotobaolola baanu leno. Koa kwiniwa mbuu kuusi kwɛ kɔɔya ikɔya lye lɔkɔba, koe ne njea yee koketa isamba na Kakua mo lokani lwaachi. Kabee koa kwina mbuu ne kotobaolola banu koetea njea yee kuubuka kwa Yɛsu Kilisito.

²² Oona Yɛsu Kilisito wausia konena kwiyoo, ano utuchikaa saa ndome lya Kakua, mo konyaa meombo ne bakoo ne bae ne boombe kwiyoo.