1 Pɛtɛlɔ 1 - Zimba Nouveau Testament Portions

Mɔyɔ

¹ Mee Pɛtɛlɔ, ndomwa ya Yɛsu Kilisito ne utukunya ona mokanda. Natobakunyea baanu basɔbɔiwa na Kakua, ne bamwaokana mɔ mɔsɛngɛ we Pɔntɔ, ne we Kalatia, ne we Kapalɔkia, ne we Asia ne Bitinia.

² Isito wa Kakua wabasɔbɔa kaɛ koengama ne kokonda kwakɛ. Osobaketa koongwa bando bakɛ koengama ne Motema wa Ama, kɔmɔa mɔnyɛmyayɛ Yɛsu Kilisito ne kɔɔywa koetea masi maakɛ. Kakua ɔbɛchaye mokobaenoa ne kɔbaɛcha nyaa ya bua.

Kobaela Kakua

³ Toelelekaye Kakua, Isa Mwaame wiito Yɛsu Kilisito! Koetea lokwa lwakɛ lwabua, ɔsɔtɔɛcha mwɛchɔ moyamoya ko njea yee kuubua Yɛsu Kilisito. Kɔ ɛyɔ njea tosokonja ibaechi le meombo.

⁴ Kabee totoendecha koenoka kwito kotokee kwa Kakua kwabekea awɛ bando bakɛ. Koa koenoka kwasotobekea awɛ kwiyoo. Koa kokabɔɛ ɔbɛɛ kubunda ikɔya ɔbɛɛ kununa.

⁵ Koetea lea iekekeo linu Kakua oe mo komosanga kɔ bɔkɛtɛ bwakɛ itɛ obaolole. Koa kooloka kɔtamɔɛkɛ ku lusu lwe kɔbɔnga kwe mɔsɛngɛ.

⁶ Kɔ bɔbɔ muungwe nɛ kɛmɛmɔ, naanga ne botakonje baanu manɛnɛ mo keeko kichinini koetea kɔɛlɛkiwa kwe mitindɔ ya bua.

⁷ Mamɔ manɛnɛ ne me kɔɛlɛkiwa kwe iekekeo linu. Pauni ne keemo kyaanga kɔɔnɛka, ɔbɛɛ bɔbɔ, ɛtɔɛlɛkiwa ko njea yee kutumbwa ko toya. Nalyo Iekekeo linu lee ne ibɛi lekataa koeta pauni, letowaena kɔɛlɛkiwa kɔmɔa lɛmɔɛkɛ lye kiinɛkinɛ. Bibyɔ ne bitakete mokonje boombe, nɛ bɔnyɛmu akamɔɛka Yɛsu Kilisito.

⁸ Baanu motomokonda Yɛsu naa ne muunamɔmɔa. Ne mutumwimenya naa ne mɔɔtɔmɔmɔa leno, Ne monganda mwa bɔbɔ, mɔtɔtɛcha tɔsɛɛmbwɛ totaasi kochebekwa.

⁹ Moe ne kɛmɛmɔ kyabua kɔmɔa, mookonja keemo keengee iekekeo linu, na ne kooloka kwinu.

¹⁰ Ndɛnda chaenga kocheba kiinɛkinɛ makomo me koa kooloka. Abɔ na kɔɔcha kombanga yee makomo maikichi Kakua kɔbaɛbɛcha.

¹¹ Motema wa Kilisito wabɛa monda mwe chia ndɛnda, waiyambeela kɔɔcha ko manɛnɛ matakonje Kilisito, ne boombe botabaake kɔmɔngɔ kwe manɛnɛ maakɛ. Naacho chia ndɛnda chiifɛɛlɛkɛɛ kocheba mo keke keeko ne mo meke njea etaolee mamɔ makomo.

¹² Kakua wachebekya chia ndɛnda chaakɛ itɛ, olya mosao wasaola abɔ uusi kɔɛbɔ ikɛɛsa, wabɛa ne kwinu. Leno, ɔyɔ mosao, mosomocheba ne koetea baa baeyechi bɛ Ilɔngɔ Lyaachi, kɔ bɔkɛtɛ bwe Motema wa Ama watomwa kotoka kwiyoo. Lɛlyɔ Ilɔngɔ naa meombo etoenga kolecheba.

Koongwa ne bikete byaachi

¹³ Kɔ bɔbɔ, mwipangye ko kokambekya lokani lwinu. Mɔbɛ miisɔ ne kobeka ibaechi linu lɛsɛ ko kaa kaowe katakonje baanu atamɔɛkɛ Yɛsu Kilisito.

¹⁴ Mɔbɛ mo koeleleka Kakua, mɔɔtɔkɛaya kabee ngani chiinu chabea chabɛchaya niinu kaɛ kaɛ, abɛchaya banu mokee mɔ bɔɔku.

¹⁵ Bwakaɛ boa boe Kakua wabaitana wa ama, na baanu kabee moongwe ba ama mu bikete binu biisɛ.

¹⁶ Kɔmɔa Tuchimba Twa ama twaanga kɔɔcha itɛ: «Mɔbɛ ba ama boe mee wa ama.»

¹⁷ Mu kwiyaya kwinu mutumwitana «Tati» olya waanga kɔbɛmba makomo me mondo kotaasi kɔɛyamɛa loosa, koetea lokani lwe mondo, ko boa bokee baanu mo ono mɔsɛngɛ bikete binu biangweche itɛ mɔtɔmɔnyɛmyɛya.

¹⁸ Motocheba itɛ bikete bya basiela baisinu mokoo, byaanga bye bokata. Kabee motocheba itɛ Kakua ndabaolosa koetea biemo bitɔɔnɛka boe pauni ɔbɛɛ mitali.

¹⁹ Wabaolosa koetea masi me ibɛi lekataa ma Kilisito, wabɛa boe kyaana kye mɔkɔkɔ ketaasi nɛ kɛɛma ɔbɛɛ ne ikɔya.

²⁰ Olya Kilisito, Kakua wamɔsɔbɔa kombaa kwɛ kɔsɛnga mɔsɛngɛ, na awɛ na kɔmɔmɔɛsa kombanga yiinu, ko keno keeko kyɛ kɔbɔnga.

²¹ Ko njea ya Kilisito, banu musuimenya Kakua wamuubua kotoka ko bakwo nɛ kɔmwɛcha boombe. Ko bobo mutwimenya Kakua ne komobaela.

²² Baanu muusia kosokoka ko njea yee kɔnyɛmya ikomo lye kiinɛkinɛ, kɔmɔa moongwe mo kokonda babotwa niinu mu iekekeo kotasi koongana. Kɔ bɔbɔ mɔbɛ mo kokondana byabua ne motema wiinu ɔɔsɛ.

²³ Mususia koboteka bayabaya koetea Ikomo lya Kakua. Lea Ikomo, liisi bwe kamuka katɔbɔa. Akɔ kae mwɛchɔ, ne kakabɔɛ ne katachikae meombo ne meombo.

²⁴ Kɔmɔa Tuchimba Twa Ama twaanga kɔɔcha itɛ: «Bando basɛ bae ne bwe bisɛsi, Ne boombe bwabɔ bɔɔsɛ boe ne bwe maloba. Bisɛsi bitooma ne maloba matokea.

²⁵ Ikomo lya Mwaame alyo, lituchikaa meombo ne meombo.» Na lee Ikomo ne Ilɔngɔ Lyaachi lyasaolelwa banu.