1 Yɔana 4 - Zimba Nouveau Testament Portions

Ndɛnda che manu nɛ ndɛnda che kiinɛkinɛ

¹ Ee ngondwa chanɛ, mwimenyaya ɔɔsɛ ne motema, kombaa nɛ kɔmɛɛlɛka ko kocheba ingɛ ee metema etotoka kwa Kakua, kɔ kɔmɔa ndɛnda chabua che manu chisoolea mɔ mɔsɛngɛ.

² Mɔlɔlɛ botachebe banu Motema ototoka kwa Kakua: ne motema ɔtɔɔcha itɛ Yɛsu Kilisito wabaka mɔ lɔkɔba oe ne motema wa Kakua.

³ Ne ɔɔsɛ motema otaasi utwindoa Yɛsu, uusi wa Kakua, oe ne motema we moangani wa Yɛsu, uungwee banu itɛ otoba, na leno otae mɔ mɔsɛngɛ.

⁴ Banu, baana bakɛɛkɛ, moe ne ba Kakua ne moobakoela. Kɔ kɔmɔa oolya oe monda mwiinu oe mokoo koeta oolya oe mɔ mɔsɛngɛ.

⁵ Abɔ bae bɛ mɔsngɛ; ne batɔɔcha bwe bando bɛ mɔsɛngɛ nɛ mɔsɛngɛ otobaungwa.

⁶ Bae toe ne ba Kakua, oolya otocheba Kakua ututuungwa; olya otaasi wa Kakua ndatutuungwa. Ko bobo ne kotachebe bae koni koe Motema we kiinɛkinɛ na koni koe motema we manu.

Kokonda kwe kiinɛkinɛ ne kokonda kwe manu

⁷ Ngondwa chaanɛ, tokondane bae bɛɛnɛ kwɛ bɛɛnɛ; kɔmɔa kokonda koe ne kwa Kakua, nɛ ɔɔsɛ otokonda, ooboteka na Kakua ne otocheba Kakua.

⁸ Olya otaasi ndatokonda, ndaacheba Kakua, kɔmɔa Kakua ne kokonda.

⁹ Kokonda kwa Kakua kwamɔɛka mwingya mwiito koetea boa bwatoma awɛ Mwaana waakɛ ɔmɔɔsa mɔ mɔsɛngɛ tokonje mwɛchɔ koe awɛ.

¹⁰ Koo ne kokonda; ataasi itɛ bae ne bakonda Kakua, ko boa bwatokonda awɛ na kotoma Mwaana waakɛ koongwa keochwa ko bwabea bwito.

¹¹ Ngondwa chaanɛ, kende Kakua ototokonda bobo, tokondane bae bɛɛnɛ kwɛ bɛɛnɛ.

¹² Kuusi wasɔmɔa Kakua; kende twasokondana bae bɛɛnɛ kwɛ bɛɛnɛ, Kakua oe monda mwiito ne kokonda kwakɛ koe monda mwiito.

¹³ Totocheba itɛ toe monda mwaakɛ na awɛ oe monda mwiito; kɔ kɔmɔa watɔɛcha Motema waakɛ.

¹⁴ Na bae twamɔa ne kusingeecha itɛ Tati watoma Mwaana waakɛ koongwa Moolochi wɛ mɔsɛngɛ.

¹⁵ Ɔɔsɛ utwimenya mo ndongo itɛ Yɛsu ne Mwaana wa Kakua. Kakua oe monda mwaakɛ na awɛ monda mwa Kakua.

¹⁶ Na bae twasocheba kokonda kwa Kakua ko mbanga yiito twasaimenya. Kakua ne kokonda, nɛ ɔɔsɛ otokonda oe monda mwa Kakua.

¹⁷ Ko eena njea kokonda kɔsɛ kɔsɔmɔɛka asambea bae. Ko boa toongwe ne kiinɛkinɛ ku lusu lwe mayombe, kɔ kɔmɔa mo ona mɔsɛngɛ toe boe Kilisito.

¹⁸ Bɔɔba buusi monda mwe kokonda kwe kiinɛkinɛ, kokonda kwe kiinɛkinɛ kwaanga kuchia bɔɔba, kɔ kɔmɔa bɔɔba botoangoecha keangaa kye kokonja manɛnɛ na oolya utuungwa bɔɔba ndaasi monda mwe kokonda.

¹⁹ Bae totokonda kɔ kɔmɔa awɛ watokonda kombaa.

²⁰ Kende mondo ɔsɔɔcha: «Natokonda Kakua», koko nɛ ɔtɔkɔna mobotwa naakɛ, oe we manu; kɔmɔa olya ɔtɔkɔna mobotwa naakɛ ɔtɔmɔa awɛ, booni botakonde awɛ Kakua otaasi awɛ ndatɔmɔa?

²¹ Na awɛ ɔtɔɛchɛɛ eena salia: ɔɔsɛ otokonda Kakua okonde mobotwa naakɛ.