1 Yɔana 3 - Zimba Nouveau Testament Portions

Baana ba Kakua

¹ Mɔlɔlɛ bwatokonda Tati bae koolea kuitanewa baana bakɛ! Ne bwee bae kiinɛkinɛ! Ndɛɛkɔ bando bɛ mɔsɛngɛ baatotocheba, kɔ kɔmɔa ndebamocheba Kakua.

² Ngondwa chanɛ, ano totae baana ba Kakua, botaongwe bae bunachebekana paa. Totocheba itɛ ataolee Kilisito, totaeyane naakɛ ko boa botamɔmɔɛ bae bɔɛwɛ.

³ Chɔ, ɔɔsɛ oe ne lee iekekeo monda mwa Kilisito uiamye boa bwe awɛ wa Ama.

⁴ Mondo ɔɔsɛ otoketa bwabea ne moangani wa Kakua, kɔ kɔmɔa koketa bwabea nɛ kɔɔna salia.

⁵ Banu motocheba itɛ Yɛsu Kilisito wabaaka ne kwaoche bwabea, ne monda mwaakɛ muusi bwabea.

⁶ Chɔ, ɔɔsɛ mondo oe naakɛ amɔɔsa ndatoketa bwabea; mondo otoketa bwabea ndanamɔmɔa ɔbɛɛ ndanamocheba.

⁷ Ee baana banɛ, mondo ndamoongaya! Mondo otoketa bye kiinɛkinɛ ne we kiinɛkinɛ boa bwe Kilisito we kiinɛkinɛ.

⁸ Olya waanga koketa bwabea ne wa Isombo. Kɔmɔa Isombo osoketa bwabea a kobangoa kwe biemo biisɛ. Ko bobo, Mwaana wa Kakua obee ne kwaɔnɛ meemo yee Isombo.

⁹ Ɔɔsɛ osoboteka na Kakua ndatoketa bwabea, kɔmɔa bɔkɛtɛ bwe mwɛchɔ wa Kakua otokamba monda mwaakɛ, boa boe Kakua Isakɛ, ndatowaena kabee koketa bwabea.

¹⁰ Bibi ne bitochebekya bwaachi baana ba Kakua ne baana ba Isombo, Mondo otaasi koketa makomo me kiinɛkinɛ ɔbɛɛ kokonda mobotwa naakɛ ndaasi Mwaana wa Kakua.

Kokondana

¹¹ Kokondana a kobangoa: tokondane bae bɛɛnɛ na bɛɛnɛ.

¹² Tɔɔbɛchaya bwe Kaini we mbanga ya Isombo, na kuchia mobotwa naakɛ. Awɛ wamuchia ko eke? Nɛ kɔ kɔmɔa bikete byakɛ byabɛchaya byabea ne bye mobotwa naakɛ byabɛchaya bye kiinɛkinɛ.

¹³ Chɔ ee babotwa naanɛ, mokanakanaya ingɛ bando be ona mɔsɛngɛ basɔmɔkɔna.

¹⁴ Bae totocheba itɛ tusubuusuka lokwo ne kokonja mwɛchɔ kɔ kɔmɔa toe mo kokonda babotwa niito. Otaasi kokonda oe ne monda mwe lokwo.

¹⁵ Olya ɔɔsɛ ɔtɔkɔna mobotwa naakɛ ne mochai, motocheba itɛ mochai ɔɔsɛ ndaasi nɛ mwɛchɔ we meombo monda mwaakɛ.

¹⁶ Bae tosocheba kokonda koetea bobo: Yɛsu Kilisito na kuimenya kokwa ku iboa lito. Na bae bwakaɛ totokoka ne kokwa ku iboa le babotwa niito.

¹⁷ Ingɛ mondo oe nɛ byɛndɔ mo ono mɔsɛngɛ, ɔsɔmɔa mobotwa naakɛ oe nɛ bɔɛnwa, nɛ ndɛɛchɛ komokwea lokwa, mondo boe oona otaɔchɛ itɛ otokonda Kakua?

¹⁸ Ee baana baanɛ! Kokondana kwito koongwaya kwɛ mɛɔcha bokata; koongwe ne kwe kiinɛkinɛ kɔtɔmɔɛka ku bikete.

Iekekeo kwa Kakua

¹⁹ Ko njea eena totachebe itɛ toe bando be kiinɛkinɛ, ne metema yiito etaike kombaa kwakɛ.

²⁰ Kɔ kɔmɔa naanga motema wiito ɔtɔtɔbɛcha, totocheba itɛ lokani lwa Kakua lotoeta metema yiito awɛ otocheba biisɛ.

²¹ Ee ngondwa chanɛ, metema yiito ingɛ ndeyatɔbɛcha, bae toe ne iekekeo kombaa kwa Kakua.

²² Totokonja kwakɛ biisɛ bitɔɛngɛa bae, kɔ kɔmɔa bae totobengya salia yaakɛ ne koketa bitokonda awɛ.

²³ Salia yaakɛ na ena: twimenye chiina lya Mwaana waakɛ Yɛsu Kilisito ne tokondane bae bɛɛnɛ na bɛɛnɛ bwatusiela Kilisito.

²⁴ Mondo otobengya salia yaakɛ oe monda mwaakɛ, na Kakua oe monda mwa olya mondo. Totocheba itɛ Kakua utuchikana monda mwiito ko njea yee Motema wa Ama watɔɛcha awɛ.