1 Yɔana 2 - Zimba Nouveau Testament Portions

Kilisito nɛ ɔtɔtɔɔchɛa kombaa kwa Kakua

¹ Baana banɛ, nasumukunyea maa makomo kɔmɔa mooketaya bwabea, kende mondo osoketa bwabea, toe na olya ɔtɔtɔɔchɛa kombaa kwa Isito. Olya ɔtɔtɔɔchɛa ne Yɛsu Kilisito, we kiinɛkinɛ.

² Yɛsu Kilisito ne keochwa kye kuchimya babea bwito, ataasi ko bwabea bwito ikɛɛsa, ne ko bwabea bwe mɔsɛngɛ ɔɔsɛ.

³ Totocheba itɛ twasomocheba, kende tosoketa salia yaakɛ.

⁴ Mondo ndasɔɔcha itɛ otocheba Kakua, koko ne ndatoketa salia yaakɛ, oe we manu, kiinɛkinɛ iisi monda mwaakɛ.

⁵ Olya otoketa bitɔɔcha Kakua, kokonda kwa Kakua koe monda mwaakɛ. Lee ne ikomo letoangoecha itɛ bae toe amɔsa na Kakua:

⁶ mondo ɔɔsɛ osamba na Kakua, uchikane boa bwaongwa Yɛsu mɔ mɔsɛngɛ.

Salia meyameya

⁷ Ee ngondwa naanɛ, sitobakunyea salia meyameya, eena ne elya yacheba baanu kaɛ kaɛ. Salia elya yee kaɛ, na lea ikomo lisuungwa baanu.

⁸ Kombanga ikinɛ salia eena etobakunyea mee ne meyameya, kiinɛkinɛ yaakɛ yee ne monda mwa Yɛsu ne monda mwiinu bwakaɛ. Kɔmɔa ikunyɛ lesoeta nɛ kyɛɛngɛ kye kiinɛkinɛ kɛɔ kɛnya.

⁹ Mondo ɔtɔɔcha itɛ oe mɔ kyɛɛngɛ, koko ne oe ne kekee ko mobotwa naakɛ, okee mwikunyɛ.

¹⁰ Olya otokonda mobotwa naakɛ, oe mɔ kyɛɛngɛ, kɔ bɔbɔ monda mwaakɛ muusi keemo kye komokechekya.

¹¹ Ona ɔtɔkɔna mobotwa naakɛ oe mwikunyɛ, oe mɔ kɔɛnda mwikunyɛ ndaacheba kotoya awɛ, ikunyɛ leomobeka mbufu.

Mbea yee koketa bitokonda Kakua

¹² Nasumukunyea ee baana banɛ, kɔmɔa bwabea bwiinu buuchima ku chiina lya Yɛsu.

¹³ Nasumukunyea baanu batati, kɔmɔa mosomocheba olya wabɛchaya kombaa kwe biemo biisɛ. Nasumukunyea baanu miulwa ne meseka, kɔmɔa mosokanga Isombo.

¹⁴ Nasumukunyea baanu baana bakɛɛkɛ kɔmɔa mosocheba Tati. Namukunyee batati kɔmɔa mosomocheba olya wabɛchaya a kobangoa. Nasumukunyea baanu miulwa ne meseka kɔmɔa moe nɛ mwɛchɔ wɛ mɛɔcha, ne Ikomo lya Kakua lee monda mwiinu, mosokanga Isombo.

¹⁵ Mookondaya mɔsɛngɛ, ɔbɛɛ biemo bie mɔ mɔsɛngɛ. Mondo ndaokonda mɔsɛngɛ, ndakaɔsɔnɛ kokonda Tati.

¹⁶ Kɔ kɔmɔa keemo kɛsɛ kee mɔ mɔsɛngɛ, bwe saki yɛ lɔkɔba, saki yee miisɔ, koongwa waikonda, bii biisɛ biitotoka kwa Tati, bitotoka nɛ mɔ mɔsɛngɛ.

¹⁷ Mɔsɛngɛ osoeta ne biemo byakɛ biisɛ, mondo olya oe mo koketa bitokonda Kakua oe nɛ mwɛchɔ we meombo.

Baangani ba Kilisito

¹⁸ Ee baana banɛ, keke ne keeko kye kɔbɔnga. Muungwee itɛ otoangecha bya Yɛsu otabee, na bono, batoangecha Kilisito basoolea. Ko boa tosocheba itɛ mɔsɛngɛ ɔsɔbɔnga.

¹⁹ Baa bando baotokea ne mwingya mwiito, ndebabɛa be ketongo kiito, kende bae niito amɔɔsa. Bautusia bichebekane paa paa itɛ ndebabɛa be ketongo kiito.

²⁰ Moe ne Motema wa Ama wamɔɛcha Kilisito, kɔ bɔbɔ baanu basɛ mosocheba kiinɛkinɛ.

²¹ Chɔ, samukunyea ku itɛ motocheba kiinɛkinɛ, nɛ kɔmɔa motocheba kiinɛkinɛ ne kuusi manu matotokea mu kiinɛkinɛ.

²² Ne naani we manu? Na olya ototona itɛ Yɛsu ndaasi Kilisito. Oona ne otoangecha Kilisito, kɔmɔa osoangecha Tati, na koangecha Mwaana.

²³ Olya osotona Mwaana, osotona Tati bwakaɛ, na olya uswimenya Mwaana, uswimenya Tati bwakaɛ.

²⁴ Kɔ bɔbɔ mɔɔngɛ mo metema yiinu mɛɔcha ya Kakua yaungwa baanu kombaa. Kende mɛɔcha yee a kobangoa yee monda mwiinu, banu bwakaɛ moe amɔɔsa ne Mwaana na Tati.

²⁵ Loo ne lusielo lwa Kilisito mwɛɛnɛ kutusiela: mwɛchɔ we meombo.

²⁶ Nasumukunyea ena mɛɔcha ko mbanga yee bando batoenga kobaonga.

²⁷ Kilisito usumwiteela Motema waakɛ wa Ama. Ne ko boa boe motema kuchikaa monda mwiinu, muusi be koeyechwa ne mondo, kɔmɔa Motema otamoeyeche biemo biisɛ. Motema olya otoeyecha bye kiinɛkinɛ ɔtɔɔcha manu. Chɔ ko boa bomweyechee Motema, muchikae monda mwa Kilisito.

²⁸ Monda mwa Kilisito. Kɔmɔa tuungwe ne iekekeo kiinɛkinɛ atabaakɛ awɛ, ne tuungwaya masɔni ataɔtɔkɛ awɛ.

²⁹ Motocheba itɛ Kilisito oe ne kiinɛkinɛ, kɔ bɔbɔ mochebe itɛ ɔɔsɛ mondo otoketa bye kiinɛkinɛ ne Mwaana wa Kakua.