Zephaniah 1 - Zokam International Version

¹ Judah kumpipa Amon tapa Josiah in kumpi a sep hun laitakin Hezekiah tapa Amariah tapa Gedaliah tapa Cushi tapa Zephaniah tungah TOPA thu tung a:

Siatna Tun ding Vauhilhna

² "Lei maitang panin na khempeuh ka phiatmai ding hi," TOPA in cikhia hi.

³ "Mihing ganhing ka phiatmai khawm dinga; huihlak vasate le tuipi sunga ngasate ka phiatmai ding hi. Lei maitang panin mite ka khenkhiat ciangin migilote in van sia lomtang a bek a nei ding uh hi," TOPA in cikhia hi.

Judah Langah

⁴ "Judah langkhat le Jerusalem a tengte khempeuh tungah ka khut ka zankhia ding hi. Hih mun panin Baal them om lai sunte le lawkite minte le milimte biakna-a siampite-

⁵ innkhum tungah kah a, aksi honte bia-a kunte, TOPA tawh kiciama a kunte le Molech b tawh a kiciamte zong,

⁶ TOPA zuihna panin a kilehheite le TOPA zong lo-a a kan lote khempeuh ka khenkhia ding hi.

⁷ TOPA ni nai ta ahi manin Thupipen TOPA mai-ah daitakin om un. Biakna pia dingin TOPA kithawi khin hi; a sapsate siansuah khin hi.

⁸ TOPA biakna piak ni-in kumpi uliante, kumpi tapate le gamdang puana kizemte dan ka tuaksak ding hi.

⁹ Tua ni ciangin kongpi c pela paikhia khempeuh ngongtatna le khemna tawh amau pasiante’ biakinn a dimsakte dan ka pia ding hi.

¹⁰ TOPA in cikhia hi, "Tua ni ciangin Ngasa Kongpi ah kahna aw ging dinga, Vengthak panin thumna le mualneute tung panin a ngaih mahmah kisukna kiza ding hi.

¹¹ No sumbuk venga omte thum un; na sumbuk khempeuh uh kiphiatmang d dinga, ngun e a sum zong peuhmah kisia ding uh hi.

¹² Tua hun ciangin meivak zangin Jerusalem ka zong dinga, amah bek nuam a sate, lenggah zu tawdat banga, "TOPA in a sia a pha bangmah bawl lo hi,’ a cite dan ka tuaksak ding hi.

¹³ A hauhna uh kilaksak dinga, a innte uh a kisiagawp ding hi. Amaute in inn a lam uh hangin a sungah teng lo ding uh hi; lenggui a suan uh hangin a zu a dawn kei ding uh hi.

TOPA ’ Ni Lianpi Ni

¹⁴ "TOPA ni lianpi ni nai ta - nai ta a, manlangin a tung ding hi. Ngai un! TOPA ni-a kahna, galhangte kikona nasia mahmah ding hi.

¹⁵ Tua ni pen thangpaih ni, lungdon ni le dah ni, patauh ni le kisiat ni, khuamial ni le lungzin ni, meiipi kai-a khuamial ni,

¹⁶ pengkul ni le kulha ki-um khuapite le a kiu-a tausangte sima galkapte a ot ni hi ding hi.

¹⁷ Mite tungah lungdonna ka tungsak dinga, amaute mittaw lampai bang ding uh hi, bang hang hiam cih leh amaute TOPA tungah a mawh zo uh hi. A sisante uh leivui bangin kisungkhia dinga, a gilzangte uh nin kihhuai a bang ding hi.

¹⁸ TOPA thangpaihna ni ciangin a ngun a khamte un amaute a honkhia thei kei ding hi. Amah in thakhatin a tawpna tungsak ding ahi manin ama aamluatna mei in leitung buppi le leitanga teng khempeuh a kangtum ding hi,"