Thukhente 5 - Zokam International Version

Deborah’ La

¹ Tua ni-in Deborah le Abinoam tapa Barak in la sa uh a:

² "Israel a makaite in a makaih uh ciangin mite amau utthu-in a kipiatawm uh hi - TOPA phat un!

³ "No kumpite aw, za un! No gam-ukte aw, ngai un! TOPA la ka sak c dinga, ka sak ding hi; Israel Pasian TOPA tungah, tumtheih d ka tum ding hi.

⁴ "TOPA aw, Seir pana na paikhiat ciang, Edom gam pan na kuankhiat ciang, lei kiling a, vante’n sungkhia in meiite in tui sungsuk uh hi.

⁵ TOPA, Sinai-a Pa mai, TOPA Israel Pasian mai ah, mualte ling uh hi.

⁶ Anath’ tapa Shamgar hunlai, Jael hun laitakin lampite kitawn nawn lo a, khualzinte in lamkotte a zui uh hi.

⁷ Keimah e Deborah khanga, Israel ah nu khat a khan mateng Israel a khuano nuntakna f a bei hi.

⁸ Adang pasiante a teel uh ciangin, khuapi ah gal tunga, Israel tul sawmlite lakah lum le tei a kimu kei hi.

⁹ Israel ukte le mipite laka utthu-in nasem nuamte tawh ka lungsim a kituak hi, TOPA phat un!

¹⁰ "Laa kangte tunga tuangte sakol tutphah puanza tunga tute le lampi dunga paite aw,

¹¹ tui buakna phuala lasate g aw, ngaihsun dih un. Amaute in TOPA thumaan gamtatna sasa uh a, Israel sunga ama galhangte h gamtatnate a lolo uh hi. Tua ciangin TOPA mite khuapi kongpite ah a paisuk uh hi.

¹² "Tho in, Deborah aw tho in! Tho in, tho in, la sa dih in! Barak aw, ding in! Abinoam’ tapa aw, na gal matte sal dingin kai in.

¹³ "Tua ciang a kinusia mite miliante kiangah paisuk uh hi; TOPA’ mite mithahatte tawh kei kiangah hong paisuk uh hi.

¹⁴ Ephraim pan pawlkhat hong pai-a, a bul uh Amalek ahi hi; Nangmah hong zui mite tawh Benjamin tawh kithuah hi. Makir pan galkap ukte kuansukin Zebulun pan galkapmangpa ciangkhut tawite paisuk uh hi.

¹⁵ Issachar uliante Deborah tawh omkhawm uh a; Issachar le Barak omkhawm uh a; kuam sungah amah nungdelh uh hi. Reuben gamsungah lunggeelna lian mahmah hi.

¹⁶ Tuuhonte ngaih ding tamngai za lel dingin bang hangin giahphuala meipi a awiawi na hi hiam? Reuben gam sungah lunggeelna lian mahmah hi.

¹⁷ Jordan galah Gilead om hi. Dan e leh, bang hang tembawte gei-ah omom lai ahi hiam? Tuipi gei-ah Asher om lai a, a tuipem ah teng hi.

¹⁸ Zebulun mite in amau nuntakna kham uh a; lopaang asannate ah Naphtali in zong a tua cih hi.

¹⁹ "Kumpite kuanin do uh hi; Canaan kumpite in Megiddo tuite kiang Taanach ah do uh hi, amaute’n ngun, vanlak bangmah pua zo tuan lo.

²⁰ Vantung pan aksite’n do uh hi, amau muntek pan Sisera do ciat uh hi.

²¹ Kishon gun in amaute taimang a, tanga-tuana gun, Kishon gunpi in. Ka kha aw, mainawt in; hattakin!

²² Tua ciangin sakol khe ging - thahatin kopdian a, a kopdianna ging ngaih hi.

²³ TOPA vansawltak in, ‘Meroz hamsiat in’ ci. ‘A mite hamsiatgawp in, amaute in TOPA huh nuam lo uh a, a thahatte langah TOPA a huh nuam kei uh hi,’ ci hi.

²⁴ "Numei laka thupha ngah pen, Ken-te Heber’ Jael hi ta hen, puanbuk-a teng lakah thupha ngah pen hita hen.

²⁵ Amah in tui ngen napi nawitui a pia hi; ulian tawh kituakin kuangkum zanga bawngnawi thau-khal a puak hi.

²⁶ A khutin puanbuk khetphim zam-a, a taklam khutin nasempa sekpi a man hi. Amah in Sisera sat a, a lutang a sattam hi, satzanin a panggui-ah sunlet hi.

²⁷ Tuanu khephungah amah tonsukin a puka; tua lai-ah a lum hi. Tuanu khephungah amah tonsukin a puk hi; a tonsukna mun tua lai-ah pukin - a si hi.

²⁸ "Sisera’ nu, tawhlet panin khuadak a, vathangheng kawmah a nu kapkhia in, ‘Bang hanga sakolleng tu tanvei hong tung lo hiam? Bang hangin a sakolleng ging hici ziakai hiam?’ ci hi.

²⁹ Numeite laka pilpennu in amah dawng hi; amahmah kidawngdawng a, hi takpi ei,

³⁰ ‘Amaute in van kitaisan mu-in hawm lo uh hi ve maw! Pasal khat in nungak khat ta hiam, nih ta hiam, Sisera ading a kinusia puan gial bilbial, a mel tuamtuama kizem, a hoih pha diaka kizem ka ngawng-awh ding - hihte khempeuh a kitaisan hileh maw?’ ci hi.

³¹ "Tua ciangin TOPA aw, na galte khempeuh mangthang hen ou! Ahi hangin nang hong itte limtaka tang sesa ni bang uh hen," a ci uh hi. Tua ciangin tua gam kum sawmli sung lungmuang hi.