Thukhente 1 - Zokam International Version

Canaan-mi Omlaite Israel in Sim

¹ Joshua a sih khit ciangin Israel-te in TOPA tungah, "Canaan-te hong simsak dingin kote mai-ah kua pai masa ding hiam?" ci-in a dong uh hi.

² TOPA in, "Judah a pai ding hi; keimah in amaute khutah tua gam ka pia khin hi," ci-in a dawng hi.

³ Tua ciangin Judah mite in a sanggam uh Simeon-te tungah, "Ko sehtanhna gama Canaan-te sim dingin no zong hong kuanto un. Ko zong no aa kong kuanpih ding uh hi," a ci uh hi. Tua ciangin Simeon-te in a kuanpih uh hi.

⁴ Judah-te in a sim uh ciangin TOPA in amaute khutah Canaan-te le Periz-te pia-a, amaute in Bezek ah mi tulsawm a satlum uh hi.

⁵ Amaute in tua lai-ah Adoni-Bezek mu uh a, amah doin Canaan-te le Periz-te a delhkek uh hi.

⁶ Adoni-Bezek tai-a, ahi hangin amaute in delhin man uh a, a khutpite le a khepite a tankhiat-sak uh hi.

⁷ Tua ciangin Adoni-Bezek in, "A khutpite le a khepite a kitansak kumpi sawm sagihte in ka sabuai nuai-a anneng a tawm uh hi. Tu-in amaute ka bawlna Pasian in kei tung hong thuk kik hi," a ci hi. Amah Jerusalem ah puak uh a, tua lai-ah a si hi.

⁸ Judah mite in Jerusalem zong sim uh a, a la uh hi. Amaute in namsau-in khuapi zo uh a, mei-in a hal uh hi.

⁹ Tua khit ciangin mualtung gam Negev le nitumna lam mualbulte sim dingin Judah mite a kuansuk uh hi.

¹⁰ Amaute Hebron (a masa in Kiriath Arba kici) a teng Canaan-te sim dingin kuan uh a Sheshai, Ahiman le Talmai-te a zo uh hi.

¹¹ Tua lai panin Debir (a masa in Kiriath Sepher kici) a tengte sim dingin a kuan uh hi.

¹² Tuateh Caleb in, "Kiriath Sepher sim-a, a zo penpen ka tanu Acsah tawh ka tengsak ding hi," a ci hi.

¹³ Caleb naupa Kenaz tapa Othniel in la a, tua ciangin Caleb in a tanu Acsah tawh a kitengsak hi.

¹⁴ Ni khat, tuanu Othniel kiangah pai-a, a pa kiangah lo khat a nget dingin amah a a kun hi. Amah a laa tung pan a kumkhiat ciangin Caleb in, "Bang hong hihsak ding ka hi hiam?" ci-in a dong hi.

¹⁵ Tuanu in, "Hong hamphat diak in. Negev ah leitang nong pia khin hi. Tuinakte zong hong pia lai in," a ci hi. Tua ciangin Caleb in tuinak tungnung le tuinak nuainungte a pia hi.

¹⁶ Moses sungpa’ suan Ken-te, Arad kiang Negev gam sunga Judah-te Sehnel gama mite laka teng dingin Judah mite tawh Nisuh Khuapi b panin a paito uh hi.

¹⁷ Tua ciangin Judah mite a sanggamte uh Simeon-te tawh kuanin Zephath a teng Canaan-te sim uh a, a khuapi a susia c dikdek uh hi. Tua ahi ciangin tua mun Hormah d kici hi.

¹⁸ Judah mite in Gaza, Ashkelon le Ekron a khuapi le a gam ciat tawh a la e uh hi.

¹⁹ TOPA in Judah mite a ompih hi. Amaute in mualtung gam la uh a, ahi hangin zanglei a teng mite zanglei panin a hawlkhia zo kei uh hi; bang hang hiam cih leh amaute in sik sakolleeng a nei uh hi.

²⁰ Moses in a khapsa bangin Caleb tungah Hebron kipia a, tua lai panin amaute in Anak tapate thum a hawlkhia uh hi.

²¹ Ahi zongin Benjamin-te in Jerusalem a teng Jebus-te a nawhkhia zo kei uh hi; tuni dongin Benjamin-te tawh Jebus-te a tengkhawm uh hi.

²² Tu-in Joseph innkuante in Bethel sim uh a TOPA in amaute a ompih hi.

²³ Amaute in Bethel (a masa in Luz kici) thu a kan ding mi a sawl uh ciangin,

²⁴ thukante in khuapi pana pusuak mikhat mu uh a, ama kiangah, "Khuapi sunga lut nading hong hilh in, nang a hoihin kong thuk kik ding uh hi," a ci uh hi.

²⁵ Tua ciangin amah in laka, amaute in tua khuapi namsau-in zo uh a, tua mipa le a innkuanpihte a hawi uh hi.

²⁶ Tua ciangin Hit-te gam ah pai-a, tua lai-ah khuapi lamin, a min Luz ci-a tuni dongin a kici suak hi.

²⁷ Ahi hangin tua gamah Canaan-te tengsuak uh ahi manin Manasseh in Bethshan, Taanach, Dor, Ibleam, Megiddo mite le a kima tengte khempeuh a hawlkhia kei hi.

²⁸ Israel a thahat ciangin Canaan-te zawhthawh thu-in na semsak uh a, ahi hangin a hawlkhiamang khin kei uh hi.

²⁹ Ephraim-te in zong Gezer a teng Canaan-te hawlkhia lo uh a, amaute lakah Canaan-te a tengsuak uh hi.

³⁰ Zebulunte in zong Kitron le Nahalol a teng Canaan-te hawlkhia lo uh a, amaute lakah a om uh hangin zawhthawh thu-in na a semsak uh hi.

³¹ Asher-te in zong Acco, Sidon, Ahlab, Aczib, Helbah, Aphek, Rehob a tengte hawlkhia lo uh hi;

³² tua thu hangin Asher mite pen tua gama teng Canaan mite lakah a teng uh hi.

³³ Naphtali in zong Beth Shemesh, Beth Anath a tengte hawlkhia lo uh hi; ahi hangin Naphtali-te zong tua gama tengsa Canaan-te lakah teng uh a, Beth Shemesh le Beth Anath a tengte amau adingin zawhthawh thu-a nasemte a suak uh hi.

³⁴ Amor-te in mualtung gamah Dante lehnawh uh a zanglei-a a paisuk ding uh a phal kei uh hi.

³⁵ Tuateh Amor-te Heres Vum, Aijalon le Shaalbim ah tengsuak uh a, ahi hangin Joseph innkuante a vangliat zawk uh ciangin amaute zong zawhthawhthu-in na kisemsak hi.

³⁶ Amor-te gamgi Mom-ai Ciang a panin Sela le agal ciang ahi hi.