Thuhilhna 8 - Zokam International Version

¹ Mipilpa tawh kibang kua hiam? Nate ahi bang liana a thei kua ahi hiam? Pilna in mite maitaangsak a, a maipuakzia khengsak hi.

Kumpipa Thu Man’na

² Pasian mai-ah kiciam khin na hi manin ken kong cih inah kumpipa thupiak mang in.

³ Kumpipa omna mun pan paikhia baih lua kei in. Amah in a lungkimna bangbang hih ding ahi manin thusia lamah pang kei in.

⁴ Kumpipa thu a sangpen ahi manin ama kiangah,"Bang hih na hiam?" kua in ci thei ding ahi hiam?

⁵ Ama thupiakna a mang peuhmah in siatna thuak lo dinga, lungsim pil in a hun leh a paizia thei ding hi.

⁶ Ahang in, mi khat haksatna ama tungah a gik hangin na khempeuhah a hun leh a paizia om hi.

⁷ Mailam thu kuamah in a theih loh nungsang, ama tunga piang ding kua in gen thei ding ahi hiam?

⁸ Huih khumcip nading vaang a nei kuamah om lo-a, a tua mah bangin a sih ni ding tungah vaang a nei kuamah a om kei hi. Gal kikap hun laitakin kuamah a kitawpsak loh mah bangin gitlohna gilo-a gamtatna a khahkhia kei ding hi.

⁹ Sunni nuai-a kibawlsa peuhmah ka ngaihsutsut ciangin hih teng ka mu hi. Mi khat in ama b siat nadingin midangte a uk hun om hi.

¹⁰ Tuateh migilote hanah a kivui hi - tuate mun siangtho ah sung tumin pusuak uh a a gamtatna uh hangin khuapi sungah phatna c a ngah uh hi. Hih zong a mawknapi mah ahi hi.

¹¹ Mawhna thukhenna khat manlangin a kisep khiat loh ciangin mite lungsim in siatna bawl ding a sawm hi.

¹² Migilo khat in zavei dong mawhna bawl napi a nuntak veve hangin Pasian mai-ah siangtho a Pasian kihta mite a hoih zawk ding lam ka thei hi.

¹³ Tua hi napi migilote in Pasian a kihtak loh manun a ma uh vang lo dinga, nilim tawh a kibang a nuntak hun uh zong a kisawtsak kei ding hi.

¹⁴ Leitunga piang a mawknapi pawlkhat om lai hi: migilopa ngah dinga kilawm a thumaan mipa in ngah a, a thumaan mipa ngah dinga kilawm migi lopa in ngah hi. Hih zong a mawknapi mah hi, ka ci hi.

¹⁵ Tua hi-a mihing adingin sunni nuai-ah ne-in dawna gualnuama om kana hoihzaw om lo ahi manin gualnopna ka phat hi. Tua ciangin Pasian in sunni nuai-a a dam hun dinga a piak sung teng a nasepna ah amah in nuam a sa ding hi.

¹⁶ Pilna le leitunga mihingte nasepna theih sawmin - sun le zana ihmu lo lianga a om uh ka ngaihsunsun a -

¹⁷ tua ciangin Pasian sepsa khempeuh ka mu hi. Sunni nuai-a a piang khempeuh kuama theihtel zawh ding hi lo hi. Ama sepsa khempeuh i zonkhiat nop hangin mihing in a khiatna theikhia zo lo hi. Mipil khat in thei a kisak hangin a thei siang taktak thei kei hi.