Thuhilhna 1 - Zokam International Version

Na khempeuh Amawknapi

¹ Jerusalem kumpipa David tapa Siapa a thugente:

² Siapa in, "A mawknapi! A mawknapi! Bangmah hi peuhmah lo a mawknapi! Na khempeuh a mawknapi ahi hi," a ci hi.

³ Mihing in sun nisa nuai-ah gimpi-in na a sepna hangin bang lawhtak ahi hiam?

⁴ Khang khat tungin khang khat bei-a, ahi hangin leitung kibangden hi.

⁵ Ni suakin ni tum-a a suah nading lamah kuan kik pah hi.

⁶ Leitaw-lam manawh in huih nunga, leilu lamah nung kikin, suk nun zel to nun zel-a, a zuihna ngei teng mah zui-in nungnung hi.

⁷ Luite khempeuh tuipi sungah luang-a, tuipi a dim ngei tuan kei hi. Luite a luankhiatna a nak mah ah kilehkik hi.

⁸ Na khempeuh lunggimhuai-a, mihing gen zawh hi lo hi. Mit in a muh cim ngei lo-a, bil in a zak cim ngei lo hi.

⁹ Ahisa mah hi kik-a, a kisemsa mah a kisem kik ding hi; sunni nuai-ah a thak bangmah om lo hi.

¹⁰ "En sin uh! Hih a thak hiveh! a kici thei ding khat beek om ahi hiam? Sawt pekpek-a a om khinsa mah hi-a, ei hun ma-a a na om khinsa ahi hi.

¹¹ Sawt pekpeka te mihing in phawk zo nawn lo a, a piang lai dingte zong a piang nai lote in a phawk kha kei ding hi.

Pilna Amawknapi

¹² Keimah, Siapa in Jerusalem a Israel-te kumpipa ka hi hi.

¹³ Van kikhupsin nuai-a pilna tawh a kisemsa khempeuh guizuiha zonkhiat ding ka nak ngaihsut mahmah hi. Pasian in mihing tunga a suat van gik si e!

¹⁴ Sunni nuai-a a kihihsa khempeuh ka mu khin ta-a; a vekpi-in a mawknapi, huih nungdelh lel ahi hi.

¹⁵ A kihuiheksate kitangsakthei lo a; a om lopi a kisim thei kei hi.

¹⁶ Kei kia-in ka ngaihsuna, "En in, ka khan khin a, kei ma-a Jerusalem a ukte khatpeuh sangin ka pilzaw hi; pilna le theihna tampitak ka tuakkha khin hi," ka ci hi.

¹⁷ Tua ciangin kei mahmah in pilna a theihtelna le haina a haitatna ka ngaihsun kak-a, ahi hangin hih zong huih nungdelh lel mah ahilam ka theikhia hi.

¹⁸ Ahang in, pilna tam semsem leh dahna khang semsem-a; theihna khang semsem leh lunggimna tam semsem hi.