Philemon 1 - Zokam International Version

¹ Christ hanga thongkia pa Paul le i sanggampa Timothy in, Ka lawm it uh le ka naseppih uh Philemon,

² ka sanggamnu uh Apphia, ka galkappih uh Archippus le na inna kikhawm pawlpi tungah:

³ I Pa Pasian le Topa Jesu Christ tung pana hehpihna le lemna note tungah om ta hen.

Lungdamkohna le Thungetna

⁴ Ka thungetna ah note kong phawk simin ka Pasian tungah lungdam ka ko tawntung hi.

⁵ Bang hang hiam cih leh Topa Jesu sunga na upna le misiangte khempeuh na itna thu ka za zo uh hi.

⁶ Na upna midangte na kuppihna ah thanuam-a, Christ sunga i neih na hoih khempeuh theihtelna kim na neih theih nadingin thu ka ngen hi.

⁷ Sanggampa aw nang, misiangte lungsim thaksuaksak zo na hi manin na itna in kei hong lung nuamsakin hong hanthawn hi.

Onesimus ading Paul Ngetsakna

⁸ Tua ahi manin Christ sungah na nasep ding hangtakin thu hong pia thei napi,

⁹ itna tawh kong thum zaw hi. Tua ciangin keimah Paul ka tek banah Christ Jesu hanga thongkia zong ka hi lai-a,

¹⁰ kol ka bulh laitaka ka tapa hong suak Onesimus a ading kong ngen hi.

¹¹ Tunung lamin amah nang adingin kimanna a nei lo ahi hi. Ahi hangin tu-in nang le kei adingin mi manpha mahmah a suak hi.

¹² Kei pumpi zahin ngaihsunin amah nang kiangah kong sawl kik hi.

¹³ Lungdamna-thu hanga sikkhainiang buna ka om sung teng, nang tanga kei hong huh dingin ka kiangah ka omsak nuam mahmah hi.

¹⁴ Ahi hangin nang hong deihsakna khempeuh nang utthu-a nong hihsa suaka, hong kihihsak teitei a suah loh nadingin nang thu loin bangmah ka hih nuam kei hi.

¹⁵ Nang tawh tawmvei sung na kikhenna uh pen amah a hoih a na neih kik theih nading hi kha ding hi -

¹⁶ tua nangawn zong sila hi nawn lo, sila sanga a hoihzaw sanggam it ahi zaw lai ding hi. Amah kei tungah a ithuai mahmah hi; ahi hangin mihing hina le Topa sunga sanggam khat hina tawh nang tungah hong ithuai zaw lai ding hi.

¹⁷ Tua ahi ciangin kei, na naseppih a nong sim leh kei nong muak ding bangin amah na muak in.

¹⁸ Amah in nang tungah khialhna khatpeuh a neiha, bat khatpeuh a neih leh kei tungah hong siik in.

¹⁹ Hih lai, keimah Paul in ka khut tekteka ka gelh ahi hi. Kei tungah nang mahmah nong kibat gen vet kei ni - keimah in a vekpi in kong din kik ding hi.

²⁰ Sanggam aw, Topa sungah nang tung panin phattuamna ngah thei leng ka ut hi; Christ sungah ka lungsim hong thaksuaksak in.

²¹ Hong mang dingin kong muanga, kong nget sanga lianzawin, na hih ding thei kawmin lai kong gelh ahi hi.

²² A kisam lai khatah: na thungetnate uh hong kidawnna-in, kei no tawh hong om khawm thei kik dingin kilamen ka hi manin zintunna inndei khat a baihsa-in na koih khol in.

²³ Christ hanga ka thong kiatpih Epaphras in nang hong hopih hi.

²⁴ Ka naseppih Mark, Aristarchus, Demas le Luke-te in zong nang hong hopih uh hi

²⁵ Topa Jesu Christ hehpihna in na kha hong ompih ta hen.