Paunakte 3 - Zokam International Version

Pilna hanga Phattuam Thuahnate

¹ Ka tapa aw, kong hilhna mangngilh kei inla, ka thupiakte na lungsim ah kem in.

² tuate in na khan kum tampi sotin na dau paisak ding hi.

³ Itna le muanhuaina khahsuah kei in; na ngawng kimkotah vial inla; na lungtang pek tungah gelh in.

⁴ Tua hileh Pasian le mihing muhna ah angvanna le minpha na ngah ding hi.

⁵ Na lungsim khempeuhin TOPA muang inla, nang theihtelna tungah kinga kei in;

⁶ na gamtatna khempeuh ah amah phawk in, tua hileh na lampi tangsak b ding hi.

⁷ Nang kimuhna ah pil kisa kei in; TOPA kihta inla, gitlohna peel in.

⁸ Hih in na pumpi adingin thamalhna hi dinga, na guhte adingin malhna hi ding hi.

⁹ Na hauhna le na ankung khempeuh-a gahmasa-in TOPA pahtawi in;

¹⁰ tua hileh na saal dimlet dinga, na lenggah sukna beel ah zuthak a dimlet ding hi.

¹¹ Ka tapa aw, TOPA hong sekna thusim lo kei inla, ama hong taihilhna hehsan kei in,

¹² bang hang hiam cih leh pa in a pahtak tapa a sek bangin TOPA in a itte sek a hi.

¹³ Pilna mu a, theihtelna a ngahpa thupha ngah ahi hi;

¹⁴ tua in ngun sangin met theizaw a, kham sangin a gahsuahzaw hi.

¹⁵ Ruby sangin manphazaw a; nang deihtheih khatpeuh tawh kiteh thei lo hi.

¹⁶ A taklam khut ah khansauna om a; a veilam khut ah hauhna le pahtawina a om hi.

¹⁷ Ama lampi nuam a, a lampi khempeuh kilemna ahi hi.

¹⁸ Amah a pom mi adingin nuntakna singkung hi-a, amah a lenden mi in thupha a ngah ding hi.

¹⁹ TOPA in pilna tawh leitung bulpi phut a, ama theihtelna tawh a mun takah vantungte a koih hi.

²⁰ Ama theihna-in tuithukte kikhen a, meiite in daitui a kiasak hi.

²¹ Ka tapa aw, akip thukhenna le theihkakna len inla, tuate en gige in;

²² tuate nang adingin nuntakna hi dinga, na ngawng a kilawmsak kizepna hi ding hi.

²³ Tua hileh lungmuangin na nungta dinga, na muktu kei ding hi;

²⁴ na lup ciangin na lau kei dinga; na ihmut a nuam ding hi.

²⁵ Bingtuahsiatna kihta kei inla migilote tunga tung tuahsiatna zong kihta kei in,

²⁶ ahang in nang khamuanna TOPA hi dinga, thanga awk lo dingin na khe a kem ding hi.

²⁷ Nang hih zawh ding ahileh huh tuakte huh ding lungsit kei in.

²⁸ Tu-a na neih gige pi mah - na vengpa kiangah, "Hong pai kik in; zing ciang hong pia ning," ci kei in.

²⁹ Nang hong muanga na kianga teng na vengpa nat nadingin sawmsim kei in.

³⁰ Nang hong nasak lo mipa tungah a thu om lopi-in mawhsak kei in.

³¹ A ngongtat mi eng kei inla a gamtatzia zong teel kei in;

³² ahang in, a lehtat mi TOPA in kih a, a thutang mi a muang hi.

³³ TOPA in migilote’ inn hamsiat-a, a thumaante innsung thupha a pia hi.

³⁴ Amah in a kiphasak mi simmawhte simmawh a, a kiniamkhiatte a hehpih hi.

³⁵ Mipilte in pahtawina luah uh a, mihaite ahileh kimaizumsak hi.