Paunakte 26 - Zokam International Version

¹ Nipi lai-a vuk kia le an lak huna guahzu bangin mihaite pahtawi a kilawm kei hi.

² Kawlgit patau le phialphiah kawilen bangin a thu om lopi-a hamsiat tangtung lo hi.

³ Sakol sat kul a, laa kamkaih kulin, mihai nungzang adingin ciangduai a kul hi.

⁴ Mihaite amau haina tawh kizui-in dawng kei in, na dawn leh amah tawh kibang na suak ding hi.

⁵ Mihai ama haina bangin dawng lecin ama’ mit ah pil kisa kha ding hi.

⁶ Kamtai dinga mihai khat sawlna in a sawlpa khe a kitansak ahikeh ngongtatna tui dawna dawn tawh kibang hi.

⁷ Mihaite paunak gen in khebaipa khebaina lam tawh kibang hi.

⁸ Mihai khat pahtawi in sailung khau a sailungtang hen tawh kibang hi.

⁹ Mihaite paunak gen le zukhampa khuta ling om kibang hi.

¹⁰ Mihai khat ahikeh a tuahpeuh tha a cial mi, a banliamsak thal tawipa tawh kibang hi.

¹¹ Ui in a luak a nek kik bangin mihai in a haina a hih kik hi.

¹² Amah pil a kisa mi na mu hiam? amah sangin mihai adingin lametna om zaw hi.

¹³ Mi zongzaw in, "Lampi ah humpi om kong lakah humpi gilo kawivak!" ci hi.

¹⁴ Kawmhek tungah kongkhak a kihei bangin, a lupna tungah zongzawpa a kiheihei hi.

¹⁵ Mi zongzaw in ankuang sawkin; a kam a tut ding a tha dah lua hi.

¹⁶ Limtaka dawng thei mi sagih sangin mi zongzawpa amah pil kisazaw hi.

¹⁷ Mi kitawng tuaka a va kikausiphumpa ui a bila manpa tawh kibang hi.

¹⁸ Singkhuah-am le sihtheihna thaltang a mawk lot mihaipa le

¹⁹ a vengte khem a, "Ka ciamnuihna hi lel e," a ci pa kibang hi.

²⁰ Singkhuah loin mei mit a, gensiatna om kei leh kitotna dai hi.

²¹ Meihol in mei amsak a, singkhuah in mei a kuansak bangin kitot hat mi in, kiselna phuang hi.

²² Gensiatna kamte an limpen tawh kibang a, mihing sungtawng ah tumsuk hi.

²³ Lungsim gilo napi kam zol daldalte cim a-a kizut leibeel bang ahi hi.

²⁴ A lungsim siate a kamin kiphelh a, a lungsim, khemna tawh a dim hi.

²⁵ A kam a khum hangin um kei in; a lungsim ah kihhuaina sagih a dim hi.

²⁶ Ama lungsim sia khemna tawh a kisel zawh hangin ama gitlohna, mipi mai-ah a kipholak ding hi.

²⁷ Mi khat in gum a tawh leh tua sungah amah kia dinga, suangtum a khuk leh tua suangtum in amah kha kik ding hi.

²⁸ A zuauthei leii in amah liamsakte mudah a; maitang phat kam in mi a siasak hi.