Paunakte 15 - Zokam International Version

¹ Kamnem a dawnna in thangpaihna daisak a, kamkhauh in ahileh hehna sosak hi.

² Mipilte leii in theihna phata, mihaite kam in ahileh haina phulkhiasak hi.

³ Mun khempeuh ah TOPA mit om a, misia le mipha a encik hi.

⁴ A damsak thei leii nuntakna singkung hi-a, a khem thei leii in ahileh lungsim a suzan hi.

⁵ Mihai in a pa sekna nial-a, puahphatna a thusim mi ahileh pilvangna lak ahi hi.

⁶ A thumaan mi inn ah gou tampitak om a, migilote sumtum in amaute lungkhamsak hi.

⁷ Mipilte muk in theihna thehzak a, mihaite lungsim in a tua cih kei hi.

⁸ Migilote biakpiakna TOPA in kih a, a thutang mite thungetna in amah lungkimsak hi.

⁹ Migilote zuih lampi TOPA in kih a, thumaan a delhte a it hi.

¹⁰ Lampialte khauhtakin sek kul a, puahphat a ut lote si ding hi.

¹¹ Sihna le suksiatna b, TOPA mai-ah kilangin om ahileh - mihingte lungsim kilangzaw ngel ve!

¹² Mi simmawhpa in kipuahphat ding hehsan hi; mipilte thu dong lo ding hi.

¹³ Lungsim-nopna in maitaisak a, lungsim-natna in ahileh lungsim a suzan hi.

¹⁴ Theihkakna lungsim in theihna zonga, mihaite kam ahileh haina-in kivak hi.

¹⁵ A kinengcipte nuntak hun sung gimna vive hi-a, a lungtai mite pawi bawlbawl ahi hi.

¹⁶ Hauh mahmah a buai sangin tawmkha nei a TOPA kihtak hoihzaw hi.

¹⁷ Kimuhdahpipi a bawngno vakthau sa nek sangin ki-it diamdiam a anteh meh nek hoih zaw hi.

¹⁸ Lungtom mi in kiselna khangsak a, lungduai mi in kitotna daisak hi.

¹⁹ Zongzawte lampi ling in khak a, a thutangte lampi ahileh lam lianpi ahi hi.

²⁰ Tapa pil in a pa lungnuamsak a, mihai in ahileh a nu a thusim kei hi.

²¹ Thukhentel thei lo mi in hai nuamsa a, thu theitel mi ahileh thutangin a gamta hi.

²² Kikupna om loin geelnate tangtung lo a, thu kuppih tampi tawh tuate kizo zo hi.

²³ Ahi liana dawnna in mite lungnuamsak hi - a hun lian tawh kituaka kampau nak hoih sem ve!

²⁴ Mipilte adingin nuntakna lampi paito a, hankhuk c manawha paisuk nading panin a kem hi.

²⁵ TOPA in kiphasakte inn phelkek a, meigong numeite kigi bittakin kepsak hi.

²⁶ TOPA in migilote ngaihsutna kih a, lungsim siangthote aa ahileh lungkimpih hi.

²⁷ A huaiham mi in a inn sung lungkhamsak a, golhsum a mudah mi a nungta ding hi.

²⁸ A thumaante lungtang in a dawn kik nading khingkhaikhai-a, migilote kam panin ahileh thusia phulkhiakhia hi.

²⁹ Migilote kiang panin TOPA gamla a, ahi hangin a thumaante thungetna a za hi.

³⁰ Maitaisa-a etna in lungsim nuamsak a, thuthak hoih in guhte damsak hi.

³¹ Nuntakna a pia taihilhna a ngaipa, mipilte tawh kikhawl thei ding hi.

³² Sektatna a awlmawh lopa amah le amah kithusim lo hi-a, kipuahphat a sawm mi ahi leh theihtelna ngah ahi hi.

³³ TOPA kihtakna in pilna a hilh-a, pahtawina ma-in kiniamkhiatna om masa hi.