Paunakte 13 - Zokam International Version

¹ Tapa pil in a pa lamlahna thusim a, mi simmawhte in ahileh taihilhna a ngai kei uh hi.

² Mihing in a muk gah pana na hoihte nopsakpih a, mi muanhuai lote in ahileh ngongtatna bek nuam sa uh hi.

³ A kam a kem zote a nuntakna kem hi-a, a mawk paute ahileh a kisia ding hi.

⁴ Thadah mi in lunggulh mahmah napi bangmah ngah lo a, thanuamte deihna ahileh cingtakin kipia hi.

⁵ Thumaante in zuauthu mudah a, migilo in ahileh maizumna le mindaina a tun hi.

⁶ Thumaanna in a citak mi cinga, gitlohna in mimawhpa a lawnthal hi.

⁷ Mi khat zawng napi ahau kineih om a, mi dang khat hau mahmah napi, a zawng kineih om hi.

⁸ Mi khat a hauhna in a nuntakna tankhia thei a, mizawng khat in ahileh a kitawnna kam a za kei hi.

⁹ A thumaante’ khuavak tangpha a, migilote’ meivak ahileh kisumit hi.

¹⁰ Kisaktheihna in kitotna bek piangsak a, pilna ahileh mi ngaihsutpihna a sang thei mi sungah kimu hi.

¹¹ A maan lo sum kiamkiam a, tawmtawma kholte’ sum khangkhang hi.

¹² A tungpak lo lametna in lungsim nasak a, lunggulhna tangtunna ahileh nuntakna singkung ahi hi.

¹³ Lamlahna a simmawh mi in thuak dinga, thupiakna a zahtak mi ahileh pahtakman kipia hi.

¹⁴ Mipilte hilhna in nuntakna tuikhuk hi-a, sihna thang panin mi khat kipelhsak hi.

¹⁵ Theihtelna hoih in angvanna lawhtak a, muanhuai lohna lampi ahileh haksa c hi.

¹⁶ A kidawm thei mi peuhmah theihna tawh gamta a, mihai in ahileh a haina pholak hi.

¹⁷ Migilo kamtaipa in buaina tuak a, a muantak palai in damna a puak hi.

¹⁸ Sektatna a awlmawh lo mi tungah zawnna le maizumna tunga, puahphat ding a thudon peuhmah kipahtawi hi.

¹⁹ Lunggulhna tangtutna in lungtaina hi-a, mihaite in ahileh gitlohna kiheisan ding kih uh hi.

²⁰ A pilte tawh kikhawlte pil a, mihaite kithuahpihpa in natna thuak hi.

²¹ Kamsiatna in mimawhpa delh a, daupaina ahileh a thumaante’ pahtakman ahi hi.

²² Mi hoihpa in a tate’ tate gouluah ding nusiat a, mawhneipa hauhna ahileh a thumaan mi adingin kikhol hi.

²³ Mizawngpa lo ah an tampi piang thei a, ahi hangin thutan lohna in a siakmang hi.

²⁴ Ciangduai a zang lo mi a tapa mudah hi-a, a tapa a it mi in limtakin sek hi.

²⁵ A thumaante in a lungkim zah ne a, migilote ahileh gilkial uh hi.