Paunakte 1 - Zokam International Version

Thupatna: Athu le Ngimna

¹ Israel kumpipa David tapa Solomon’ paunakte:

² Pilna le sektatna ngah nading, thu laigilte theihtel nading;

³ kisekin kidawmin nungta a, thumaan thutang tawh kilawm kituaka sep nading;

⁴ mimawlte kidopsak nading, khangmoite tungah theihna le theihkakna piak nading -

⁵ mipilte in ngai-in a theihna uh behlap henla, a ciimte in mapi-in nei uh hen -

⁶ mipilte’ paunakte, gentehnate, tehkaknate le thu telhak kamthukte theitel nading ahi hi.

⁷ TOPA kihtakna in theihna kipatna hi-a, mihaite a in ahileh pilna le sektatna a thusim kei uh hi.

Pilna Pom dinga Kalhnate Zolna Zuih loh ding Vauhilhna

⁸ Ka tapa aw, na pa hong lamlahna ngai inla na nu hong hilhna nusia kei in.

⁹ Amaute na lu a kilawmsak gualzawhna pakkhi hi-in, na ngawng zepna khi ahi ding hi.

¹⁰ Ka tapa aw, mawhneite in hong zol leh amau zolna zui kei in.

¹¹ Amaute in, "Ko hong zui in; mi khatpeuh sisan suah dingin va pang ni, mi ommuang khat va busim ni;

¹² hankhuk b bangin va hingvalh ni, gum sunga lawmkhiat va bangsak ni;

¹³ tua hileh na manpha namkim ngahin vansuh tawh i inn i dim ding hi;

¹⁴ ko hong pawl inla, sumbawm nei khawm ni" - hong cih uh leh

¹⁵ ka tapa aw, amaute zui kei inla, amaute’ lampi tawn kei in;

¹⁶ ahang in, a khe uh a mawh dingin manlang a, sisan suah dingin kinawh hi.

¹⁷ Vasate muh tangpi-a lenthang kam a mawknapi hi lo hiam!

¹⁸ Hih mite amau sisan suah ding ngaka bok hi lel a; amau le amau kibuksim uh hi lel hi.

¹⁹ Amaan lo a ngah a sawm mi khempeuh tawpna hih bangte hi-a; tua bang a ngahte a nuntakna un sawng hi.

Pilna Nolh loh ding Vauhilhna

²⁰ Kongzing ah pilna nakpi-in kiko-a, tual-awng ah a aw sangsak hi;

²¹ kongzing c gamlumna munah kikokhia a, khuapi kongpite ah thu genin:

²² "No mimawlte d aw, bang tanvei mawl sawm lai na hi uh hiam? Misimmawhte in bang tanvei simmawhna nuamsa in, mihaite in theihna mudah lai ding hiam?

²³ Kong thuhilhna thupisim hi lecin ka lungsim na tungah hong sungin, ka ngaihsutnate nang kong theisak ding hi.

²⁴ Ahi hangin kong sap lai-in nong nial uh a, ka khut ka zan lai-in kuamah in nong awlmawh loh nungsangun,

²⁵ kongthumuapna khempeuh thusim loin kong taihilhna na man’ loh nungsangun,

²⁶ kei zong na tuahsiatna uh kong nuihsan lel dinga; vangsiatna in note hong phak ciang -

²⁷ vangsiatna in huihpi banga hong phak ciang, tuahsiatna in pingpei banga hong zialmang ciang, lungkhamna le lungdonna in hong tuamcip ciangin, kong simmawhbawl lai ding hi.

²⁸ "Tua ciangin amaute in kei hong sam ding uh a, ka dawng kei ding hi; kei hong zong ding uh a, hong mu kei ding uh hi.

²⁹ Amaute in theihna mudah in, TOPA kihtak ding a teel loh nungsangun,

³⁰ ka kuppihna sang loin ka taihilhna a nawlkhin nungsangun,

³¹ amau gamtatna gah ne ding uh a, amau geelsimnate gah kham ding uh hi.

³² Mimawlte in amau mottatna sihlawh ding uh a, mihaite in a thudonlohna uh sihlawh ding uh hi;

³³ ahi hangin ka thu a ngai peuhmah siat ding launa nei loin lungmuangin om hithiat ding uh hi,"a ci hi.