Obadiah 1 - Zokam International Version

¹ Obadiah mangmuhna. Hih in Edom tawh kisai Thupipen TOPA thugen ahi hi - TOPA tung pan thupuak ka za khin uh hi: Minamte tungah palai khat kisawl khin a, "Kithawi un, amah do dingin kuan ni," - kicisak hi.

² "En un, minamte lakah note kong neusak dinga, hong kisimmawh mahmah ding hi.

³ Suangpi a kitamte sungah tenga, asanna munte ah inn lamin, ‘Kua in leitungah hong kaikhiasuk zo ding hiam?’ a ci note aw, na lungsim kiphatsakna un note hong khem khin zo hi.

⁴ Muvanlai bangin sangpi ah laamtoin aksite lakah bu na tom hangin tua panin kong kaikhiasuk veve ding hi" TOPA in cikhia hi.

⁵ "Zanin na kiangah gutate le misuamte hong pai-in - supna lianpi na thuak hangin - amaute deihzah bek hong guksak ding hi lo hiam? Lenggah lo-te na kiangah hong pai leh lenggah tawmkha nusia lai buang ding uh hi lo hiam?

⁶ Ahi hangin Esau kibuluhin a gou selsim khempeuh a kilongmang khin hi.

⁷ Na kipawlpihte un, gamgi dong hong hawlkhia ding uh hi; na lawmte un hong khemin hong nopneh gawp ding uh hi. Na an uh a nete in note hong thangsiah ding uh a, b ahi hangin na mukhia zo kei ding uh hi.

⁸ TOPA in genkhia hi, "Tua ni ciangin Edom mipilte, Esau mualte a thu theitel mite susia lo ding ka hi hiam?

⁹ Teman aw, na galhangte lauthawng mahmah ding uh a, Esau muala thu theitelte kigawhna ah kivattuk ding hi.

¹⁰ Na sanggampa Jacob tunga na ngongtatna hangin nang hong kimaizumsak dinga, a tawntungin hong kisusia ding hi.

¹¹ Nang guak na tangdin ni, mikhualte in a neihsa manpha teng a laksak laitak le gamdang mite a kongpi ah lutin Jerusalem tungah ai a san uh ciangin note zong amaute lakah a kihel mah na suak uh hi.

¹² Na sanggampa a tuahsiat ni-in, na neu-et kei ding hi; Judah-te a kisiat ni-un nuam loin a lungkham ni-un na awibawl kei ding hi.

¹³ Ka mite in haksatna a tuah ciangin amaute kongpi ah na pai kei ding uh hi - a tuahsiat ni-in amaute neumuh kei unla a kisiat ni-un a van manphate uh laksak kei un.

¹⁴ A suakta sunte khaktan dingin lamkabom ah ding kei unla; a lungkham ni-un a nungta sunsunte a galte uh khutah na pia kei ding uh hi.

¹⁵ "Minam khempeuh tungah TOPA ni ding nai ta hi. Na sepsa bangin nang tungah hong kisem ding hi. na sepsate uh nomau lubuk ah hong tu ding hi.

¹⁶ Ka mual siangtho tunga na dawn bang tektekun minam khempeuh in dawn suak ding uh hi; dawndawn ding uh a, a piang ngei lo mah bang ding uh hi.

¹⁷ Ahi hangin Zion Vum kihonkhia ding hi, tua pen kisiangthosakin Jacob innkuan in a gou teng luah ding hi.

¹⁸ Jacob innkuante mei hi-in, Joseph innkuante meikuang hi ding uh a, Esau innkuante ninpaa hi-in, mei sungah kikhul dinga a kangtum ding hi. Esau innkuante sung pan a suakta a om kei ding uh hi," ci-in TOPA in a gensa ahi hi.

¹⁹ Negev pana mite in Esau mualliante tang ding uh a, mualbula mite in Philistia-te gam nei ding uh hi Amaute in Ephraim le Samaria lote tang ding uh a, Benjamin in Gilead a tang ding hi.

²⁰ Canaan gama Israel saltaangte in leitang Zaraphath dong a tang ding uh hi; Jerusalem pana saltaang Sepharad a omte in Negev khuapite a tang ding uh hi.

²¹ Esau mualte uk dingin a hukhia ding mite, Zion mualtungah a paito ding uh hi. Tua ciangin tua kumpi-gam TOPA aa hi ding hi.