Nasepte 6 - Zokam International Version

Sagihte Teelna

¹ Tua hun lai-in nungzuite tam semsem uh a, nisim an hawmna tawh kisai-in Greek-Jew-te in amau meigongte kithu don lo hi, ci-in Hebrew-Jew-te a phunsan uh hi.

² Tua ciangin Sawm-le-nihte in, nungzuite khempeuh kikhawmsak uh a, "Pasian thu gen ding thu don lo liangin annek tuidawn dingah kong tuanvai uh leh ko adingin man lo ding hi.

³ Sanggamte aw, note lakah Kha le pilna tawh kidim pasal sagih teel un. Tuate tungah hih nasep ka suan ding uh a,

⁴ kote in thungetna le nasepna kong hahbawl ding uh hi," a ci uh hi.

⁵ Hih thusun in a pawl bup uh a lungkimsak hi. Amaute in upna le Khasiangtho tawh adim Stephen; tua banah Philip, Procorus, Nicanor, Timon, Parmenas le Jew biakna-a kikhel Antioch pana Nicolas zong a teel uh hi.

⁶ Amaute in hih mite sawltakpite tungah ap uh a, amaute in a lutung-uah a khut uh nga-in thu a ngetsak uh hi.

⁷ Tua bangin Pasian thu a kizel hi. Jerusalem ah nungzuite khang semsem a, siampite tampi in tua upna a zui uh hi.

Stephen Kiman

⁸ Tu-in Stephen, Pasian hehpihna le vang tawh a dim mi khat hi-a, mite lakah a piandang mahmah le a lamdang limte a bawl hi.

⁹ Ahi zongin Synagogue-a Salsuaktate (amaute a kilawhna uh) pawlmite langpanna hong piang hi. Tuate Syrene le Alexandria, Cilicia le Asia gamkhente pana a pai Jew-te ahi uh hi. Hih mite in Stephen thu a sel uh hangin,

¹⁰ ama pilna le a thugenna-a pang, Kha langah a pang zo kei uh hi.

¹¹ Tua ciangin mi pawlkhat zolsim uh a, "Stephen in Moses le Pasian langah daisakna thu a gen ka za uh hi," a cisak uh hi.

¹² Tuaci-in amaute in mipite le upate le thukham siate a hansuah uh hi. Amaute in Stephen man uh a Sanhedrin mai-ah a tun uh hi.

¹³ Teci zuau phuak-a teci pang amaute in, "Hihpa in mun siangtho le thukham a langgen niloh hi.

¹⁴ Kote in, ‘Hih Nazareth mi Jesu in hih mun susia dinga, Moses in eite khuta hong piaksawm i pupa ngeina a kheng ding hi,’ a cih ka za uh hi," a ci uh hi.

¹⁵ Sanhedrin a tu mi khempeuh in Stephen limtakin entek uh a, amaute in a maitang, vansawltak maitang tawh kibangin a mu tek uh hi.