Nasepte 17 - Zokam International Version

Thessalonica ah

¹ Amaute Amphipolis le Apollonia nawkin a pai uh ciangin Jew-te kikhopna innpi omna Thessalonica a tung uh hi.

² Ama ngeina bangin synagogue sungah Paul pai a, Laisiangtho pansanin Sabbath ni thum sung amaute thu a kikuppih hi.

³ Christ a in thuak in, misi pan a thawh ding mah a hihna zia teltakin genin a lak hi. Amah in, "Note tunga kong tangko hih Jesu, Christ b ahi hi," a ci hi.

⁴ Jew-te pawlkhat kithuzawha Paul le Silas a pawl uh hi; tua mah bangin Pasian kihta Greek-te tampitak le a kipi-et numei a tawm het lo in a pawl uh hi.

⁵ Ahi hangin Jew-te in haza uh a, vanzuakna muna migilo pawlkhat kaikhawmin khuapi sungah mipi khawm uh a, ngongtatna a pan uh hi. Amaute Jason innah lut henhan uh a, mihonte c lak pan kaihkhiat dingin Paul le Silas a zong uh hi.

⁶ Ahi hangin amaute a muh loh uh ciangin Jason le sanggamte pawlkhat kaigawpin khuapi vaihawm uliante mai-ah tun uh a, "Leitung khempeuhah buaina bawl hih mite hih lai hong tung uh a,

⁷ Jason in amaute a innah a tungsak hi. Amaute khempeuh in Caesar thukipte thusim loin, ‘Jesu kici adang kumpi khat om hi,’ ci uh hi," ci-in a kiko uh hi.

⁸ Mihonpite le khuapi vaihawm uliante in hih thu a zak uh ciangin a pumbuai gawp uh hi.

⁹ Tua ciangin Jason le adangte kitatna piasakin a khah uh hi.

Berea ah

¹⁰ Khuamial tungin sanggamte in Berea ah Paul le Silas a khakhia pah uh hi. Tua lai a tun uh ciangin Jew-te synagogue ah amaute a pai uh hi.

¹¹ Thessalonica mite sangin Berea mite nampi tat zaw uh hi. Ahang in, lawptakiin thupuak sang uh a, Paul thugente amaan mah ahi hiam, ci-in nisimin Laisiangtho a encian uh hi.

¹² Jew mi tampi in um uh a, tua mah bangin a kipi-et Greek numei honkhat le Greek pasal tampi in zong a um uh hi.

¹³ Thessalonica a Jew-te in Berea ah Paul in Pasian thu a hilh lam a theih uh ciangin tua lai-ah zong va pai uh a, mihonpite tawsawnin a kitomsak uh hi.

¹⁴ Sanggamte in tuipi gei-ah Paul sawlkhia pah uh a, ahi hangin Silas le Timothy Berea ah a tam lai uh hi.

¹⁵ Amaute in Athen dong va kha uh a, Paul in Silas le Timothy in a manlang theithei-a, a nungdelh nading uh thu puasak in a ciahsak kik hi.

Athen ah

¹⁶ Paul in amaute ngaka Athen a, a om sungin tua khuapi milimte tawh a kidim mu-a, a lungdong lua mahmah hi.

¹⁷ Tua ciangin synagogue sungah Jew-te le Pasian kihta Greek-te thu kuppih a, tua mah bangin vanzuakna munah nisima a omkha peuhpeuh a kikuppih hi.

¹⁸ Epicurea le Stoic thuguizuihte honkhat amah tawh a kisel uh hi. Amaute pawlkhat in, "Hih kam theipa in bang gen nuam ahi hiam?" ci-in a dong uh hi. Paul in lungdamna thu ahi Jesu thu le thawhkikna thu hilh ahi manin a dangte in, "Amah in gamdang pasiante a gum hileh kilawm," a ci uh hi.

¹⁹ Tua ciangin amaute in amah Areopagus thu kikupna ah paipih uh a, tua lai-ah, "Tu-a na hilh thuhilhna thak ko ka thei thei ding uh hiam?

²⁰ Zak ngei loh ngaihsutna pawlkhat nong zasak a, tuate bang cihnopna hiam, ka thei nuam uh hi," a ci uh hi.

²¹ (Athen mite le tualai-a teng gamdang mi khempeuh in bangmah dang sem loin a nunung pen ngaihsutna thak peuhpeuh ngai-in tua thu bek genna in a hun uh a zang uh hi.)

²² Tua ciangin Areopagus thukikupna ah Paul ding to a, "No Athen mite’ lam khempeuh ah na biakna-mi uh cih ka mu hi.

²³ Ahang in, pai kawikawi-a, na biak uh nate ka vel leh biakna-tau khat ah: THEIHLOH PASIAN ADING, ci-a kigelh ka mu hi. Tu-in note in na theih loh uh na biak uh, note tungah kong tangko ding hi.

²⁴ "Leitung le a sunga om na khempeuh a bawl Pasian, van le lei Topa hi-a khut tawh kilam biakinnpite ah a teng kei hi.

²⁵ Amah in kisapna khat peuhpeuh a nei bangin mihing khuta na a kisepsak hi lo hi. Bang hang hiam cih leh amah mah in mite khempeuh nuntakna le huu le adang khempeuh a pia hi.

²⁶ Mi khat panin mihing nam kim bawla, amaute leitung bup a luahsak hi. Amaute ading hunte sehsaka, amaute ten nading mun ciat a sehsak hi.

²⁷ Eite tek kiang panin Pasian gamla lo hi napi, mihingte in amah zonga, zama, a muh khak zenzen leh cih deihna in hihte a hih ahi hi.

²⁸ ’Ahang in, ama sungah eite nungta-in, i tanga mihing hina i nei hi. Na la phuahte uh pawlkhat ah, ‘Eite ama suan ama khak i hi hi,’ ci hi.

²⁹ "Tua ahi ciangin eite Pasian suan le khak i hi khit nungsang khutsiamte in a zep uh kham, ngun ahikeh suang tawh kibawl milim a bang dingin a pasian-hina i ngaihsut ding hi lo hi.

³⁰ Pasian in a beisa hunin tua bang khuaphawklohna a kimuh-mawhbawl hangin tu-in amah in mun khempeuhah mi khempeuh a kisik dingin thu pia zo hi.

³¹ Ahang in, amah in a sehkholhsa mipa zangin thumaan tawh leitung mi khempeuh thu a khen ni ding sehkhol khin zo hi. Hih thu amaanna mi khempeuh tungah a lahna-in, amah misi pan a thokiksak hi," a ci hi.

³² Amaute in misi thawhkikna thu a zak uh ciangin pawlkhat in zahpih uh a, ahi hangin adangte in, "Hih thu tungtang na gen ka za kik nuam uh hi," a ci uh hi.

³³ Tua laitakin Paul in tua kikhawmte a nusia hi.

³⁴ Mi tawmkhat in Paul nung zuisuak uh a, a um uh hi. Amaute lakah Areopagus a pawl mi Dionysius le Damaris kici numei khat le adang tampi zong ahi uh hi.