Nasepte 15 - Zokam International Version

Jerusalem a Thukikupna

¹ Judea gam panin Antioch ah mi pawlkhat paisuk uh a, "Moses hong hilh ngeina tawh kizui-in vun na at kei uh leh note hong kihonkhia thei lo ding hi," ci-in sanggamte a hilh uh hi.

² Hih thu in Paul le Barnabas tawh amaute nakpi-a kinialna le kiselna a piangsak hi. Tua ciangin Paul le Barnabas sehin adang thu-um pawlkhat tawh, hih thu tawh kisai-a sawltakpite le upate tawh kimu dingin Jerusalem ah a paitosak uh hi.

³ Pawlpite in lampi-ah kha uh a, Phoenicia le Samaria gamte tawna a zin kawmun Gentile-te kikhelna zia a gen uh hi. Hih thuthak in sanggamte khempeuh a nuamsak mahmah hi.

⁴ Amaute Jerusalem a tun uh ciangin pawlpite, sawltakpite le upate in na dawn uh a, amaute in amau tungtawna Pasian nasepnate a zasak uh hi.

⁵ Tua ciangin Pharisee-te pawl lakah thu-umte pawlkhat dingin, "Gentile-te, vun-atsakin Moses thukham pelloin zuihsak ding ahi hi," a ci uh hi.

⁶ Sawltakpite le upate hih thute kikum dingin a kikhawm uh hi.

⁷ Tampitak a kikup khit uh ciangin Peter ding to a, "Sang gamte aw, a beisa tawlkhat lai-in Gentile-te in keima kam panin lungdamna thupuak za uh a, a up theih nadingun note lak panin Pasian in hong teelkhia cih na thei uh hi.

⁸ Mihing lungtang sung a thei, Pasian in amaute a sanna hong lahna-in eite hong piak bang tektek, amaute Khasiangtho a pia hi.

⁹ Amah in amau lungtangte, upna tawh siansuah khin ahi manin eite le amaute hong deidan lo hi.

¹⁰ Tua bang ahileh eite le i pate in i puak zawh loh hakkol nungzuite ngawngah suanin Pasian zia-et ding i hi hiam?

¹¹ Hi lo! Amaute mah bangin eite zong i Topa Jesu hong hehpihna tungtawnin i suakta cih i um hi," ci-in thu a gen hi.

¹² Barnabas le Paul in amaute tung tawna Pasian in Gentile-te laka lim lamdang le a lamdang a bawlte a gen laitakun, a kikhawm khempeuh thungai-in a sip dide uh hi.

¹³ Amaute a man khit uh ciangin James in, "Sanggamte aw, ka thugen na ngai un.

¹⁴ Pasian in ama mi mahmah dingin Gentile-te lak pan pawlkhat a lakna in, amaute bangci awlmawh hiam cih a masa penin hong lak zo hi, cih eite kiangah Simon a in hong telgen zo hi.

¹⁵ Kamsangte thugente hih tawh kituak hi:

¹⁶ "‘Tua khit ciangin kong kileh kik dinga a puksa David puanbuk ka lam kik ding hi. A kisiasa ka lam kik dinga, ka puahthak ding hi.

¹⁷ A mangthang baang’ mite le ka min a suang Gentile-te khempeuh in, Topa a zon theih nading ci-in hih nate khempeuh a hih pa Topa in a gen hi,’ b

¹⁸ khanghunte khempeuhin tuate kithei khin zo hi, ‘ c ci-in kigelh hi.

¹⁹ "Tua ahi manin Pasian lama hong kihei Gentile-te adingin haksatna i bawl loh ding ka thupukna ahi hi.

²⁰ I bawl sangsikin amaute lai khakin, milim biakna in a nitsak ante, numei-pasal paktatna, ngawng heklupte sate le sisante a tan dingun hilh zaw ni.

²¹ Ahang in, amasapen hunlai-a kipan khuapi khempeuh ah Moses in a hilhsa hi-a Sabbath ni simin synagogue-te sungah a kisimsimsa ahi hi," a ci hi.

Thu-um Gentile-te Tungah Thu Kikumte Laikhak

²² Tua ciangin sawltakpite le upate in pawlpi bup tawh, amau mite pawlkhat teeltuam ding le Paul le Barnabas tawh Antioch ah sawl dingin thu a khensat uh hi. Amaute in sanggamte laka makai (Barsabbas kici) Judas le Silas mi nih a teel uh hi.

²³ Amaute in a nuai-a bangin lai a puasak uh hi: Sawltakpite le upate, na sanggamte un, Antioch, Syria le Cilicia a om thu-um Gentile-te tungah: Kong hopih uh hi.

²⁴ Kote in thuneihna ka piak loh pi un, ko kiang pan mi pawlkhat hong pai-in a thugen un na lungsim uh hong buaisaka, amau thugente in hong lungzingsak cih ka za uh hi.

²⁵ Tua ahi ciangin kote khempeuh in mi pawlkhat teelkhia-in i lawm itte Barnabas le Paul tawh no kianga sawl khawm dingin ka thukim uh hi.

²⁶ Amaute i Topa Jesu Christ min hanga a nuntakna a pia ngamte ahi uh hi.

²⁷ Tua ahi manin lai-a kong gelhte uh a kam uh tawh a kipsak dingin Judas le Silas kong sawl uh hi.

²⁸ A kisam a nuai-a kigente simloh a dang bangmah no tungah kong suat loh ding uh, Khasiangtho le kote in hoih ka sa uh hi:

²⁹ Milimte thoihna ante, sisan, ngawngheklup ganhingte sa, le numei-pasal paktatna na tang ding uh hi. Hih nate pelh le uh cin a hoiha gamta na hi ding uh hi. Mangpha.

³⁰ Tua mite sawlkhia uh a, amaute Antioch ah paisukin, tua lai-a pawlpite kaikhawm uh a, laikhak a pia uh hi.

³¹ Mipite in sim uh a, hanthawnna thupuak hangin a nuam mahmah uh hi.

³² Amau mahmah zong kamsang ahi Judas le Silas-te in sanggamte tungah hanthawnna kam tampitak genin a thakhauhsak uh hi.

³³ Tua lai-ah tawlkhat sung a taam khit uh ciangin sanggamte in, lemna thupha tawh amaute a sawlte kiangah a ciahkiksak uh hi.

³⁴ Ahi hangin Silas in tua lai-a taam lai dingin a khensat hi. a

³⁵ Ahi hangin Antioch ah Paul le Barnabas taam lai uh a, tua lai-ah amaute le midang tampi sinsakin Topa thu a hilh uh hi.

Paul le Barnabas Kikal-a Kithutuahlohna

³⁶ Tua zawh tawmvei khit ciangin Paul in Barnabas kiangah, "Topa thu i gennasa khuapi khempeuh ah pai kikin, sang gamte kiangah hawhin, amaute bang a ci uh hiam, va en ni" a ci hi.

³⁷ Barnabas in Mark zong a kici John tonpih nuam a,

³⁸ ahi hangin Paul in amah tonpih ding hoih a sa kei hi. Bang hang hiam cih leh amah in Pamphylia gamah amaute na taisan a, amaute tawh na a sem zom kei hi.

³⁹ Amaute nasiatakin kithutuak lo uh a, a kipawlkhen uh hi. Barnabas in Mark tonpih a, tembaw tuangin Cyprus ah pai uh a,

⁴⁰ ahi hangin Paul in Silas teela, sanggamte in Topa hehpihna ah a ap khit uh ciangin a kuankhia uh hi.

⁴¹ Pawlpite thakhauhsakin amah Syria le Cilicia tawnin a pai hi.