Misimna 6 - Zokam International Version

Nazir Mite

¹ TOPA in Moses tungah,

² "Israel-te hopih inla amaute kiangah: ‘Numei khat ahikeh pasal khat in a tuam vilvelin kiciamna, Nazir mi kiciamna bang TOPA tungah kikhenkhiatna a ciam nop leh,

³ amah zu le a kibilh dawntheih dangte kidek pelmawh dinga zu-a kibawl zu nam le a kibilh dangte a dawn peuhmah kei ding hi. Amah in lenggah tui dawn loin, lenggah min ahikeh lenggah keu a ne kei ding hi.

⁴ Amah Nazir zek a tan sungteng lenggui pana piang a tang ahikeh a hawng nangawn a ne peuhmah kei ding hi.

⁵ "‘Amah tuam om dinga a kiciam hun sung khempeuh a lutungah mulkiatna a kitah kei ding hi. TOPA tunga a kituam koih hun a bei matengin amah a siangtho ding hi; amah in a sam a sau-in a khawi ding hi.

⁶ TOPA tungah a tuam om hun sung tawntung misi luang kiangah a pai peuhmah kei ding hi.

⁷ A nu, a pa, a sanggamnu, a sanggampa nangawn a sih leh amaute hangin amah le amah anin a kisuaksak kei ding hi, bang hang hiam cih leh Pasian tungah a kituamkoihna lim a lutungah a om hi.

⁸ Amah a tuam om hun sung tawntung TOPA tunga ki-ap ahi hi.

⁹ "‘Thakhatin a gei-ah mi khat a sih vata, a ki-apsa a sam a buahsak leh a kisiansuah ni-in a lu a mettol pelmawh ding hi - tua ni pen a ni sagih ni ahi hi.

¹⁰ Tua ciangin a nigiat ni-in Kikhopna Puanbuk lutna-a siampipa tungah vakhu nih ahikeh kawl-vakhu no nih a paipih ding hi.

¹¹ Siampipa in khat mawhna hanga biakna le adang khat meihal biakna-in pia dinga, thoihdamna a bawlsak ding hi; bang hang hiam cih leh amah misi luang kianga a omna hangin a mawh hi. Tua ni mahin a lu a siangtho-in a ap ding hi.

¹² Amah a tuam om hun sungteng TOPA tungah ki-ap pelmawh dinga, khialhna hanga biakna-in kum khat a pha tuuno apa khat a paipih ding hi. Amah a tuam om laitak a buah suak ahi manin a ma-a nite a kisim kei hi.

¹³ "‘Hih in ama tuam om hun a bei cianga Nazir mi adingin thukham ahi hi. Amah Kikhopna Puanbuk lutna ah kipaipih ding hi.

¹⁴ Tua lai-ah amah in letsongin TOPA tungah biakna pia dinga: meihal biakna dingin kum khat a pha, poina nei lo tuuno apa khat, mawhna hanga biakna dingin kum khat a pha poina nei lo tuuno anu khat, kilawmtakna d biakna dingin poina nei lo tuutal khat,

¹⁵ tuate tawh an-a biakna le dawntheih-a biaknate, le silngo sawh loh anlum lawh khat - sathau kihel annel limci kibawl mohpheng, le sathau ki-tat mohnipte a pia ding hi.

¹⁶ "‘Siampipa in tuate TOPA mai-ah pia-in mawhna hanga biakna le meihal biaknate a bawl ding hi.

¹⁷ Amah in silngo sawh loh anlum tawh pia in, TOPA tungah kilawmtakna biakna-in tuutal pia dinga an-a biakna le dawntheih biakna tawh a pia khawm ding hi.

¹⁸ "‘Tua ciangin Kikhopna Puanbuk lutna ah Nazir mi in a apsa a sam metkhia pelmawh ding hi. Amah in a sam tawi-in kilawmtakna biakna piakna nuai-a mei-ah a khul ding hi.

¹⁹ "‘Nazir mi in a ki-ap hun sunga a sam a met khit ciangin siampipa in tuutal liang huan minsa, a nih in silngo a kisawh lo mohpheng khat le moh nip khat, a khut sungah a koih ding hi.

²⁰ Tua ciangin siampipa in TOPA mai-ah vei-a biakna-in tuate a vei ding hi; tuate siangtho-a kivei a iik le a kipia a phei tawh siampipa aa hikhawm hi. Tua khit ciangin Nazir mi in a lenggahzu a dawn thei ding hi.

²¹ "‘Hih in ama zektan tawh kisai-a, ama piak zawh zah a piak banah TOPA tungah ama biakna-a a kiciam Nazir mi adingin ngeina ahi hi. Amah in Nazir zektan ngeina zui-in a kiciam nasa a tangtungsak pelmawh ding hi,’ ci in," a ci hi.

Siampi Thupha

²² TOPA in Moses tungah,

²³ "Aaron le a tapate tungah gen in, ‘Hih in Israel-te thupha na piak nading zia uh ahi hi. Amaute tungah:

²⁴ "‘TOPA in note thupha hong pia henla hong kem ta hen;

²⁵ TOPA in note tungah a maitang hong tan henla hong hehpih ta hen:

²⁶ Note lamah TOPA hong nga henla, lemna hong pia ta hen,’ ci in."

²⁷ "Tuaci-in Isarael-te tungah amaute in ka min koih ding uh a, tua ciang in amaute thupha ka pia ding hi," a ci hi.