Misimna 36 - Zokam International Version

Zelophehad Tanute Luahna

¹ Joseph suan-a bawng’te panin Manasseh tapa, Makir tapa Gilead bawng’a innkuan makaite va pai-in Moses le Israel-te innkuan lutangte makaite mai-ah thu a sung uh hi.

² Amaute in, "TOPA in kote topa tungah Israel-te in aisan-a a luah ding uh leitang a piak lai-in amah in nang tungah kote sanggampa Jelophehad luah dingte a tanute tungah piak dingin thu hong pia hi.

³ A zenzenin tu-in amaute in Israel beh dangte mah pasalin nei le uh; tua ciangin amau luahte a pu a pate uh luahna panin khenkhia-in amau pasal neihna behte aa ah kigawm ding hi. Tuaci bangin ko luah dinga hong kipiasate hong kilakkhiatsak ding hi.

⁴ Israel-te adingin Jubilee kum ciangin a goutanh uh amau pasal neihna behte aa ah kigawmin amau neihsate ka pute uh minamte luahna panin a kilakhia ding hi," a ci uh hi.

⁵ Tua ciangin Moses in TOPA thupiakna bangin Israel-te tungah, "Joseph suante bawng’ genna amaan hi.

⁶ Hih in Zelophehad tanute adingin TOPA thupiak ahi hi: Amaute in amaute pate behte bawng’te a tenpih nak uh leh amau lungkimna khat peuhpeuh tenpih thei uh hi.

⁷ Israel-te sungah beh khat pan beh khatah a luahsate uh a kipiasawn thei kei ding uh hi; ahang in, Israel mi peuhmah in ama pute pana a luah ama beh leitang kem ding hi.

⁸ Israel mi peuhmah in a pate luahsa a neih theih nadingin leitang a luahsa Israel beh sunga ta numei peuhmah in a pa beh sunga bawng’ pan - khat teitei tawh a kiteng pelmawh ding hi.

⁹ Israel behte in amau luah leitang ciat a kep theih nadingun a luahte uh, beh khat le beh khat a kipia sawn thei ding uh hi, ci hi," ci-in a gen hi.

¹⁰ Tua ciangin TOPA in Moses a thupiak bangin Zelophehad tanute a gamta uh hi.

¹¹ Zelophehad tanute - Mahlah, Tirzah, Hoglah, Milcah le Noah-te in - a pate lamte a tenpih uh hi.

¹² Amaute in Joseph tapa Manasseh suante bawng’ tenpih uh a, a pate uh beh le bawng’ ah a luahte uh a kipsuak hi.

¹³ Hihte in Jericho a pana Jordan gun ngahtanna gei, Moab zanglei a, TOPA in Moses tungtawna a piak ngeinate ahi hi.