Misimna 21 - Zokam International Version

Arad Kisia

¹ Negev a teng Canaan-mi Arad kumpipa in Atharim zuatna lampi zui-in Israel-te pai cih a zak ciangin amah in Israel-te na do a amaute pawlkhat a man hi.

² Tua ciangin Israel in TOPA tungah hih kiciamna a bawl hi. "Nangmah in kote tungah hih mite nong piak ding leh amau khuapite ka susia b dikdek ding uh hi," a ci uh hi.

³ TOPA in Israel thumna ngai-a amaute tungah Canaan-te a pia hi. Amaute in a khuapite uh le amaute a susia dikdek uh hi; tua ahi manin tua mun Hormah c kici hi.

Sumngo Gul

⁴ Hor Vum panin zinkhia uh a, Edom kimvel dingin San Tuipi d zuatna lampi a zui uh hi. Ahi hangin lamkal ah mipite lungtom uh hi;

⁵ amaute in Pasian gensia-in Moses gensia uh a, "Bang hangin sehnel-gama si dingin Egypt panin hong paikhiatpih na hi hiam? Anlum lah om kei! Tui lah om kei! A gentak lo hih an lah kih lel ung!" a ci uh hi.

⁶ Tua ciangin TOPA in amaute lakah gul gupha a khah hi; tuate in mite tu uh a, Israel mite tampi a si uh hi.

⁷ Moses kiangah mite pai uh a," Nang kong gensiat uh le TOPA ka gensiat uh ka mawh zo uh hi. TOPA in kote panin gulte a lakkhiatmang nadingin thu ngen in," a ci uh hi. Tua ciangin Moses in mipite adingin thu a ngen hi.

⁸ TOPA in Moses tungah, "Gul khat bawl inla khuam tung khatah khai in; gul tuksa mite in en thei ding uh a, a nungta ding uh hi," a ci hi.

⁹ Tua ciangin Moses in sumngo gul khat bawla, khuam tung khatah a khai hi. Tua ciangin mi khatpeuh gul in a tuka sumngo gul a et nak leh a nungta hi.

Moab-a Zinna

¹⁰ Israel-te kikhinkhia uh a, Oboth ah giahphual a sat uh hi.

¹¹ Tua ciangin Oboth panin dingkhia uh a, nisuahna lampang Moab maingat-a gam sungah a om Iye Abarim ah giahphual a sat uh hi.

¹² Tua lai panin kikhinkhia leuleu uh a, Zered Kuam sungah giahphual a sat uh hi.

¹³ Tua lai panin dingkhia uh a, Amor-te gamgi dunga kikhung sehnel-gama om Arnon dung sukah giahphual a sat uh hi. Arnon pen Moab-te le Amor-te kikal-a Moab gamgi ahi hi.

¹⁴ Tua pen bang hang hiam cih leh TOPA Gal Laibu in: "Suphah a a Waheb le Arnon guamte,

¹⁵ le b Ar dong a tungsuk Moab gamgi dunga kikhung guam kente," na ci hi.

¹⁶ Tua lai panin TOPA in Moses tungah, "Mite a vekun kikhawmsak un, amaute tui ka pia ding hi," a cihna mun Beer tuikhuk dong a pai lai uh hi.

¹⁷ Tua ciangin Israel in: "Tuikhuk aw, Phulto in! Tua thu la’n sa un,

¹⁸ kumpi tapate tawhsa mipite uliante tuak uh a, a sikciang le a ciangkhut-a a tawh uh tuikhuk thu,’ ci-in la in a sa uh hi. Tua ciangin amaute sehnel-gam panin Mattanah ah pai uh a,

¹⁹ Mattanah panin Nahaliel ah, Nahaliel panin Bamoth ah,

²⁰ Bamoth panin Pisgah mual dawn pana kimusuk Moab gamval kuamah a tung uh hi.

Sihon le Og Zawhna

²¹ Israel in Amor-te kumpipa Sihon kiangah kamtai sawl a:

²² "Na gam hong kantansak in. Lo lai ahikeh lenggui lo khatpeuh tawnin ka pai kei ding uh a, tuikhuk khatpeuh a tui zong ka dawn kei ding uh hi. Na gam ka kantan khit matengun kumpi lamlianpi zui-in ka zin ding uh hi," a cisak hi.

²³ Ahi hangin Sihon in a gamgi kantanin Israel a paisak nuam kei hi. A galkap khempeuh kikhawmsak a, Israel do dingin sehnel gamah a kuankhia uh hi. Jahaz a tun uh ciangin Israel tawh a kido uh hi.

²⁴ Ahi zongin Israel in namsau tawh amah vat-a, ama gam Arnon panin Jabbok dong laksak uh a, ahi hangin Ammon-te omna ciang bek a la zo uh hi; bang hang hiam cih leh amau gamgi ah kulh tawh a ki-um hi.

²⁵ Israel in Amor-te khuapi liante khempeuh, Heshbon le a kimkota khuaneute khempeuh tawh la khawmin a teng uh hi.

²⁶ Heshbon pen, Moab kumpi masazawpa do a, ama tung pana leitang Arnon ciang dong a laksak Amor-te kumpipa Sihon khuapi ahi hi.

²⁷ Tua hangin la sungah: "Heshbon ah hong pai unla lam kik ni; Sihon khuapi kipsak ni.

²⁸ "Heshbon pan mei pawtkhia, Sihon khuapi panin meikuang khat. Tua in Moab a khuapi Ar le, Arnon leitanga teng mite a haltum hi.

²⁹ Moab aw, gimna thuak si cia! Chemosh mite aw, no lah kisia ta uh teh! Amah in a tapate galtai le a tanute galmatin, Amor-te kumpipa Sihon tungah piakhia ta hi.

³⁰ "Ahi hangin ko amaute ka lawnthal uh hi; Heshbon kisia ta, lamdung tawntung Dibon dong; Medeba ciang dong a bansa Nophah dong amaute ka sucip uh hi," ci-in na kiphuak hi.

³¹ Tuaci-in Amor-te gamah Israel a teng hi.

³² Moses in Jazer ah thukansimte a sawl khit ciangin a kima tengte la uh a, tua lai-a teng Amor-te a suankhia uh hi.

³³ Tua ciangin amaute kihei-in Bashan lampi zui-in pai uh a, Bashan kumpipa Og le a galkap buppi, amaute do dingin Edrei ah a kuankhia uh hi.

³⁴ TOPA in Moses tungah, "Amah le a galkap buppi le a gam, nang khut sungah kong pia khin hi, kihta kei in Heshbon a ukpa - Amor-te kumpipa Sihon tunga na hih bangin ama tungah hih in," a ci hi.

³⁵ Tua ciangin amaute a nungta a om nawn lo dingin amah le a tapate tawh, a galkap buppi a that khawm uh hi. Tua ciangin ama gam a tang uh hi.