Misimna 12 - Zokam International Version

Miriam le Aaron in Moses Langneih

¹ Moses in Cush-te khat a zi dingin la-a, ama Cush zi hangin Miriam le Aaron in Moses a langgen uh hi.

² Amaute in, "Moses bek tungtawnin TOPA in thu gen ahi hiam? Eite tungtawnin zong gen hi lo ahi hiam?" a ci uh hi. Hih pen TOPA in a za hi.

³ (Moses a lungnem mahmah mi khat hi a, leitungah om mi khempeuh sangin a lungnem zaw hi).

⁴ TOPA in Moses, Aaron le Miriam-te tungah, "No teng thum na vekun hong paikhia-in Kikhopna Puanbuk ah hong pai un," ci-in thakhatin a sam hi. Tua ciangin tua teng thum a paikhia uh hi.

⁵ Tua ciangin TOPA, meikhuampi in a kiasuk hi; amah Puanbuk lutna-ah dinga Aaron le Miriam a sam hi. Amaute gel mailam ah a kalsuan uh ciangin

⁶ amah in, "Ka thugen ngai un: "Note lakah TOPA kamsang a om ciangin, ama tungah mangmuhna tawh ka kilak a, mang sungah amah ka hopih hi.

⁷ Ahi hangin ka nasem Moses tua bang ahi kei hi; amah ka inn sung khempeuh ah a muanhuai hi.

⁸ Amah tawh maitang kituahin ka hopih hi; khiat lai ding hi loin a kitel sinsen hi; amah in TOPA pianzia a mu hi. Tua ahileh bang hangin ka nasempa Moses langgen ding lau lo na hi uh hiam?" a ci hi.

⁹ Amaute tungah TOPA hehna kuanga amaute a nusia hi.

¹⁰ Puanbuk tungsan panin meii a kilakkhiat toh ciangin tua lai-ah Miriam dinga - phakin e vuk a bang hi. Tuanu lamah Aaron kihei-a amah a phak lam a mu hi;

¹¹ Amah in Moses kiangah, "Ka topa aw, nong hehpihna-in haitat-a ka bawl uh mawhna hangin kote hong mawhsak kei in.

¹² Amah a nu sul sung pana suakkhia alang kine beisa naungek bangin hisak kei in," a ci hi.

¹³ Tua ciangin Moses in TOPA kiangah, "Pasian aw, nong hehpihna-in tuanu damsak in," ci-in a kiko hi.

¹⁴ TOPA in Moses kiangah, "Tua numei a pa in a maitang a cil phih leh ni sagih sung a mai zum ding hi lo ahi hiam? Tuanu ni sagih sung giahphual pualamah tuam koih in; tua khit ciangin amah kipaipih kik thei ding hi," ci-in a dawng hi.

¹⁵ Tua ciangin giahphual pua-ah ni sagih sung Miriam kituam koiha, amah a kipaipih kik mateng meiipi a kikhin nai kei hi.

¹⁶ Tua khit ciangin mite in Hezeroth nusia-in Paran Sehnel-gam ah giahphual a sat uh hi.