Micah 5 - Zokam International Version

Bethlehem Pan Ukpa Kamciam

¹ Khuapi galkapte a aw, i galte in hong umcih khin uh ahi manin na galkapte uh kithawisak un. Amaute in molhtumin Israel gam-ukpa biang sat ding uh hi.

² Ahi hangin nang Bethlehem Ephrathah aw, Judah bawng’te b sung pan aneu na hi hangin nang sungah Israel ukpa ding khat kei adingin a piangkhia ding hi; amah tanglai hunte pan c tangtawng pek pana d omsa ahi hi.

³ Tua ahi ciangin numei in nausuah hun khempeuh a khit hun mateng Israel kinusia phot dinga, a omlaisun a sanggamte, Israel mite pawl dingin a ciah kik ding uh hi.

⁴ TOPA hatna sungah amah dingkipin, TOPA ama Pasian min thupi sungah a tuuhonte a cing ding hi. Tua ciangin amau liatna in leimong dong ban ding ahi manin amaute galmuangtakin a teng ding uh hi.

⁵ Tuateh amaute lungmuanna amah hi ding hi. Assyria mite in i gam hong sima, i kulh muanhuaite kantanin a pai uh ciangin eite in ama langkhatah tuucing sagih tham lo, makai giat nangawn i dingsak ding hi.

Hutkhiatna le Siatsakna

⁶ Amaute in namsau tawh Assyria gam uk e ding uh a, namsau dawhsa f tawh Nimrod gam a uk ding uh hi. Amah i gamgi sungah hong luta, i gam hong sim ciangin Assyria-te panin eite hong hukhia ding hi.

⁷ A baanglai Jacob-te pen, mihing tampite lakah mihing sep ahi lo, mihing tunga kinga zong ahi lo TOPA tungpan daitui le lopa tunga guahtui a bang ahi ding uh hi.

⁸ Minamte lakah a baanglai Jacob-te, om ding uh a, mi tampite laizangah tulaka gamsate laka humpinelkai le tuuhonte laka humpinelkai khanglaite in a pai kawmun mancipin balzan uh a, kuamah in a hotkhiat theih loh bangin a gamta ding uh hi.

⁹ Na galte uh zawhna khut hong kilaamtosak dinga, na galte khempeuh a kisusia khin ding hi.

¹⁰ TOPA in, "Tua ni ciangin note laka na sakolte uh maimangsakin na sakollengte uh ka susia ding hi.

¹¹ Na gam khuapite uh ka susia dinga, na mun muanhuaite uh ka balkham ding hi.

¹² Na mibum siamte uh ka siasak dinga, ai na san thei nawn kei ding uh hi.

¹³ Na khuak tawm uh milimte le no laka na suang siangthote uh ka susiagawp ding hi; na khutte uh bawlsate na bia nawn kei ding uh hi.

¹⁴ Note lakah Asherah khuamte g ka botkhia dinga, na khuapite uh ka susiamang ding hi.

¹⁵ Keimah in ka thu hong mang lo minamte tungah hehna le thangpaihna tawh a phu uh ka la ding hi," cikhia hi.