Micah 3 - Zokam International Version

Makaite le Kamsangte Kitai

¹ Tua ciangin keimah in, "No Jacob makaite, Israel innkuan gam-ukte aw, ngai un. Thutang a thei ding note hi lo maw,

² no a hoih mudah a, a hoih lo a itte aw, ka mite vunhawka, a guh tunga satak kheuhkhiate aw;

³ ka mite’ sa a nete, a vun uh hawka a guh uh a suzante, sikbeel a kan ding sa satnen bangin satnen a, beel sunga suan ding banga a hihte. Thutang thei lo ding na hi uh hiam?" ka ci hi.

⁴ Tua ciangin amaute TOPA tungah kiko ding uh a, ahi hangin a dawng kei ding hi. Amaute gamtatsia uh ahi manin tua hun ciangin amaute panin a maitang a sel ding hi.

⁵ TOPA gen hih ahi hi: "No kamsangte in ka mite lam a khialsak, amaute in an hong vak uh leh amaute lungnopna tangkosakin hong vak kei uh leh gal tuah ding na gelkholhsak uh hi.

⁶ Tua ahi ciangin note tungah mangmuh kholh lohin zan hong tung dinga, aisanna loin khuamial hong tung ding hi. Kamsangte adingin ni tum dinga, amaute adingin sun a mial ding hi.

⁷ Thumute maizum ding uh a, thugenkholte a lungkim kei ding uh hi. Pasian in dawng lo ahi manin a vekun a maitang uh a hum ding uh hi," a ci hi.

⁸ Ahi hangin kei ka hileh Jacob khialhna le Israel mawhna pulak dingin vangliatna, TOPA Kha le thutang le hatna tawh ka kidim ding hi.

⁹ No Jacob innkuan makaite, Israel innkuan gam-ukte, thutang deih lo-a thumaan a khialin a heite aw za un;

¹⁰ Sisan luangsakin Zion na lam uh a, kheltatna tawh Jerusalem na lam uh hi.

¹¹ Tuanu makaite in golhguk sum tawh thu khen uh a, ama siampite in thaman ngah nadingin thu hilh uh a, ama kamsangte in sum ngah nading bekin kam a sang uh hi. Tua hi napi TOPA tungah kinga-in, "Eite lakah TOPA om hi lo hiam? Eite tungah siatna hong tung kei ding hi," ci uh hi.

¹² Tua ahi ciangin nangma hangin Zion khua sung lo bangin kikho dinga, Jerusalem ninkholnapi suakin, biakinnpi omna mual gammang lak a suak ding hi.