Micah 2 - Zokam International Version

Mite Gelna le Pasian Gelna

¹ Lupna tungah gitloh ding a gelgelte aw, gimna nak thuak na nucia! Amau hih theih ding hun ngah uh ahi manin zingsang khuavak phetin a semkhia pah uh hi.

² Amaute in lo a deihgawh uh leh matsak uh a, inn a deihgawh uh leh a laksak uh hi. Amaute in khembawlin mi inn laksak uh a, a lawmte gouluah a sut uh hi.

³ Tua ahi ciangin TOPA in: "Hih mite tungah gimna tunsak ding ka geela, tua panin na kihonkhia thei kei ding uh hi. Tuahsiat hun ta ahi manin, na kiphatsak pai nawn kei ding uh hi.

⁴ Tua ni ciangin mite in note thugentehna-in hong nei ding uh hi; amaute in hih dahla hong phuah ding uh a: ‘Eite sia dipdep ta hang; ka mite neihsa teng kihawmmang khin. Amah in kei tung pan lakhia khin! I lote mi lehhekte tungah a hawmthang zo uh hi,’ ci uh hi," hong ci ding uh hi.

⁵ Tua ahi ciangin TOPA mite kikhopna ah ai san-a leitang hawm ding kuamah na nei kei ding uh hi.

Kamsang Zuaute

⁶ Amau kamsangte in, "Thu gen nawn kei un. Hih bang thute gen huai lo hi; tua bangte in ko hong minsiasak zo kei ding hi," a ci uh hi.

⁷ Jacob innkuante aw, "TOPA Kha heh ahi hiam? Hihte ama bawl mah ahi hiam?" kici ding ahi hiam? "A thutang mite adingin ka thugente a hoih hi lo ahi hiam?

⁸ A nunungna ah gal bangin ka mite dingto uh hi. Galdo khina ciahte bangin note in bangmah khual loin na kituahpih peuhpeuh uh puantualpite na sut uh hi.

⁹ Ka mite’ numeite amau inn nuam panin na hawlkhia uh hi. Amaute tate tunga ka thuphate a tawntungin na tansak uh hi.

¹⁰ Ding unla paikhia un! Ahang in, hih lai no khuamun ding hi lo hi; bang hang hiam cih leh a hoih kik thei nawn lo dingin kisia khin ahi manin munsia ahi hi.

¹¹ Zuauphuak le mikhem khat hong pai-in, ‘No ading zu tampi le zucil a om nadingin kam kong sansak ding hi,’ hong cileh amah hih mite deih kamsang hi lian ve!

Hutkhiat ding Kamciam

¹² "Jacob aw, note khempeuh kong kaikhawm taktak ding hi; Israel a baanglaite pel loin kong kaikhawm taktak ding hi. Lonona muna tuute tuu buk sunga khum bangin amaute ka puak kik ding hi; tua mun ah mihing a dim kik ding hi.

¹³ Amaute lampi a honsakpa amaute mai-ah a pai ding hi; amaute in kongpi sukhamin pusuakkhia ding uh hi. A kumpipa uh amaute mai-ah pai-in TOPA amaute mai-ah a masa ding hi.