Matthew 14 - Zokam International Version

Baptize-pa John Ngawng Kitan

¹ Tua hun laitakin gam-ukpa Herod in Jesu thu a kigenna a za hi.

² Tua ciangin a sawltakte kiangah, "Hih pa, Baptize-pa John ahi hi. A sisa hong tho kik hi ngel ding hi! Tua hanga amah in nalamdang bawl theihna vang nei hi," a ci hi.

³ Herod in a naupa Philip zi Herodia hangin John mana a hen khit ciangin thong sungah a khum hi.

⁴ Tua pen John in Herod kiangah, "Tuanu na tenpih ding thukham tawh kituak peuhmah lo hi," a cih hang ahi hi.

⁵ Herod in amah a thah nop hangin mipite in amah kamsangin ngaihsun uh ahi manin mipite a kihta hi.

⁶ Herod suah ni pawi-in amau et dingin Herodia tanu a lam hi. Herod a lungkim lua ahi manin,

⁷ kiciam a tuanu nget peuhpeuh piak dingin a kamciam hi.

⁸ A nu hilhtawm bangin, "Baptize-pa John lutang kuangdai khatin hong pia in," ci-in a ngen hi.

⁹ Kumpipa lungdong a, ahi hangin a kiciamnasa le a lenglate hangin tuanu ngetna banga piak ding le

¹⁰ thong sunga John ngawng tan dingin thu a pia hi.

¹¹ Ama lutang kuangin hong kitawi-a numeino kipia hi; amah in a nu a piasawn hi.

¹² John nungzuite pai uh a. a luang la in a vui uh hi. Tua ciangin pai uh a Jesu a ko uh hi.

Jesu in Tulngate Vak

¹³ Jesu in tua thupiang teng a zak ciangin gunkuangin tuanga gamdaih na mun lamah a kihemkhia hi. Hih thu a zak uh ciangin khuapite panin mihonte khe-in va pai uh a, a nung a zui uh hi.

¹⁴ Jesu a kumkhiat ciangin mihonte mu a, amaute khuatuah in a cinate uh a damsak hi.

¹⁵ Nitak lam neh ta ahi ciangin a nungzuite a kiangah va pai uh a, "Hih lai lah gamtawng hi-a ni lah niam lua ta hi. Khuate ah pai-in a an ding uh lei dingin mihonte ciahsak in," a ci uh hi.

¹⁶ Jesu in, "Amaute paikhiat kul lo hi. A nek ding uh bang khatpeuh pia un," ci-in a dawng hi.

¹⁷ Amaute in, "Anlum nga le ngasa nih bek ka nei uh hi," ci-in a dawng uh hi.

¹⁸ Amah in, "Tuate hiah hong la dih un," a ci hi.

¹⁹ Tua ciangin mipite lopa tungah a tusak uh hi. Tua anlum nga le ngasate gel la-a vantung lam ento in, lungdam a koh khit ciangin anlumte a balkham hi. Tua ciangin nungzuite pia a, nungzuite in mipite lakah a hawm uh hi.

²⁰ Amaute khempeuh in ne uh a, a kham pikpek uh hi. Nungzuite in a khamvalte uh a neng a themin a top uh leh bawmta sawm-le-nih tak a pha hi.

²¹ Tua an nete numei le naupang simloh pasal tulnga bang a pha hi.

Jesu Tui Tungah Pai

²² Jesu in a nungzuite thakhatin gun kuangah tuangsak a, ama maiah galkah sakin mihonpite a ciahsak hi.

²³ Mihonpite a ciahsak khit ciangin a mah kia thungen dingin mualtung ah a paito hi. Nitak ciangin amah kia tua lai ah a om hi.

²⁴ Ahi hangin gunkuang pen tuigei panin gamla a simna tung ta a, huih in lehmut ahi manin tuihualte in a satsat hi.

²⁵ Zingsang vil lina sungin Jesu a mau lam zuanin tui tungah a pai hi.

²⁶ Nungzuite in amah tui tungah a pai a muh uh ciangin a lau mahmah uh hi. Amaute in, "Hua lai-ah sikha," ci-in lau lua in nakpi in a awng uh hi.

²⁷ Ahi hangin amaute kiangah Jesu in, "Lau kei un! Keimah ka hi hi. Hong kihta kei un," a cipah hi.

²⁸ Peter in, "Topa nang na hileh, kei zong na kiang zuanin tui tungah kong pai nading thu hong pia in," ci-in a dawng hi.

²⁹ Jesu in, "Hong pai ou," a ci hi. Tua ciangin gunkuang panin Peter tuakkhia a, Jesu lam zuanin tui tungah a pai hi.

³⁰ Ahi hangin huihpi a muh ciangin lau-in tumsuk dektak a, "Topa hong hon ou," ci-in a awng khia zal hi.

³¹ Jesu in a khutin manphei pah a, "Upna neupa aw, bang hangin lunghei nei se na hi hiam?" a ci hi.

³² Gunkuang sung a tun uh ciangin huih nung a dai kiuhkeuh hi.

³³ Gunkuang sunga om teng in, "Pasian Tapa na hi takpi hi," ci-in Jesu a bia uh hi.

³⁴ Amaute galkah uh a Gennesaret a tung uh hi.

³⁵ Tua lai-a mite in Jesu a hilam a theihtel uh ciangin a kima khua khempeuhah thu a zasak uh hi. Mite in amau cinate paipih uh a,

³⁶ a puantualpi mong a lawnsak nadingin a thum uh hi. Amah a lawng khempeuh a damsiang hi.