Mark 16 - Zokam International Version

Thawhkikna

¹ Sabbath ni a bei khit ciangin Mary Magdalene, James nu Mary le Salome-te in Jesu luang a zut nading uh gimnamtui a keng uh hi.

² Nipikal ni masa ni zingsang tung ni suah khit phetin amaute hanah hawh uh a,

³ "Han kongvang khakna suangtum kuan hong likkhiatsak ding hiam?" ci-in khat le khat a kikum uh hi.

⁴ Ahi hangin a daktoh uh ciangin a lian mahmah tua suangtumpi a tukkhia khin zo a mu uh hi.

⁵ Amaute han sungah a lut uh leh, puantualpi pak silh tangval khat, a taklam-a tu mu uh a, amaute a patau uh hi.

⁶ Amah in, "Patau kei un, a kikilhlum Nazareth mi Jesu a zong na hi uh hi. Amah tho kik zo hi! Amah hih lai-ah om lo hi. A kisialna mun en un.

⁷ Ahi hangin pai unla nungzuite le Peter kiangah, "Note mai Galilee ah amah na pai ding hi. Ama hong gensa bang tektekin, tua lai-ah amah na mu ding uh hi,’ ci-in va gen un,"a ci hi.

⁸ Tua numeite lungmang le ling kawmsa-in han pan paikhia-in a tai uh hi. Amaute lau uh ahi manin kuama kiangah bangmah a gen kei uh hi.

⁹ Nipikal ni masa ni, zingsang tung, Jesu a thawh kik khit ciangin a sung pana dawi sagih a hawlkhiatna nu Mary Magdalene kiangah a kilang masa pen hi.

¹⁰ Tuanu pai-in amah tawh a omkhawm ngei, adah a kap laite kiangah thu a gen hi.

¹¹ Jesu nungta-a amah in mu khin zo cih thu amaute in a zak uh ciangin a um kei uh hi.

¹² Tua khit ciangin tuate lakah nih gamsung lam zuanin a pai laitakun amaute kiangah meltuamin Jesu a kilang hi.

¹³ Hihte gel kileh kik uh a, adangte kiangah a va koh uh hangin amau zong a um tuan kei uh hi.

¹⁴ Tua nung ciangin nungzui Sawm le khatte in an a nek laitakun amaute kiangah a kilang hi. Amah a thawh kik khit ciangin amah a mute genna a up loh teltalna hang uh le amaute uplahna hangin amaute a tai hi.

¹⁵ Amah in amaute kiangah, "Leitung mun khempeuh ah pai unla, a piansaksa khempeuh tungah lungdamna thu na hilh un.

¹⁶ Um-a a kibaptise-te peuhmah kihonkhia dinga, ahi hangin a um lo peuhmah a kimawhpaih ding hi.

¹⁷ Tua ciangin a umte ahileh hih limte in a zui ding hi: Keima minin dawite a hawlkhia ding uh hi; amaute pauthakte in a pau ding uh hi.

¹⁸ A khutun gul a man ding uh hi; sihtheihna gu a dawn uh hangin bangmah a ci peuhmah kei ding uh hi. Amaute in cinate tungah a khut uh nga ding uh a, amaute a dam ding uh hi," a ci hi.

¹⁹ Topa Jesu in amaute a vaikhak khit ciangin amah vantungah kilato a, Pasian taklamah a tu hi.

²⁰ Tua ciangin nungzuite paikhia uh a mun khempeuh ah thu a hilh uh hi. Topa in amaute seppih a, amaute a zui limte in ama thugen a kipsak hi.