Luke 2 - Zokam International Version

Jesu Suahna

¹ Tua hun laitakin Rome khuapi uk bupah mi a kisim nading Caesar Augustus in thukip a pia hi.

² (Hih in Syria gama Quirinius gam-ukpa ahi zawh kisimna a khatveina ahi hi)

³ Tua hi-a mi khempeuh amau khuapi ciat ah minkhum dingin a pai uh hi.

⁴ Tua ciangin Joseph zong Galilee gam Nazareth khuapi panin Judea gamah pai-a David gui le suan ahi manin David khuapi Bethlehem ah a pai hi.

⁵ Kiteng dingin a dotsa nausuak kuan Mary tawh min khum dingin tua khua ah a paikhawm uh hi.

⁶ Tua lai-ah a om laitakun nausuah hun tunga,

⁷ amah a tacil suakin tapa ahi hi. Amah in puanza bekin tuna, zintun innah amau ading inndei awng lo ahi manin tua naungek gan ankuang sungah a sial hi.

Tuucingte le Vansawltakte

⁸ Tua nai-a lopaangte ah zan laitaka a tuute uh a vil tuucingte a om uh hi.

⁹ Amaute kiangah Topa vansawltak khat kilanga, amaute kimkotah Topa minthanna tangin a lau mahmah uh hi.

¹⁰ Ahi hangin vansawltak in amaute kiangah, "Lau kei un, mi khempeuh ading a lian mahmah lungdamna-thu note kong puak hi.

¹¹ Tuni-in David khuapi ah note ading Honpa khat suak khin zo hi; amah Christ b Topa ahi hi.

¹² Note tungah hih lim ahi ding hi. Note in naungek khat puanzabek tawh kituna, gan ankuang sunga kisial na mu ding uh hi," a ci hi.

¹³ Thakhatin tua vansawltak tawh, vantung galkap hon tampitak kilang zuah uh a,

¹⁴ "A sang penna-a Pasian minthang henla, leitunga ama angvan mite tungah lemna om ta hen."ci-in Pasian a phat uh hi.

¹⁵ Vansawltakte in amaute nusia in vantungah a ciahsan uh ciangin tuucingte in, "Bethlehem ah pai-in Topa hong gensa hih thupiang va en dih ni," ci-in khat le khat a kiho uh hi.

¹⁶ Tua ciangin amaute paikhia mengmeng uh a, Mary Joseph le gan ankuang sunga kisial naungek a mu uh hi.

¹⁷ Amaute in amah a muh khit uh ciangin hih naungek tawh kisai amaute kianga kigen thu a kizelsak kawikawi uh hi.

¹⁸ Tua hi-a tuucingte thugen a zate khempeuh in lamdang a sa uh hi.

¹⁹ Ahi hangin Mary in hih thute kemcing gige-in a lungtangah a ngaihsunsun hi.

²⁰ Tuucingte ciah kik uh a, amaute tunga kigensa bang tektekin a zak uh le a muhte uh hangin Pasian phatin a minthangsak uh hi.

Biakinnpi-ah Jesu Ki-ap

²¹ A nigiatna ni, ama vun-at hun ciangin, amah a kipaii ma-a vansawltak phuahsa bangin a min Jesu a phuak uh hi.

²² Moses thukham tawh kizui-in amaute a kisiansuah ding hun a cin ciangin Joseph le Mary in Topa tunga ap dingin amah Jerusalem ah paipih uh a,

²³ ("Tapasal masa peuhmah Topa tungah ap ding ah hi" c ci-a Topa Thukham sunga kigelh bangin)

²⁴ Topa Thukham sunga kigen tawh kizui-in "Vakhu kop khat ahikeh kawl vakhuno nih" d tawh biakpiakna a pia ding uh hi.

²⁵ Tua hunlaitakin Jerusalem ah Simeon kici biakna hahkat mi thumaan khat a om hi. Amah, Israel-te kihehnemna ngakin a om hi-a ama tungah Khasiangtho a om hi.

²⁶ Amah in Topa Christ a muh matengin a si kei ding hi, cih Khasiangtho in ama tungah a laaksa ahi hi.

²⁷ Kha sawlna tawh amah biakinnpi tualah a pai hi. Thukham ngeina in a kalh banga a bawl dingin a nu le a pa-te in naupang Jesu a paipih uh ciangin,

²⁸ Simeon in amah la-in tawi-a Pasian phatin:

²⁹ "Thuneipipen Topa aw, na kamciamsa bangin na nasempa tu-in lungnuamtakin khahkhia a ta in.

³⁰ Ahang in, ka mitte in na hotkhiatna a mu zo hi,

³¹ tua pen mi khempeuh mitmuh ah na bawlkholhsa hi-a,

³² Gentile-te tunga kilaak nading khuavak le na mi Israel-te minthan nading ahi hi," a ci hi.

³³ Naupang nu le pa-te in amah tawh kisai-a thu kigente piandang a sa uh hi.

³⁴ Tua ciangin Simeon in amaute thupha pia-a, a nu Mary kiangah, "Hih naungek in Israel gam sunga mi tampi a puk nading, a thawh nading le a kilanggenna lim dinga laitansa ahi hi.

³⁵ Tua hi-a mi tampite lungtang ngaihsutna a pholak nading ahi hi. Tuateh nang hinna zong namsau in a sunlet ding hi," a ci hi.

³⁶ Tua lai-in Asher beh pana Phanuel tanu Anna kici kamsang numei khat a om hi. Amah tek mahmah ta hi. A pasal tawh a kiten zawh kum sagih bek nungta khawm uh a,

³⁷ amah kum sawm giat le li a phak dong a meigong hi. b Amah in biakinnpi nusia ngei lo-a, sun le zan-in Pasian bia a, antangin thu a ngen hi.

³⁸ Tua hun lianin amaute kiangah tuanu pai-in Pasian tungah lungdam thu puakin Jerusalem kitatkhiat ding a lamente khempeuh tungah hih naupang thu a gen hi.

³⁹ Joseph le Mary in Topa Thukham kalh khempeuh a bawl khit uh ciangin Galilee gam amau khua Nazareth khuapi ah a ciah kik uh hi.

⁴⁰ Tua ciangin naupang khangto-a, a tha a hat hi; amah pilna tawh kidim a Pasian hehpihna a tungah a om hi.

Biakinnpi-ah Naupang Jesu

⁴¹ Kum simin a nu a pa-te Paisan Pawi sim dingin Jerusalem ah a pai uh hi.

⁴² Amah kum sawm-le-nih a phak ciangin a ngeina omsa tawh kizui-in Pawi sim dingin a pai uh hi.

⁴³ Pawi ven khit a nu a pa-te a ciah kik laitakun Jerusalem ah naupang Jesu a tam lai hi. Ahi hangin amaute in tua thu a phawk kei uh hi.

⁴⁴ Amah tawh a tonkhawmin kingaihsun uh ahi manin ni khat lam a pai khin ta uh hi. Tua ciangin a tanaute le a lawmte lakah amah a zong pan uh hi.

⁴⁵ Amah a muh loh uh ciangin a zong dingin Jerusalem ah a kileh kik uh hi.

⁴⁶ Ni thum khit ciangin amah biakinnpi tualte-a siate lakah tu-in amaute thugen ngai-a thu dongin a om laitak a tuak uh hi.

⁴⁷ Ama teltheihna le a dawnnate a za mi khempeuh in lamdang mahmah a sa ciat uh hi.

⁴⁸ A nu a pa-te in amah a muh uh ciangin lamdang a sa uh hi. A nu in ama kiangah, "Ka ta aw, bang hangin hih banga hong bawl na hi hiam? Na pa tawh lunghimawh in nang kong zongzong uh hi," a ci hi.

⁴⁹ Amah in, "Bang hangin kei hong zong na hi uh hiam? Ka Pa inn-a a om ding mah ka hilam thei lo na hi uh hiam?" a ci hi.

⁵⁰ Ahi hangin amaute in amau tunga a cihna thu a theitel zo kei uh hi.

⁵¹ Tua ciangin amaute tawh Nazareth ah paisuka, a thu uh a mang hi. Ahi hangin a nu in hih thute khempeuh a lungsim sungah a kemcing gige hi.

⁵² Jesu a pilna le a pumpi khanpha-in khanga Pasian le mite pahtakna a ngah hi.