Kilaakna 9 - Zokam International Version

¹ Vansawltak a ngana in a pengkul mut-a, van pan leitung ah a kia aksi khat ka mu hi. Tua aksi Kawhawmpi vang honna tawhtang kipia hi.

² Amah in Kawhawmpi a hon ciangin tua sung panin pummei phualpi khu bangin meikhu a suakkhia hi. Tua Kawhawmpi pana meikhu in ni le van a mialsak hi.

³ Tua ciangin meikhu lak panin kauphete leitung ah tuaksuk uh a, leitunga aikam vangliatna bang vangliatna amaute kipia hi.

⁴ Tuate tungah, leitunga lopate, ankung khatpeuh ahikeh singkung susia loin, a taltang tunga Pasian ciamtehna a nei lote bek a suksiat dingun kihilh hi.

⁵ Amaute in a thah nading uh vangliatna kipia lo-a, ahi hangin kha nga sung gawt thei bek ding uh hi. Tua a thuak uh gimna in, aikam in mi a deh cianga a nat bang ahi hi.

⁶ Tua hun laitakin mite in sihna zong ding uh a, ahi hangin a mu kei ding uh hi; amaute a si nuam ding uh a, ahi hangin sihna in amaute a pel ding hi.

⁷ Tua kauphete, galsim dinga kithawi sa sakolte tawh kibang hi. Amaute lutungah kham kumpi lukhu tawh kibang khu uh a, a maitang un mihing maitang a sun hi.

⁸ A sam uh numeite sam banga, a hate uh humpinelkai ha a bang hi.

⁹ Sik awmdal bang awmdal nei uh a, a kha ging uh, galsimna-a sakolleng tampi tai henhan ging a bang hi.

¹⁰ Mei nei uh a, aikam bangin a deh uh hi. A mei-uah mite kha nga sung a thuaksiatsak theih nading uh vangliatna a nei uh hi.

¹¹ Amaute in Kawhawmpi vansawltak, kumpi-in a nei uh hi. Ama min Hebrew pau in Abaddon hi a, Greek pau in Apollyon b ahi hi.

¹² A masa pen gimna bei zo a, gimna adang nih tung lai ding hi.

¹³ Vansawltak a gukna in a pengkul mut a, Pasian mai-a kham biakna-tau kite c panin awging khat ka za hi.

¹⁴ Tua in pengkul tawi vansawltak a gukna kiang ah, "Euphrates gunpi-a kihen vansawltak lite khahkhia un," a ci hi.

¹⁵ Hih nai, hih ni, hih kha, hih kum lian adingin a kigingsa-a kikoih tua vansawltak lite, leitung mi seh thum suah seh khat a that dingin kikhahkhia hi.

¹⁶ Sakol tungtuang galkapte awn zanih a pha hi. Amaute a phazah ka za hi.

¹⁷ Ka mangmuhna-a ka muh sakolte le a tuangte hih bang ahi hi: A awmdalte uh meikuang bangin a san, a ciipdum le kaat banga eng tawh ahi hi. Sakolte lutangte humpinelkai lutang tawh kibang a, a kam panun mei, meikhu le kaat a suakkhia hi.

¹⁸ Amaute kam pana suak khia mei, meikhu le kaat gimna nam thumte in, mihingte seh thum suah seh khat a thatlum hi.

¹⁹ Tua sakolte a kam sung uh le a mei uhah vangliatna a om hi; a meite uh gul bang, lutang nei-in tua tawh mi a liamsuah uh hi.

²⁰ Hih pulpite in a thah baang a om lai leitung mite, a khut uh tawh a sep uh nate panin a kisik nai kei uh hi; amaute in dawite, kham, ngun, sumngo, sing le suang milimte - khua mu thei lo, khua za thei lo, lam pai thei lo milimte a biak uh a tawp tuan kei uh hi.

²¹ Amaute in tualthahnate, aisannate, numei-pasal paktatnate le a guktaknate uh zong a kisik tuan beek kei uh hi.