Joshua 18 - Zokam International Version

Gam Omlaite Khenna

¹ Israel mipi bup Shiloh ah kikhawm uh a, tua lai-ah Kikhopna Puanbuk a lam uh hi. Tua gam amau ukna nuai-ah a tun khit hangin,

² gouluah a ngah nai lo Israel behte sagih a om lai hi.

³ Tua ciangin Joshua in Israel-te tungah: "TOPA na pate uh Pasian in note hong piaksa gam na lak ding uh bang tanvei ngak lai ding na hi uh hiam?

⁴ Beh khatah mi thumta seh un. Keimah in amaute gamvel dingin ka sawlkhia dinga, amaute in a goutanh ciat ding uh tawh kizui-in lai-in a ciamteh ding uh hi. Tua ciangin kei kiangah hong ciah ding uh hi.

⁵ Note in na gam uh seh sagih na suah ding uh hi. Leitaw lama ama gamah Judah omsuak dinga, leilu lama ama gam mah ah Joseph innkuan a omsuak ding hi.

⁶ Gam, khen sagih a khenna lai ah na ciamteh khit uh ciangin hih lai keima omna-ah hong puak in, TOPA eite Pasian omna munah ai kong lotsak ding hi.

⁷ Ahi hangin Levi-te in no lakah tanh a ngah kei ding uh hi; bang hang hiam cih leh TOPA tungah siampi nasep amau gouluah ahi hi. Tuateh Gad, Reuben le Manasseh beh alangte in Jordan nisuahna-lam pangah amau luahna ngah khin uh hi. TOPA nasem Moses in amaute a piaksa ahi hi," a ci hi.

⁸ Gam sung teng gamlim a suai khia dingin mite a kuan uh ciangin Joshua in amaute lamlak-a, "Pai unla, gam va encianin lai-in hong ciamteh un. Tua khit ciangin kei kiangah hong ciah kik un; keimah in TOPA omna hih lai Shiloh ah ai kong lotsak ding hi," a ci hi.

⁹ Tua ciangin mite kuankhia uh a gamsung khempeuhah a vak kawikawi uh hi. A khuakhua in khen sagih suahin laizial tung khatah ciamteh uh a, Shiloh giahphual a Joshua kiangah a ciah kik uh hi.

¹⁰ Tua ciangin Joshua in Shiloh ah TOPA omin ai lotsak-a, amau beh khenna tawh kizui-in tua lai-ah Israel-te gam a hawmsak hi.

Benjamin Sehtanh

¹¹ Benjamin beh a bawng’bawng’te adingin ai a pha hi. Amau sehtanhna gam, Judah le Joseph behte gam kikal hi a:

¹² Amau gamgi leilu-lam pangah Jordan pan kipanin Jericho leilu-lam siik kantana, nitumna-lam manawhin mualtung gamah lut a Beth Aven sehnel gamah suakkhia hi.

¹³ Tua panin Luz (tua pen Bethel) leitaw-lam siik kantan a, Beth Horon Nuainung leitaw lam mualtunga Ataroth Addon ah paisuk hi.

¹⁴ Mual panin Beth Horon maingatin gamgi leitaw lamah kihei-in nitumna-lam pang leitaw lamah kihei a, Judah mite khuapi khat ahi Kiriath Baal (tua pen Kiriath Jearim) ah suakkhia hi. Hih in nitumna-lam pang ahi hi.

¹⁵ A leitaw-lam pang nitumna lama Kiriath Jearim mongte panin kipana, Nephtoah Tuite nakah gamgi suakkhia hi.

¹⁶ Rephaim Kuam leilu lama om, Ben Hinnom Kuam maingatin mualbul lamah gamgi a paisuk hi. Hinnom Kuam zomsuka, Jebus-te khuapi siik leitaw lamah paisuk in En Rogel a tungsuk hi.

¹⁷ Tua ciangin leilu lamah kual-a, En Shemesh ah pai-in Adummim Ciangpi a maingat Geliloth tawh kizoma, Reuben’ tapa Bohan’ Suangpi a bansuk hi.

¹⁸ Tua in Beth Arabah a leilu-lam siik zoma, tuateh Arabah sungah a lutsuk hi.

¹⁹ Tuateh Beth Hoglah leilu-lam siik ah pai a, Ci Tuipi b gei leilu lama Jordan tun leitaw lamah a suakkhia hi. Hih in leitaw-lam gamgi ahi hi.

²⁰ Nisuahna-lam pang gamgi Jordan gun ahi hi. Hihte Benjamin behte luah ding, a kimkota ciamtehna gamgite ahi hi.

²¹ Benjamin behte in a bawng’bawng’un a nuai-a khuapite a nei uh hi: Jericho, Beth Hoglah, Emek Keziz,

²² Beth Arabah, Zemaraim, Bethel,

²³ Avvim, Parah, Ophrah,

²⁴ Kephar, Ammoni, Ophni le Geba - khuapi sawm le nih le a khua neute ahi hi.

²⁵ Gibeon, Ramah, Beeroth,

²⁶ Mizpah, Kephirah, Mozah,

²⁷ Rekem, Irpeel, Taralah,

²⁸ Zelah, Haeleph, Jebus-te khuapi (tua pen Jerusalem), Gibeah le Kiriath - khuapi sawm le li le a khuaneute ahi hi. Hih in Benjamin bawng’te gouluah ahi hi.