Joshua 16 - Zokam International Version

Ephraim le Manasseh-te Sehtanh

¹ Joseph sehtanh in Jericho tuite nisuahna-lam Jericho a Jordan d panin kipana, tua lai pan paito-in sehnel-gam kantan-a, Bethel mualtung gam sungah a lut to hi.

² Bethel (tua pen Lud) e panin pai lai-a, Ataroth a Ark-te gam kantan in,

³ nitumna-lam ah Japhlet-te gam lamah sukpai-a, Beth Horon Nuainung kual Gezer dong bansukin tuipi ah a tawp hi.

⁴ Tuaci-in Joseph suante Manasseh le Ephraim-te in amau gouluah a ngah uh hi.

⁵ Hih in Ephraim-te a bawng’bawng’a a gam uh ahi hi. Amaute luahna gamgi, Beth Horon Tungnung nisuahna lama om Ataroth Addar panin pai-a,

⁶ tuipi a zom hi. Micmethath panin leilu-lam manawhin Taanath Shiloh dong nisuahna-lam manawhin kualto a, nisuahna-lam Janoah dongah a kantan hi.

⁷ Tua ciangin Janoah panin Ataroth le Naarah dong tuaksuk-a, Jericho nawkin Jordan ah a suakkhia hi.

⁸ Tappuah panin gamgi in nitumna lam manawh a Kanah Kuampi ah tungin tuipi ah a tawp hi. Hih in Ephraim behte in a bawngbawng’ a, a luah uh ahi hi.

⁹ Tua in Manasseh-te luah sung panin Ephraim-te adinga kikhenkhia khuapite le a khuaneute khempeuh zong a huam hi.

¹⁰ Amaute in Gezer a tengsa Canaan-te a hawlkhia kei uh hi; tuni dong Ephraim mite lakah Canaan-te teng uh a, ahi hangin zawhthawh thu in na kisemsak hi.