Jonah 3 - Zokam International Version

Nineveh ah Jonah Pai

¹ Tua ciangin Jonah tungah a nihveina TOPA thu tunga:

² "Khuapi lian Nineveh ah pai inla kong gen thu va tangko in," a ci hi.

³ Jonah in TOPA thu mangin Nineveh ah pai hi. Nineveh pen khuapi thupi mahmah khat ahi hi; ni thum sung kikantan khop hi.

⁴ A ni masa ni-in Jonah kipan a,"Ni sawmli khit ciangin Nineveh kisusia ding hi," ci-in a tangko hi.

⁵ Nineveh mite in Pasian a um uh hi. Antan nading thu thangsak uh a, a neupen pan a lianpen dong a vekpi-un puan hampi a silh uh hi.

⁶ Nineveh kumpipa in tua thu a tun ciangin a kumpi tokhom pan dingkhia a, a kumpi puan suahkhia-in, puan hampi-in kituam a, leivui lakah a tu hi.

⁷ Tua ciangin Nineveh khua sungah thukhat tangko saka: "Kumpipa le a uliante thukip piakna tawh: "Mihing, ganhing, bawnghon, tuuhon an ne tui dawn om thei lo ding hi.

⁸ Mihing ganhing khempeuh in puan hampi silh ding hi. A kua mahpeuh in manlangin Pasian sam uh hen. A ngongtatna uh le a gitloh gamtatnate uh sem nawn peuhmah kei uh hen.

⁹ Eite i siat loh nadingin a hehluatna panin kihei-in Pasian in hong khuatuah loh ding kua in thei ahi hiam?" a cisak hi.

¹⁰ Pasian in amaute hihnate mu-a, a gitlohnate uh a tawpsan uh a muh ciangin khuatuah a, amau tunga a tunsak ding siatna a tungsak nawn kei hi.