Jonah 2 - Zokam International Version

Jonah Thungetna

¹ Jonah in ngapi gil sung pan TOPA ama Pasian tungah thu a ngen hi.

² Amah in: "Ka lungdon hunin TOPA ka sama, amah in kei hong dawng hi. Hankhuk a thukpi panin nong huh ding kong ngena, kong kikona nong za hi.

³ A thukna mun sung nong denna-a, tuipi thukpenna munah ka om a, tui kiveite in kei hong pingpei-in nangma tuihualte khempeuh le na tui kilokte in ka tungah a hong vial hi.

⁴ "Na maitang panin kei hong kihawlkhia ta hi; ahi hangin na biakinnpi siangtho lam ka en kik veve ding hi," ka ci hi.

⁵ Na tui kipei in kei hong delhcip a a, tui thukpi in kei hong umcih hi; tuipi tuipaante in ka lu vialcip hi.

⁶ Mualliante bulpi dong ka tumsuk hi; a nuai-ah lei in kei hong dongcip den hi. Ahi hangin TOPA keima Pasian aw dumpi sung panin ka nuntakna nong laktohsak hi.

⁷ "TOPA aw, ka nuntakna a bah gawp ciangin nang kong phawka, ka thungetna na biakinnpi siangtho sung nang tungah hong tung hi.

⁸ Bangmah a man lo milim beelte in, amau ading hehpihna a taan uh hi.

⁹ Ahi hangin ke’n lungdamna la tawh nang kong bia ding hi. Ka kiciamnasa ka tangtungsak dinghi. TOPA kiang panin hotkhiatna hong pai hi," a ci hi.

¹⁰ Tuateh TOPA in ngasa thu pia a, lei keu ah Jonah luakhia hi.