Joel 2 - Zokam International Version

Kauphe Galkapte

¹ Zion ah pengkul mut un; ka mual siangtho tungah patau kohna gingsak un. TOPA ni tungta ahi manin gama teng mi khempeuh lingsak ta hen -

² lungzin ni le khuamial ni, khuamial ni le meiikai ni nai mahmah ta hi. Ni suaktung vaang mualtung tengah a kiphah bangin a thahat a tam mahmah galkapte hong pai uh hi; tangtawng pana kimu ngei nai lo mailam huna zong a om ngei nawn lo ding ahi hi.

³ Amaute mai-ah mei in hula, amaute nungah mei kuang hi. Amau ma-ah leitung teng Eden huan banga, amau nungah bangmah suakta loin sehnel-gam keu a suak hi.

⁴ Amaute sakol tawh kisun uh a; sakol galkapte bangin koptai uh hi.

⁵ Mual tungah a tuan zuahzuah laitakun sakolleng ging banga, mei kanga puak zuahzuah tawh kibangin, galsim dinga kithawi galkap honpi tawh kibang uh hi.

⁶ Amaute a kimuh ciangin minamte lau lua uh hi; maitang khempeuh daanggawp hi.

⁷ Galhangte bangin galsim uh hi; galkapte bangin kulh tungah kah uh hi. A vekun a gualgualin pai uh a, a pialkhia tuam cih bang om lo hi.

⁸ Kuama mai kitotsak lo uh a, amau maitek tangtakin nawt uh hi. Amaute dal nadinga kibawlte phugawp uh a, pelh loin paisuak uh hi.

⁹ Khuapi la uh a, kulh tung tengah tai uh hi. Inn sung lamah kahto uh hi; guta bangin kongvangneute ah lut uh hi.

¹⁰ Amaute mai-ah lei kilokin van kiling hi. Nipi le khapi mial a, aksite a tang nawn kei hi.

¹¹ A galkapte mai-ah TOPA hawk hi; sim zawh loh galkapte le a thahatte in a thu mang uh hi. TOPA ni thupi mahmah hi-in lauhuai lua mahmah hi. Kua in thuak zo peuhmah ding hiam?

Na Lungsim Tamzansak In

¹² Tu nangawnin TOPA in, ‘Lungsimtakpi-in kisik unla, an tangin kap unla thumin kei hong zuan kik un,’ cikhia hi.

¹³ Puansilh bek hi loin na lungsim uh tamzansak un. TOPA note Pasian lam zuan kik un, ahang in, amah migi-in mi khuatuahpa hi a, lungduai-in it na dim a mawhna liante maisak nuam tawntung hi.

¹⁴ A lungsim khelin hong hehpih kha thei lo ding hiam? An-a biaknate le dawntheih-a biakna ding TOPA note Pasian piak dingin a thupha hong nusiat mawh ding hiam?

¹⁵ Zion ah pengkul mutin antan nading thu pia unla, kikhopna siangtho khat sam un.

¹⁶ Mite kikhawmsak unla mipite siansuah un. A upate sam unla naupangte le nawi ne naungekte kikhawmsak un. A kitengtung zineipa le mo in a lupna inndei nusia-in pai uhhen.

¹⁷ TOPA mai-a nasem siampite, biakbuk innliim le biakna-tau kikal ah kapin thu ngen uh hen. Amaute in "TOPA aw, na mite hong hawilai in; nang hong nuihsante na gou luahsak loin mi namdangte lakah, ‘A Pasian uh koi-ah om hiam?’ cisak peuhmah kei in," cisak un.

TOPA Dawnna

¹⁸ Tua ciangin TOPA in ama gam aam dinga a mite a hehpih ding hi.

¹⁹ TOPA in amaute dawng a dinga, "Keimah in an, lenggah zuthak le sathau kong puak hi; na khamtakua na nek dingun kicing ding hi. Minam dangte nuihsatin na om nawn kei ding uh hi.

²⁰ "Leilu-lam galkapte no kiang pan gamlapi-ah hawlkhia-in leigawtak keugaw gamah ka sawngawp dinga, a madawkte nisuahna tuipi b sungah khia-in a nungdalte nitumna tuipi c sungah ka khia ding hi. Tuate uihin a gimnam lansia mahmah ding hi," a ci hi. Amah in na lianpite d bawl khin takpi hi.

²¹ Leitang aw, lau kei in; nuamin kipak in. TOPA in na lianpite sem khin takpi hi.

²² Gamsate aw, lau kei un; gamsung tengah lo no ta hi; singkungte in gah gah ta a, theikungte le lengguite gah pha mahmah ta hi.

²³ Zion mite aw, kipak un; amah in a thumaanna e sikhiau guah hong pia ahi manin TOPA note Pasian tungah lungdam un. Amah in kum dangte bangin khuapi guah zusakin tuk guah le sikhiau guahte hong zusak hi.

²⁴ Ancilna phualah antang dim dinga, na beelpite uh lenggah zuthak le sathau tawh kidimlet ding hi.

²⁵ "Note lakah kong sawl ka galkap tampi - kauphe honpi le kauphenote, kauphe tuante le kauphe dangte f - kauphete hong neksak kum sunga piang teng kong din kik ding hi.

²⁶ Nek ding tampi nei-in na hau ding uh a, no adingin nalamdang a sem TOPA note Pasian min na phat ding uh hi; ka mite a kimaizumsak nawn kei ding hi.

²⁷ Tua ciangin Israel mite lakah kei ka om dinga keimah TOPA note Pasian ka hina le Pasian dang a om loh lam na thei ding uh hi; ka mite a maizum kik ngei nawn kei ding uh hi.

TOPA Ni

²⁸ Tua khit ciangin mi khempeuh tungah ka kha ka bua ding hi. Na tanu na tapate un thu hilh ding uh a, na khanghamte un mang manin, na khangnote un mang a mu ding uh hi.

²⁹ Tua ni ciangin ka nasem numei le ka nasem pasalte tung nangawn ah ka Kha ka bua ding hi.

³⁰ Leitung le vante ah a lamdangte sisan, meii le meikhu lompi ka lak ding hi.

³¹ A lauhuai mahmah tua TOPA ni a tun ma-in ni khuamial kisuaksakin, khapi sisan kisuaksak ding hi.

³² Ahi hangin TOPA min a lo khempeuh kihonkhia ding hi; ahang in, TOPA gensa bangin Zion Vum le Jerusalem a, a nungta lai sunte lakah TOPA sap mite kihonkhia ding hi.