Jeremiah 9 - Zokam International Version

¹ Ka lutang tuinak hi thei henla, ka mitte khitui nak hi thei leh maw! A kithat ka mite adingin sun le zanin ka kapkap ding hi.

² Ka mite a vekpi un angkawm hat, a muanhuai lo mihonpite ahi manun sehnel-gam ah ka zintun buk ding mun khat nei-in amaute nusia-in taisan thei leng!

³ "Amaute in a leii uh thalpeu bangin zuauthu lot nadingin zang uh a, gam sungah a gualzawh b nadingun thutak a zang kei uh hi. Amaute in mawhna khat khit khat bawl uh a, kei hong thei lo uh hi," TOPA in cikhia hi.

⁴ "Na lawmte uh kidawm unla, na sanggamte uh muang kei un. Ahang in, sanggam peuhmah zuauphuak c hi a, lawm peuhmah gensiat hat ahi hi.

⁵ Lawmpa in a lawmpa khem a, thutak gen khat beek a om kei hi. Amaute in a lei uh zuau gen nadingin sinsak uh a, mawhna bawlbawlin amau le amau kigimsak uh hi.

⁶ Khemna lakah nang d na teng a; zuau phuakin kei hong theih ding uh a nial uh hi," TOPA in cikhia hi.

⁷ Tua ahi ciangin Thahatpen TOPA gen hih ahi hi: "En un, amaute suangtui-in ka zia-et ding hi; ka mite mawhna hangin tua lo bang hih thei lai ding ka hi hiam?

⁸ A leii uh sihna thaltang hi a, zuauthu a gen hi. A innvengte tungah a kampau uh a zol hangin, a lungsim sungah amah thang a siah hi.

⁹ Hih thu hangin amaute dan tuaksak lo ding ka hi hiam? TOPA in cikhia hi. "Hici-a gamta minam khat tungah kei mahmah in hih bangin phu la lo ding ka hi hiam?" a ci hi.

¹⁰ Mualliante adingin kapin ka tau dinga, sehnel-gam lonona kahtapin ka taamlo ding hi. Amaute kisusia-in khualzin om nawn lo dinga, bawnghon ham a kiza nawn kei hi. Huih lak vasate lengmang khin a, gamsate a om nawn kei hi.

¹¹ "Jerusalem vansia kholna le se-alte gamtatna mun ka suaksak ding hi. Tua munah kuamah a ten theih loh nadingin Judah khuapi gamval ka suaksak ding hi," a ci hi.

¹² Hih thu a theitel ding mipil kua om ahi hiam? TOPA in kua lamlaka telgen thei ding ahi hiam? Bang hangin kuama kantan theih loh dingin hih gam kisia-in sehnel-gam bangin gamvalin kikoih ahi hiam?

¹³ TOPA in, "Amaute mai-ah ka lah ka thukham taisanin ka thukham mang loin zong a zui kei uh hi.

¹⁴ Tua sangsikin amaute lungtang khauhna zui uh a; a pate uh hilhsa bangin Baal nung a zuih hang uh ahi hi," a ci hi.

¹⁵ Tua ahi ciangin Israel-te Pasian Thahatpen TOPA gen hih ahi hi: "En un hih mite akhaa an ka nesak dinga, gu khahsa tui ka dawnsak ding hi.

¹⁶ Amaute theih loh a pate un zong a theih tuan loh uh minamte lakah ka thehthang dinga, amaute ka siatsak khit matengin namsau-in ka nungdelh ding hi," a ci hi.

¹⁷ Thahatpen TOPA gen hih ahi hi: "Tu-in ngaihsun dih un! Sikah numeite sam un; kah siam tata vaikhak un.

¹⁸ Amaute kinawhsak unla i mitte ah khitui dimletin, i mitkhu panin tui a phul matengin eite hong kah uh hen.

¹⁹ Zion panin kahna aw kiza a: "Eite bangci siat tazen i hia! I mai zum na lawmlawm ei! I inn teng kisia ta hiven, i gam i nusiat kul ta ve!’ ci uh hi," a ci hi.

²⁰ Tu-in numeite aw, TOPA kammal za un; ama muk pana kammalte na bil uh dawh un. Na tanute uh kahzia ding hilh un; khat le khat tamlawhna kihilh un.

²¹ I kongvangneute zui-in sihna hong kahto a, i kulh muanhuaite sungah hong lut hi; lamdung ah naupangte attan a, mipi tual-awng ah khangnote a bantan hi.

²² "TOPA cihkhiat hih ahi hi: "‘Mihing siluangte gamlakah ki-ek nusiat dinga, anlate nunga ankung bangin kuamah in amaute a khawm kei ding hi,’ ci un," a ci hi.

²³ TOPA gen hih ahi hi: "Mipilte in a pilna uh kisaktheihpih kei uh henla, thahatte in a hatna uh kisaktheihpih loin a haute in a hauhna uh kisaktheihpih kei uh hen;

²⁴ ahi hangin a kisatheite in: keimah in leitungah migitna, thutang le thumaanna zangin hihte ah nuam a sapa TOPA keimah ka hilam hong telna le hong theihna kisaktheihpih hen," TOPA in cikhia hi.

²⁵ "TOPA in ci-le-sa beka vunatte -

²⁶ Egypt, Judah, Edom, Ammon, Moab le gamlapi a sehnel-gama tengte khempeuh dan a kituahsak hun hong tung ding hi. Ahang in, hih minamte khempeuh vunat taktak hi lo uh a, Israel innkuan buppi nangawn lungtanga vunat loh ahi uh hi," a ci hi.