Jeremiah 8 - Zokam International Version

¹ " ‘Tua hun ciangin Judah kumpite le uliante guhte, siampite le kamsangte guhte, Jerusalem khua mite guhte a han panun kilakhia ding hi.

² Amaute in itin a na a sep uh, a nung zui-in thu dongin a biak uh - nipi, khapi le vante a aksite khempeuh tungah a kiphokhia ding hi. Amaute kikhawm lo kiphum lo dinga leilakah a ki-eknusiat lel ding hi.

³ Hih a gilo minam, a kidelhkhia a om laite in a omna munmun-uah nuntak ding sangin sih ding teelzaw ding uh hi, Thahatpen TOPA in ci hi,’ ci-in gen in," TOPA in ci khia hi.

Mawhna le Dan

⁴ "Amaute kiangah, ‘Hih in TOPA gen ahi hi: "Mite a puk ciangin tho kik uh hi lo ahi hiam? Mi khat a kiheikhiat ciangin kileh kik hi lo ahi hiam?

⁵ Tua ahileh bang hangin hih mite pialmang uh ahi hiam? Bang hangin Jerusalem in lamkhial suak ahi hiam? Amaute in zuauthu lenkip uh a, kileh kik ding a nial uh hi.

⁶ Amau gente limtakin ka ngaih hangin thumaan a gen kei uh hi. A gitlohna uh a kisik kuamah om lo a, "Bang hih ka hi hiam? " a ci uh hi. Sakol galsim bangin amau tum ciatin a ta uh hi.

⁷ Vana tui vapite nangawn in amau khuahunte thei uh a, vakhu, phialphiah le hamsiam-te a lal hunin lal uh hi. Ahi hangin ka mite in TOPA deihnate a thei kei uh hi.

⁸ "‘Bangci bangin note in, "Ka pil uh a, TOPA thukham ka nei uh hi," na ci uh hi, a taktakin lah laitheite’ laikung in amaan lo suaksak hi lo ahi hiam?

⁹ Mipilte kimaizumsak dinga; amaute lungneu-in a kiman ding hi. TOPA thu a nial nungsangun bang pilna nam nei uh ahi hiam?

¹⁰ Tua ahi ciangin a zite uh midangte ka piaksak dinga, a lote uh midangte ka piaksak ding hi. Aneupen pan alianpen dong, met nading lamah a huaiham uh hi; kamsangte le siampite in a vek un a kibangin zuau a phuak uh hi.

¹¹ Amaute in ka mite liamma a nasia lo bangin tuamsak uh a kilemna om lopi, "Kilemna, kilemna," a ci uh hi.

¹² A muh thadahhuai-in a gamtat uh, a maizum beek uh hiam? Them zong maizum lo uh a, kisuannazia ding nangawn a thei kei uh hi. Tua ciangin a puksate lakah puk uh a, amaute dan a kithuaksak ciangin a kilawnsuk ding hi,’ TOPA in ci hi.

¹³ " ‘A khopsa uh ante ka lakmangsak ding hi, TOPA in cikhia hi. Lenggui tungah lenggah a gah kei ding hi. Theikungte gah nawn lo dinga a tehte keu ding hi. Amau ka piaksate ka laksak ding hi,’ a ci in," a ci hi.

¹⁴ "Bang hangin hih lai-ah tu lailai i hi hiam? I vekin kikaikhawm dih ni! Kulh-a ki-um khuapite ah tai-in tua lai-ah va si mai ni! Ahang in, TOPA eite Pasian in a si dingin hong koih a, i dawn ding gutui hong pia khin hi, tua pen ama tungah i mawh hang ahi hi.

¹⁵ Kilemna i lamet hangin a hoih lo hong tunga, cidamna i lamet hangin lauhuaina bek hong tung hi.

¹⁶ Dan pana galte’ sakol nakging kiza a, amau sakol hatte hamna in gambuppi a lingsak hi. Amaute i gam sunga om teng, khuapi le a sunga omte khempeuh a susiamang dinga hong kuan uh ahi hi," a ci ding uh hi.

¹⁷ "En un, note lakah gul gu nei, a kizualsak zo lo ngan kong sawl dinga, note hong tu ding uh hi," TOPA in cikhia hi.

¹⁸ Ka dah cianga ka Hehnempa a aw, ka lungsim na mahmah hi.

¹⁹ Gamlapi pana ka mite kikona ngai in: "Zion ah TOPA om nawn lo ahi hiam? A kumpipa tua lai-ah om nawn lo ahi hiam? "Bang hangin amaute in a milimte uh le kimanna a nei lo a gamdang milimte uh tawh kei hong hehsak uh ahi hiam?

²⁰ An lak hun khengta in, khuakhal hun zong bei ta a, eite lah hong kihon nai lo hi," a ci uh hi.

²¹ Ka mite a kigawibawl nungsang, kei hong kigawi hi a; kei thumin lungkhamna in hong lencip hi.

²² Gilead ah zatui om lo ahi hiam? Tua lai-ah zato siam om lo ahi hiam? Bang hanga ka mite liamma dam thei lo ahi hiam?