Jeremiah 48 - Zokam International Version

Moab Tawh Kisai Thupuak

¹ Moab tawh kisai-in: Hih in Israel Pasian Thahatpen TOPA gen ahi hi: "Nebo kisia ta ding ahi manin a tungah gimna a tung hi. Kiriathaim kimaizumsakin kila ta ding hi; a kulh muanhuai c kimaizumsakin kicim ding hi.

² Moab kiphat ngei nawn lo ding hi; Heshbon d ah mite in a kiat nading sawmsim ding uh hi: ‘Hong pai un, tua minam beisak ni,’ ci ding uh hi. Madmen e aw, nang zong na dai khikhe ding hi; namsau in hong nungdelh ding hi.

³ Horonaim pana kikona ngai un, siatna lianpite kisiatna aw ahi hi.

⁴ Moab kisuzan dinga, a tanote uh a kapkhia a ding uh hi.

⁵ Amaute in Luhith lam zuito ding uh a, a paikawmun kahcihtakin a kap ding uh hi; Horonaim lam paisukna ah kisiatna hangin lunggima kahna kiza hi.

⁶ Tai uau! Na nuntak nadingun tai uau! Sehnel-gamah sawlbawk b bang uau.

⁷ Na sepsa le na hauhna na muan nungsang, nang zong salin hong kikai dinga, Chemosh, a siampite le a uliante tawh salin a kikaikhawm ding hi.

⁸ Khuapi khempeuh ah a susiate pai ding uh a, khuapi khat zong a suakta kei ding hi. TOPA in a gensa ahi manin mualkuamte kisusia dinga, mualtung zangte a kisiagawp ding hi.

⁹ Moab kisusiacip c ding ahi manin ci paih un; a khuapite hawmmang dinga, a sungah kuamah a teng kei ding hi.

¹⁰ "TOPA’ na citaka a sem lo mi in hamsiatna thuak ta hen! A namsau sisan luansak na-a a zang lo mi in hamsiatna thuak ta hen!

¹¹ "Moab a neu tunga kipan a omcip hi a, zu tawdat bangin beel khat pan beel khatah kitei loin salin a kikai kei hi. Tua ahi ciangin amah a lim ngei-in lim a, a gimnam a kikhek kei hi.

¹² Ahi hangin TOPA in cikhia hi, "Beel sung pan a sungkhia ding mi ka sawl hun hong tung dinga, amaute in amah a sungkhia ding uh hi; a beel hawmsakin, haitungte a dengzan ding uh hi.

¹³ Tua ciangin Israel in Bethel a muan lai-ua a maizum bangin, Moab in Chemosh a maizumpih ding hi.

¹⁴ "Bangci a, ‘Eite galhang mi - galdona-a a hatte i hi hi,’ ci thei na hi uh hiam?

¹⁵ Moab kisusia-in a khuapite kisim dinga; a tangval hoihpente gawh dingin a kipaisukpih ding hi," a min Thahatpen TOPA a kici Kumpipa in cikhia hi.

¹⁶ "Moab kisiat ding nai mahmah ta a, a tuahsiatna manlangin tung ding hi.

¹⁷ Tuanu liatna a thei a kima tengte khempeuh aw amah kah unla, ‘A khauh na sik ciangkhut kitan-a, a minthang na ciangkhut lah a kitan ta mawk a!’ ci un.

¹⁸ "Debon Tanu a tengte aw, Moab susiapa in nang hong susia dinga, na khuapi umna kulh muanhuaite susia ding ahi manin na minthanna pan hong paisuk inla lei gawtak tungah tu in.

¹⁹ ‘No Aroer a tengte aw, lamgei-ah dingin vil gige un. Galtai mite le a suakta numeite kiangah, "Bang piang ahi hiam?" ci-in dong un.

²⁰ Moab kithehthang gawp ahi manin a maizum hi. Thum unla kah un! Moab kisiatna Arnon dungah zasak un.

²¹ Mualtung zangleite - Holon, Jahzah le Mephaath ah,

²² Dibon, Nebo le Beth Diblathaim ah,

²³ Kiriathaim, Beth Gamul le Beth Meon ah,

²⁴ Kerioth le Bozrah le - anai agamla-a om Moab khuapite khempeuh ah thukhenna tung zo hi.

²⁵ Moab’ ki d kisuktansak a; a ban kikuaihtansak hi," TOPA in cikhia hi.

²⁶ "TOPA langah tuanu kiliansak ahi manin zu khamsak un. Ama luak lakah Moab bualsak unla; mite nuihsat suaksak un.

²⁷ Israel note nuihsat suak hilo ahi hiam? Ama thu na gen simin, amah simmawhin na lu na peisansan, amah gutate laka kiman sa na ahi hiam?

²⁸ Moab a tengte aw, na khuapite uh taisan unla, suangkawl lakah teng un. Suangheng vangah kawl-vakhu butom bangin om un.

²⁹ "Kote in Moab kiphatsakna - ki-uatsakna le kihihsakna, a kisaktheihna le a kiliatsakna le a lungsim liatnate ka za khin uh hi.

³⁰ Ama hiamgamhna a mawkna hi a, a kisaktheihna bangmah lo ahilam ka thei hi," TOPA in cikhia hi.

³¹ Tua ahi ciangin Moab ka kah a, Moab-te khempeuh adingin kikokhia-in, Kir Hareseth mite adingin ka thum hi.

³² Sibmah lengguite aw, Jazer kah bangin nang adingin ka kap hi. Na guite tuipi dongin zaama; Jazer tuipi dong ban uh hi. Na gah minzunte le na lenggahte tungah a susiate kipuk uh hi.

³³ Moab lote le singno leite panin lungnopna le kipahna a om nawn kei hi. Lenggah sukna panin zu ka kangsaka; lenggah cilte, kuamah lungdamin a awng nawn kei uh hi. A awng uh zongin lungdamna awging hi nawn lo hi.

³⁴ Amaute kahna aw, Heshbon panin Elealeh le Jazas dong, Zoar panin Horonaim le Eglath Shelishiyah ciang dongah a ging hi, ahang in, Nimrim tuite nangawn kangcip hi.

³⁵ Moab ah munsanga kithoihna piate le amau pasiante tungah gimnamtui halte ka beisak ding hi," TOPA in cikhia hi.

³⁶ "Tua ahi ciangin ka lungsim sungah tamngai mut bangin ka taamlo a; Kir Hareseth mite adingin tamngai bangin ka tamlo hi. A khol uh, a neih a lamteng uh beita hi.

³⁷ Mi peuhmah in a lu uh mettol uh a, a khamul uh kiatkhia-in a khut uh kuikek uh a, a kawnguah ippi puan teng uh hi.

³⁸ Keimah in kuama deih loh leibeel bangin Moab sukham ta ka hi manin Moab, inntungkhum khempeuh le mihon kikhopna tual-awng khempeuh ah thumna longal bangmah dang a om kei hi." TOPA in cikhia hi.

³⁹ "Amah kinak tap si e! Amaute nak kah si uh e! Moab maizumin nungngatsan tah! Moab ahileh a kima om khempeuh nuihsat le lipkhap suak ta hi," a ci hi.

⁴⁰ Hih in TOPA gen ahi hi "En un! Muvanlai khat in a kha zalsa in Moab bawhsuk hi.

⁴¹ Kerioth a kila dinga a kulh muanhuaite kila khin ding hi. Tua ni ciangin Moab galhangte lungsim numei nausuak dingte lungsim bang ding hi.

⁴² Moab in TOPA langpan ahi manin minam khat bangin kisusia ding hi.

⁴³ Moab mite aw, launa, dum le thang in note hong pang hi," TOPA in cikhia hi.

⁴⁴ "Keimah in Moab tungah a dan thuak kum tungsak ding ka hi manin lau-a tai peuhmah dum sungah kia-in, dum sung pana kahkhia peuhmah thangah a awk ding uh hi," TOPA in cikhia hi.

⁴⁵ "Heshbon liim panin mei khat kuangkhia-a, Sihon laizang panin meikuang khat a kipan hi; tua in Moab-te thaltang kangin, a kiphasakte lutang guh kang ahi manin Heshbon liim a beel galtaite cimawhsa-in a ding uh hi.

⁴⁶ Moab aw, gimna nak thuak na nicia! Chemosh mite kisia khin a; na tapate salin kikai khinin na tanute uh galmatin kipaipih hi.

⁴⁷ "Tua hi napi hong tung ding mailam hunah Moab angei kong bangsak ding hi," TOPA in cikhia hi. Moab tunga thukhenna hih ciangah beita hi.