Jeremiah 24 - Zokam International Version

Theigah Bawm Nih

¹ Babylon kumpipa Nebuchadnezzar in Jerusalem pan Babylon ah Jehoiakim tapa Judah kumpipa Jehoiachin c le a uliante, Judah khutsiamte le nasep siamte salin a kaih khit ciangin TOPA biakinnpi mai-a kikoih theigah bawm nih TOPA in hong lak hi.

² Bawm khat limci mahmah a, apal hileh kilawm hi. A bawm khat pen limci het lo-a nek theih ding abang peuhmah kei hi.

³ Tua ciangin TOPA in kei kiangah, "Jeremiah aw, bang na mu hiam?" ci-in hong dong hi. "Theigah," ci-in ka dawnga, "Ahoihte limci mahmah a, a hoih lote nek theih ding a bang kei hi," ka ci hi.

⁴ Tua ciangin TOPA thu kei tungah hong tunga:

⁵ "TOPA Israel Pasian thugen hih ahi hi: ‘Hih mun pana Babylon mite d gama ka puakkhiat Judah mi saltangte, hih theigah hoihte bangin ka ngaihsun hi.

⁶ Amaute hoihna limtakin ka encik dinga hih gamah ka puak kik ding hi. Amaute ka lam dinga ka sumang kei ding hi; amaute ka suan dinga ka botkhia kei ding hi.

⁷ Keimah TOPA ka hilam hong theih nadingun lungsim ka guan ding hi. A lungsim khempeuh uh tawh kei kiangah hong kileh kik ding uh ahi manin amaute keima mi hi ding uh a, keimah amaute Pasian ka hi ding hi.

⁸ Ahi hangin "‘Judah kumpipa Zedekiah le a uliante a kipan Jerusalem a, a omsuak, a om lai sunte ahi zongin Egypt a tengte ahi zongin, tua a limci lo lua a kine thei lo ding theigahte bangin ka bawl ding hi" TOPA in ci a,

⁹ amaute ka hawlkhiatna mun peuhpeuh ah mite in kihamsiatna in a zat dingun simmawhna le zahkona ka thuaksak dinga, leitung kumpi-gam khempeuh in mudahin a langbawl ding uh hi.

¹⁰ Amaute tungah namsau, kialpi le pulpi ka sawl dinga amaute le a pate uh ka piaksa gam pan amaute a susia ding hi,’ ci-in gen in," hong ci hi.