James 3 - Zokam International Version

Leii Zualsakna

¹ Ka sanggamte aw, sia a sem kote in a khauhzaw thukhenna thuak ding ka hi manun note a tampi sia suah na sawm kei un.

² Eite i vekpi in lam tampi-ah i muktu hi. Mi khatpeuh in a kam pauna ah khialhna a neih kei leh amah mi picing khat hi-a, ama pumpi bup a kemcing thei mi zong ahi hi.

³ Sakolte in thu a man nadingin a kam sungah kamkaih i bulh khit ciangin tua ganhing a buppi-in i hei thei hi.

⁴ Ahi kei leh tembawpi gentehna in nei ni. Tuate lian mahmah a huih khauh mah mah in a mut hangin a hawlpa in a pai nopna peuhpeuh ah a heina neuno-in a hei hi.

⁵ Tua mah tawh kibangin leii pen pumpi na a neuno khat ahi hangin nakpitakin a kisial hi. Mei-ekno khat in gamsung lianpipi a katsak na ngaihsun in.

⁶ Leii zong mei khat mah hi-a, pumpi nate lakah gitlohna lompi ahi hi. A mihinna pumpi siasaka, a nuntak sung bup kangsakin, amah le amah zong meilipi in a kihal kuang ahi hi.

⁷ Mihing in ganhing nam khempeuh, vasate, a bokvak ganhingte zualsak zo-a, a khawi uh hi.

⁸ Ahi hangin kuamah in leii a zualsak zo kei hi. Leii pen a om mawkmawk thei lo, a gilo, sihtheihna gu tawh a dim khat ahi hi.

⁹ Tua leii-in i Topa le i Pa i phat a, tua mah-in Pasian a suna kibawl mihingte i hamsiat hi.

¹⁰ Tua kam khat mah panin phatna le hamsiatna pusuakkhia khawm hi. Ka sanggamte aw, hih bang ding hi lo hi.

¹¹ Tuinak khat panin tuisiang le citui f luangkhia khawm thei ahi hiam?

¹² Ka sanggamte aw, theikung in olive gah, gah thei ahi hiam, ahikeh lenggui in theigah, gah thei ahi hiam? Citui nak ah tuisiang a luangkhia thei tuan kei hi.

Pilna Nam Nihte

¹³ Note lakah kua pil a, kua in theitel ahi hiam? Ama nuntak hoihna le a pilna pana hong piangkhia kiniamkhiatna sungah a gamtatna-in lak ta hen.

¹⁴ Ahi hangin note lungtang sungah enna khaa le huaiham tupna na selsiah uh leh tua hangin kisialh ding hi lo a, thutak a nial na hizaw uh hi.

¹⁵ Tua bang "pilna" vantung pana hong paisuk hi loin leitung pilna, khamilohna le gilopa aa hizaw hi.

¹⁶ Ahang in, enna le huaiham tupna a omna peuhah kilemlohna le gitloh gamtatna vive a om hi.

¹⁷ Ahi hangin vantung pana pilna ahileh a masa penin siangtho a, lemna deih in, midangte khual a, kiniamkhiat in, lainatna le gah hoih tawh dima, khentuam nei loin citak hi.

¹⁸ Lemna a vawh lemgente in thumaanna a at uh hi.