James 2 - Zokam International Version

Deidanna Kikham

¹ Ka sanggamte aw, a minthang i Topa Jesu Christ sunga thu-umte na hi uh bangin angvan tuam nei kei un.

² Gentehna in note kikhopna sungah kham zungbuh bunin puan hoih silh khat hong lut a, mizawng puansia nemnam silh khat zong hong lut hi.

³ Note in puan hoih silh pa tuam bawlin, "Hih lai-ah tutphah nuam om hi," na ci uh a, ahi hangin mizawng pa tungah, "Hua lai-ah na ding in," ahikeh, "Ka khephung sual tungah na tu in," ci-a thudon tuam na neih uh leh

⁴ mi deidan tuamin no le no sungah ngaihsutna hoih lo tawh thu a khen suak lo ding na hi uh hiam?

⁵ Kong it ka sanggamte aw, ngai un: Pasian in upna ah ahau ding le amah a itte a kamciam, ama gam a luah dingin leitung mite muhna-a a zawngte teel hi lo ahi hiam?

⁶ Ahi hangin note in a zawngte na zahlaksak uh hi. Note hong netum mihaute hi lo uh ahi hiam? Thukhenna mun hong tun amaute hi lo uh ahi hiam?

⁷ Note hong nei, ama min thupi a gensia amaute hi lo uh ahi hiam?

⁸ Laisiangtho sunga om: "Nang le nang na ki-it bangin na vengte it in," a a cih kumpi thukham na letkip takpi uh leh amaana gamta na hi uh hi.

⁹ Ahi hangin angvantuam na neih uh leh a mawh na hi uh a, thukham palsatte mah bangin thukham in mawh hong tangsak hi.

¹⁰ Ahang in, thukham a buppi-in zui napi, thu khat kia-a, a muktute a vekin a palsat khin a suak hi.

¹¹ Ahang in, "Angkawm kei in," b hong ci pa in, "Tual that kei in," c zong hong ci lai hi. Ang na kawm loh hangin, tual na thah leh, thukham a palsat mah na hi hi.

¹² Suahtakna a pia thukham in thu a khen ding mite bangin thugenin gamta un.

¹³ Bang hang hiam cih leh lainatna a nei lo mi peuhmah tungah lainatna om loin thu a kikhen ding hi. Thukhenna tungah lainatna a gualzo hi.

Upna le Gamtatna

¹⁴ Ka sanggamte aw, mi khat in upna ka nei hi, a cih hangin gamtatkhiatna a neih kei leh bang phatuam ahi hiam? Tua bang upna in amah honkhia thei ahi hiam?

¹⁵ Gentehna in sanggampa khat ahikeh sanggamnu khat in puansilh le a nisim an nei loin om hi.

¹⁶ Note khat in ama kiangah, "Nuamtakin om in, khualum inla, an kham in," ci-in ahi hangin a kisapnate bangmah na hihsak kei leh bang phatuam ahi hiam?

¹⁷ Tua mah tawh kibangin gamtatkhiatna in a zuih kei leh upna kia bek a si ahi hi.

¹⁸ Ahi hangin mi khatpeuh in, "Nang upna na nei hi; ken gamtatna ka nei hi," ci ding hi. Gamtatnate loin na upna hong lak in. Ken ka sepna-in ka upna kong lak ding hi.

¹⁹ Pasian khat om hi, cih na um hi. Pha hi! Dawite nangawn in tua mah umin lau-in a ling uh hi.

²⁰ Nang mihaipa aw, gamtatna loin upna a kimanna om lo d hi cih a kitelna na thei nuam hiam?

²¹ I pu Abraham in a tapa Isaac biakna-tau tungah a piak ciangin ama nasepsa thumaanin kisimsak hi lo ahi hiam?

²² Ama upna le a gamtatnate in semkhawm a, ama sepna in a upna bucingsak hi cih na thei hi.

²³ Tua hi a, Laisiangtho in, "Abraham in Pasian um a, tua ama upna ama thumaanna-in kisimsak hi," e a cih tangtunga, amah Pasian lawmpa kici hi.

²⁴ Mi khat a upna guak hi loin ama sepna in dik tangsak ahilam na thei hi.

²⁵ Tua mah tawh kibangin numei kizuak Rahab nangawn in thukansimte zin tungsak a, lampi tuam ah a khakkhiat ciangin ama gamtatnasa hangin thu maan suak hi lo ahi hiam?

²⁶ Kha a om lo pumpi a si ahi bangin gamtatna om lo upna a si ahi hi.