Isaiah 8 - Zokam International Version

TOPA ’ Vanzat Assyria

¹ TOPA in kei kiangah, "Laizial zapi khat la inla a tungah laikung mawkmawk khatin: Maher - Shalal - Hash-Baz f; ci-in gelh in.

² Ka teci muanhuai dingin siampi Uriah le Jeberekiah tapa Zechariah ka sam ding hi," hong ci hi.

³ Tuateh kamsangnu kiangah ka pai-a, amah gai-in tapa khat a nei hi. Tuateh TOPA in kei kiangah, "A min Maher-Shalal-Hash-Baz phuak in.

⁴ Naupang in, ‘Ka nu’ ahikeh ‘Ka pa’ a cih theih ma-in Damascus-te hauhna le Samaria-te neih a kisut vante Assyria kumpipa in a puakkhiatsak ding hi," hong ci hi.

⁵ TOPA in kei hong hopih kik a:

⁶ "Hih mite in damdama luangluang Shiloah tuite nial uh a, Rezin le Remaliah tapa hangin a lungdam uh hi;

⁷ tua hangin Topa in amaute a langpan dingin a thahat Gun g tui khangte - Assyria kumpite le a galkap honpi a puak ding hi. A hawkguam khempeuh dimlet dinga, a piau khempeuh a luah ding hi.

⁸ Judah nawt dinga a tungah kivialin ngawng ciang tumin a nawksuak ding hi. Immanuel h aw! a kha zakin na gam a vailam tuam khin ding hi," a ci hi.

⁹ No minamte aw, gal phuangin awng i un; kithehthang ngel nuteh! Gamlapi a om gamte khempeuh aw, ngai un. Galsim dingin kiging unla kithehthang lel un! Galsim dingin kiging unla kitamzan un!

¹⁰ Thu vaihawm un, a mawkna hi lel ding hi; geelgeel un, na geelna uh a kip kei ding hi; ahang in, kote tawh Pasian om khawm hi. j

Pasian Kihta In

¹¹ TOPA in a thahat ama khut ka tungah nga-in hih mite lampi ka zuih loh nadingin hong vauhilh hi. Amah in:

¹² "Hih mite in sawmsim a cih teng uh sawmsim k cihpih kei in; amau kihtakte kihta kei inla laulua kei in.

¹³ Thahatpen TOPA bek na siangthosak ding uh hi, amah bek kihta-in amah bek na lau ding uh a,

¹⁴ amah biakbuk suakin ahi hangin Israel innkuante adingin mite kimuktukna suang le amaute kipalpukna suangtum a hi khawm ding hi. Tuateh Jerusalem mite adingin thang le thangzak a suak ding hi.

¹⁵ Amaute tampi a muktu ding uh hi; amaute tukin kitam ding uh a, amaute thang kisiah ah awkin a kiman ding hi," hong ci hi.

¹⁶ Hih thute tun inla ka nungzuite lakah imcip in.

¹⁷ Jacob innkuante pana a mai a selpa TOPA ka ngak ding hi. Amah ka muang ding h.

¹⁸ Hih lai-ah TOPA hong piak tate le kei ka om uh hi. Thahatpen TOPA Zion Vum a tengpa panin Israel-te sungah lim le ciamtehna kote ka hi uh hi.

¹⁹ Mite in note kiangah a phun-suausuau, a humham daldal sikha hopihte le vankahte thu dong un. Mite in a Pasian uh thu a dot mah uh hi lo hiam? A hingte tangin misi dot ding ahi hiam?

²⁰ Thukham le tecipannate bek ngai un. Amaute in hih kammalte tawh kizui-in a pau kei uh leh amau adingin phalvak khuavak a nei lo suak uh hi.

²¹ Amaute lungdongin gilkialpi-in gam sungah a vak kawikawi ding uh hi; a gilkial luat uh ciangin lungso ding uh a, vandakin a kumpipa uh le a Pasian uh a hamsiat ding uh hi.

²² Tua ciangin leilam enin, lungdonna, khuamial le a kihtakhuai khuamialpi mu ding uh a amaute khuamial ngeungau sungah a kisawngawp ding hi.